ਅਰਜਨਟੀਨਾ ਲਈ ਆਖਰੀ ਮੈਚ ਖੇਡਣ ਤੋਂ ਬਾਅਦ ਕਲੱਬ ਮੈਚ ''ਚ ਚਮਕੇ ਮੈਸੀ

ਮਿਆਮੀ : ਅਰਜਨਟੀਨਾ ਦੀ ਰਾਸ਼ਟਰੀ ਟੀਮ ਵੱਲੋਂ ਆਪਣਾ ਆਖਰੀ ਮੈਚ ਖੇਡਣ ਤੋਂ ਬਾਅਦ ਲਿਓਨਲ ਮੈਸੀ ਨੇ ਕਲੱਬ ਪੱਧਰ 'ਤੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਦੋ ਗੋਲ ਕੀਤੇ, ਜਿਸ ਦੀ ਬਦੌਲਤ ਇੰਟਰ ਮਿਆਮੀ ਨੇ ਮੇਜਰ ਸੌਕਰ ਲੀਗ ਵਿੱਚ ਡੀ.ਸੀ. ਯੂਨਾਈਟਿਡ ਨੂੰ 4-0 ਨਾਲ ਕਰਾਰੀ ਹਾਰ ਦਿੱਤੀ। ਇਸ ਮੈਚ ਵਿੱਚ ਲੁਈਸ ਸੁਆਰੇਜ਼ ਨੇ ਵੀ ਦੋ ਗੋਲ ਕੀਤੇ, ਜਦਕਿ ਜਰਮਨ ਬਰਤੇਰਾਮੇ ਨੇ ਦੋ ਗੋਲ ਕਰਨ ਵਿੱਚ ਮਦਦ ਕੀਤੀ। ਇਸ ਜਿੱਤ ਨਾਲ ਇੰਟਰ ਮਿਆਮੀ ਨੇ ਪਿਛਲੇ ਪੰਜ ਮੈਚਾਂ ਤੋਂ ਚੱਲੇ ਆ ਰਹੇ ਜਿੱਤ ਨਾ ਮਿਲਣ ਦੇ ਸਿਲਸਿਲੇ ਨੂੰ ਤੋੜ ਦਿੱਤਾ।

ਅਰਜਨਟੀਨਾ ਦੀ ਰਾਸ਼ਟਰੀ ਟੀਮ ਨਾਲ ਆਪਣੇ 21 ਸਾਲਾਂ ਦੇ ਸਫ਼ਰ ਦਾ ਵਿਦਾਈ ਮੈਚ ਖੇਡਣ ਦੇ ਚਾਰ ਦਿਨਾਂ ਬਾਅਦ ਮੈਸੀ ਪੂਰੇ 90 ਮਿੰਟ ਤੱਕ ਮੈਦਾਨ ਵਿੱਚ ਡਟੇ ਰਹੇ। ਇਸ ਪ੍ਰਦਰਸ਼ਨ ਨਾਲ ਟੂਰਨਾਮੈਂਟ ਦੇ ਮੌਜੂਦਾ ਸੀਜ਼ਨ ਵਿੱਚ ਉਨ੍ਹਾਂ ਦੇ ਕੁੱਲ ਗੋਲਾਂ ਦੀ ਗਿਣਤੀ 23 ਹੋ ਗਈ ਹੈ, ਜੋ ਕਿ ਕਿਸੇ ਵੀ ਖਿਡਾਰੀ ਦੇ ਸਭ ਤੋਂ ਵੱਧ ਗੋਲ ਹਨ। ਮੈਚ ਦੇ ਪਹਿਲੇ ਹਾਫ਼ ਵਿੱਚ ਸੁਆਰੇਜ਼ ਦੇ ਦੋ ਗੋਲਾਂ ਦੀ ਬਦੌਲਤ ਇੰਟਰ ਮਿਆਮੀ ਨੇ ਹਾਫ਼ ਟਾਈਮ ਤੱਕ 2-0 ਦੀ ਬੜ੍ਹਤ ਬਣਾ ਲਈ ਸੀ। ਇਸ ਤੋਂ ਬਾਅਦ ਮੈਸੀ ਨੇ 47ਵੇਂ ਮਿੰਟ ਵਿੱਚ ਆਪਣਾ ਪਹਿਲਾ ਅਤੇ 60ਵੇਂ ਮਿੰਟ ਵਿੱਚ ਦੂਜਾ ਗੋਲ ਕਰਕੇ ਟੀਮ ਦੀ 4-0 ਨਾਲ ਜਿੱਤ ਪੱਕੀ ਕਰ ਦਿੱਤੀ।