ਆਸਟ੍ਰੀਆ ਨੂੰ ਹਰਾ ਕੇ ਪੁਰਤਗਾਲ ਬਣਿਆ ਫੀਫਾ ਅੰਡਰ-17 ਵਿਸ਼ਵ ਚੈਂਪੀਅਨ

ਦੋਹਾ– ਪੁਰਤਗਾਲ ਨੇ ਫੀਫਾ ਅੰਡਰ-17 ਵਿਸ਼ਵ ਕੱਪ ਦੇ ਫਾਈਨਲ ਵਿਚ ਆਸਟ੍ਰੀਆ ਨੂੰ 1-0 ਨਾਲ ਹਰਾ ਕੇ ਇਸ ਉਮਰ ਵਰਗ ਵਿਚ ਆਪਣਾ ਪਹਿਲਾ ਵਿਸ਼ਵ ਪੱਧਰੀ ਖਿਤਾਬ ਜਿੱਤਿਆ।

ਬੇਨਫਿਕਾ ਦੇ ਫਾਰਵਰਡ ਅਨੀਸਿਓ ਕੈਬ੍ਰਾਲ ਨੇ 48 ਦੇਸ਼ਾਂ ਦੇ ਟੂਰਨਾਮੈਂਟ ਵਿਚ ਖੇਡੇ ਗਏ ਖਿਤਾਬੀ ਮੁਕਾਬਲੇ ਦੇ 32ਵੇਂ ਮਿੰਟ ਵਿਚ ਮੈਚ ਦਾ ਇਕਲੌਤਾ ਗੋਲ ਕੀਤਾ। ਇਸ ਤੋਂ ਪਹਿਲਾਂ ਇਟਲੀ ਨੇ ਤੀਜੇ ਸਥਾਨ ਦੇ ਮੈਚ ਵਿਚ ਬ੍ਰਾਜ਼ੀਲ ਨੂੰ ਸ਼ੂਟਆਊਟ ਵਿਚ 4-2 ਨਾਲ ਹਰਾਇਆ, ਜਿਸ ਨਾਲ ਯੂਰਪ ਦੀਆਂ ਟੀਮਾਂ ਨੇ ਟਾਪ-3 ਸਥਾਨਾਂ ’ਤੇ ਆਪਣਾ ਦਬਦਬਾ ਬਣਾਇਆ।

ਮੁਕਾਬਲਾ ਬਰਾਬਰੀ ’ਤੇ ਰਹਿਣ ਤੋਂ ਬਾਅਦ ਗੋਲਕੀਪਰ ਅਲੈਸੇਂਡ੍ਰੋ ਲੋਂਗੋਨੀ ਨੇ ਦੋ ਪੈਨਲਟੀਆਂ ਬਚਾ ਕੇ ਇਟਲੀ ਦੀ ਜਿੱਤ ਪੱਕੀ ਕੀਤੀ। ਫੀਫਾ ਅੰਡਰ-17 ਵਿਸ਼ਵ ਕੱਪ ਦਾ ਇਹ 20ਵਾਂ ਸੈਸ਼ਨ ਹੈ। ਫੀਫਾ ਇਸ ਟੂਰਨਾਮੈਂਟ ਨੂੰ ਹੁਣ ਹਰ ਦੋ ਸਾਲ ਦੀ ਬਜਾਏ ਸਾਲਾਨਾ ਆਯੋਜਿਤ ਕਰਦਾ ਹੈ।