ਖਿਡਾਰੀ ਤੋਂ ਕੋਚ ਬਣਨ ਲਈ ਮਾਨਸਿਕ ਤੌਰ ''ਤੇ ਤਿਆਰੀ ਕਰਨੀ ਹੋਵੇਗੀ : ਸ਼੍ਰੀਜੇਸ਼

ਕੋਚੀ— ਭਾਰਤੀ ਹਾਕੀ ਦੇ ਮਹਾਨ ਗੋਲਕੀਪਰ ਪੀਆਰ ਸ਼੍ਰੀਜੇਸ਼ ਦਾ ਇੱਥੇ ਪਹੁੰਚਣ 'ਤੇ ਸ਼ਾਨਦਾਰ ਸਵਾਗਤ ਕੀਤਾ ਗਿਆ। ਉਨ੍ਹਾਂ ਨੇ ਕਿਹਾ ਕਿ ਉਹ ਅਗਲੇ ਦੋ-ਤਿੰਨ ਮਹੀਨੇ ਆਪਣੇ ਆਪ ਨੂੰ ਖਿਡਾਰੀ ਤੋਂ ਕੋਚ ਬਣਨ ਲਈ ਤਿਆਰ ਕਰਨ ਲਈ ਬਿਤਾਉਣਗੇ। ਇੱਥੇ ਉਨ੍ਹਾਂ ਦੇ ਸਵਾਗਤ ਲਈ ਹਵਾਈ ਅੱਡੇ ਤੋਂ ਪਲਰੀਵੱਟਮ ਤੱਕ ਰੋਡ ਸ਼ੋਅ ਕੀਤਾ ਗਿਆ। ਸ਼੍ਰੀਜੇਸ਼ ਨੇ ਕਿਹਾ, 'ਮੈਂ ਦੇਸ਼ ਲਈ ਸਖਤ ਮਿਹਨਤ ਕਰਕੇ ਅਤੇ ਕਈ ਕੁਰਬਾਨੀਆਂ ਕਰਕੇ ਮੈਡਲ ਜਿੱਤਿਆ ਹੈ ਅਤੇ ਇਹ ਸਿਰਫ ਮੇਰਾ ਮੈਡਲ ਨਹੀਂ ਬਲਕਿ ਦੇਸ਼ ਦਾ ਮੈਡਲ ਹੈ। ਇਸ ਖੁਸ਼ੀ ਦਾ ਹਿੱਸਾ ਬਣਨਾ ਸੋਨੇ 'ਤੇ ਸੁਹਾਗੇ ਵਾਂਗ ਹੈ। ਖੁਸ਼ੀ ਦੁੱਗਣੀ ਹੋ ਗਈ ਹੈ। ਉਨ੍ਹਾਂ ਨੇ ਕਿਹਾ, 'ਹੁਣ ਮੈਨੂੰ ਖਿਡਾਰੀ ਤੋਂ ਕੋਚ ਬਣਨਾ ਹੈ। ਇਸ ਦੇ ਲਈ ਤੁਹਾਨੂੰ ਮਾਨਸਿਕ ਤੌਰ 'ਤੇ ਤਿਆਰ ਰਹਿਣਾ ਹੋਵੇਗਾ। ਮੈਂ ਅਗਲੇ ਦੋ-ਤਿੰਨ ਮਹੀਨਿਆਂ ਤੱਕ ਅਜਿਹਾ ਹੀ ਕਰਾਂਗਾ।
ਇੱਥੇ ਪਹੁੰਚਣ 'ਤੇ ਸ਼੍ਰੀਜੇਸ਼ ਦੇ ਸਵਾਗਤ ਲਈ ਵੱਡੀ ਭੀੜ ਇਕੱਠੀ ਹੋ ਗਈ ਸੀ, ਜਿਨ੍ਹਾਂ 'ਚ ਕਈ ਵਿਧਾਇਕ ਵੀ ਸ਼ਾਮਲ ਸਨ। ਲੋਕਾਂ ਨੇ ਹੱਥਾਂ 'ਚ ਸ਼੍ਰੀਜੇਸ਼ ਦੀ ਤਸਵੀਰ ਵਾਲੀਆਂ ਤਖਤੀਆਂ ਫੜੀਆਂ ਹੋਈਆਂ ਸਨ। ਰੋਡ ਸ਼ੋਅ ਦੌਰਾਨ ਸ੍ਰੀਜੇਸ਼ ਨੇ ਖੁੱਲ੍ਹੀ ਜੀਪ ਵਿੱਚ ਬੈਠ ਕੇ ਲੋਕਾਂ ਦਾ ਸਵਾਗਤ ਕੀਤਾ। ਉਨ੍ਹਾਂ ਨੂੰ ਫੁੱਲ ਅਤੇ ਗੁਲਦਸਤੇ ਭੇਂਟ ਕੀਤੇ ਗਏ ਅਤੇ ਲੋਕਾਂ 'ਚ ਉਨ੍ਹਾਂ ਨਾਲ ਹੱਥ ਮਿਲਾਉਣ ਦਾ ਉਤਸ਼ਾਹ ਸੀ। ਪੈਰਿਸ ਓਲੰਪਿਕ 'ਚ ਕਾਂਸੀ ਦਾ ਤਮਗਾ ਜਿੱਤਣ ਤੋਂ ਬਾਅਦ ਸ਼੍ਰੀਜੇਸ਼ ਨੇ ਹਾਕੀ ਨੂੰ ਅਲਵਿਦਾ ਕਹਿ ਦਿੱਤਾ। ਹੁਣ ਉਹ ਜੂਨੀਅਰ ਟੀਮ ਦੇ ਕੋਚ ਹੋਣਗੇ।