ਸੈਫ ਅੰਡਰ-17 ਚੈਂਪੀਅਨਸ਼ਿਪ ਦੇ ਸ਼ੁਰੂਆਤੀ ਮੈਚ ''ਚ ਮੌਜੂਦਾ ਚੈਂਪੀਅਨ ਭਾਰਤ ਦਾ ਸਾਹਮਣਾ ਬੰਗਲਾਦੇਸ਼

ਥਿੰਫੂ— ਮੌਜੂਦਾ ਚੈਂਪੀਅਨ ਭਾਰਤ ਸ਼ੁੱਕਰਵਾਰ ਨੂੰ ਇੱਥੇ ਸੈਫ ਅੰਡਰ-17 ਫੁੱਟਬਾਲ ਚੈਂਪੀਅਨਸ਼ਿਪ ਦੇ ਗਰੁੱਪ-ਏ ਦੇ ਸ਼ੁਰੂਆਤੀ ਮੈਚ 'ਚ ਬੰਗਲਾਦੇਸ਼ ਖਿਲਾਫ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਕਰੇਗਾ। ਤਿੰਨ ਟੀਮਾਂ ਵਾਲੇ ਗਰੁੱਪ ਏ ਵਿੱਚ ਮਾਲਦੀਵ ਤੀਜੀ ਟੀਮ ਹੈ ਅਤੇ ਭਾਰਤ ਨੇ 24 ਸਤੰਬਰ ਨੂੰ ਉਸ ਦਾ ਸਾਹਮਣਾ ਕਰਨਾ ਹੈ। ਗਰੁੱਪ ਬੀ ਵਿੱਚ ਮੇਜ਼ਬਾਨ ਭੂਟਾਨ, ਨੇਪਾਲ, ਸ੍ਰੀਲੰਕਾ ਅਤੇ ਪਾਕਿਸਤਾਨ ਸ਼ਾਮਲ ਹਨ।

ਹਰੇਕ ਗਰੁੱਪ ਵਿੱਚੋਂ ਚੋਟੀ ਦੀਆਂ ਦੋ ਟੀਮਾਂ 28 ਸਤੰਬਰ ਨੂੰ ਹੋਣ ਵਾਲੇ ਸੈਮੀਫਾਈਨਲ ਵਿੱਚ ਪਹੁੰਚਣਗੀਆਂ, ਜਿਸ ਤੋਂ ਬਾਅਦ ਫਾਈਨਲ 30 ਸਤੰਬਰ ਨੂੰ ਹੋਵੇਗਾ। ਭਾਰਤ 2022 ਵਿੱਚ ਚੈਂਪੀਅਨ ਹੈ, ਪਿਛਲੀ ਵਾਰ ਇਹ ਟੂਰਨਾਮੈਂਟ ਅੰਡਰ-17 ਉਮਰ ਵਰਗ ਵਿੱਚ ਖੇਡਿਆ ਗਿਆ ਸੀ। ਪਿਛਲੇ ਸਾਲ ਦਾ ਪੜਾਅ ਅੰਡਰ-16 ਉਮਰ ਵਰਗ ਲਈ ਕਰਵਾਇਆ ਗਿਆ ਸੀ ਅਤੇ ਭਾਰਤ ਵੀ ਜੇਤੂ ਰਿਹਾ ਸੀ।

ਮੁੱਖ ਕੋਚ ਇਸ਼ਫਾਕ ਅਹਿਮਦ ਨੇ ਉਸੇ ਚਾਂਗਲੀਮਿਥਾਂਗ ਸਟੇਡੀਅਮ ਵਿੱਚ ਟਰਾਫੀ ਜਿੱਤਣ ਵਾਲੀ ਟੀਮ ਦੇ 23 ਵਿੱਚੋਂ 16 ਖਿਡਾਰੀਆਂ ਨੂੰ ਬਰਕਰਾਰ ਰੱਖਿਆ ਹੈ। ਇੱਕ ਸਾਲ ਪਹਿਲਾਂ ਭਾਰਤ ਨੇ ਸ਼ੁਰੂਆਤੀ ਮੈਚ ਵਿੱਚ ਬੰਗਲਾਦੇਸ਼ ਖ਼ਿਲਾਫ਼ 1-0 ਨਾਲ ਜਿੱਤ ਦਰਜ ਕੀਤੀ ਸੀ ਅਤੇ ਫਾਈਨਲ ਵੀ ਬੰਗਲਾਦੇਸ਼ ਖ਼ਿਲਾਫ਼ ਸੀ ਜਿਸ ਵਿੱਚ ਉਹ 2-0 ਨਾਲ ਜੇਤੂ ਰਿਹਾ ਸੀ।

ਇਸ਼ਫਾਕ ਅਹਿਮਦ ਨੇ ਟੂਰਨਾਮੈਂਟ ਤੋਂ ਪਹਿਲਾਂ ਪ੍ਰੈੱਸ ਕਾਨਫਰੰਸ 'ਚ ਕਿਹਾ, 'ਸਾਨੂੰ ਬੰਗਲਾਦੇਸ਼ ਖਿਲਾਫ ਚੁਣੌਤੀਪੂਰਨ ਮੈਚ ਦੀ ਉਮੀਦ ਹੈ। ਮੈਂ ਚਾਹੁੰਦਾ ਹਾਂ ਕਿ ਸਾਡੇ ਖਿਡਾਰੀਆਂ ਦੀ ਪਰਖ ਕੀਤੀ ਜਾਵੇ ਅਤੇ ਅਸੀਂ ਜਾਣਦੇ ਹਾਂ ਕਿ ਬੰਗਲਾਦੇਸ਼ ਟੀਮ ਨਾਲ ਖੇਡਣਾ ਇੰਨਾ ਆਸਾਨ ਨਹੀਂ ਹੋਵੇਗਾ। ਸਾਨੂੰ ਸਕਾਰਾਤਮਕ ਸ਼ੁਰੂਆਤ ਦਾ ਭਰੋਸਾ ਹੈ। ਉਮੀਦ ਹੈ ਕਿ ਮੈਚ 'ਚ ਹਰ ਕੋਈ ਚੰਗੀ ਫੁੱਟਬਾਲ ਦਾ ਆਨੰਦ ਮਾਣੇਗਾ।