ਸੱਟ ਤੋਂ ਬਾਅਦ ਮੀਰਾਬਾਈ ਚਾਨੂ ਦੀ ਸ਼ਾਨਦਾਰ ਵਾਪਸੀ, ਪੈਰਿਸ ਓਲੰਪਿਕ ''ਚ ਜਗ੍ਹਾ ਪੱਕੀ ਕੀਤੀ

ਫੁਕੇਟ (ਥਾਈਲੈਂਡ) : ਟੋਕੀਓ ਓਲੰਪਿਕ ਦੀ ਚਾਂਦੀ ਦਾ ਤਗਮਾ ਜੇਤੂ ਭਾਰਤੀ ਵੇਟਲਿਫਟਰ ਮੀਰਾਬਾਈ ਚਾਨੂ ਨੇ ਸੋਮਵਾਰ ਨੂੰ ਇੱਥੇ ਆਈਡਬਲਯੂਐੱਫ ਵਿਸ਼ਵ ਕੱਪ ਵਿਚ ਔਰਤਾਂ ਦੇ 49 ਕਿਲੋਗ੍ਰਾਮ ਭਾਰ ਵਰਗ ਦੇ ਗਰੁੱਪ ਬੀ ਵਿਚ ਤੀਜਾ ਸਥਾਨ ਹਾਸਲ ਕਰਕੇ ਪੈਰਿਸ ਓਲੰਪਿਕ ਵਿਚ ਆਪਣਾ ਸਥਾਨ ਪੱਕਾ ਕਰ ਲਿਆ। ਸੱਟ ਕਾਰਨ ਛੇ ਮਹੀਨੇ ਬਾਅਦ ਵਾਪਸੀ ਕਰਨ ਵਾਲੀ ਮੀਰਾਬਾਈ ਨੇ ਕੁੱਲ 184 ਕਿਲੋ (81 ਕਿਲੋ ਅਤੇ 103 ਕਿਲੋ) ਭਾਰ ਚੁੱਕਿਆ।

ਇਹ ਪੈਰਿਸ ਓਲੰਪਿਕ ਲਈ ਅੰਤਿਮ ਅਤੇ ਲਾਜ਼ਮੀ ਕੁਆਲੀਫਾਇਰ ਟੂਰਨਾਮੈਂਟ ਹੈ। ਆਪਣੇ ਈਵੈਂਟ ਦੇ ਪੂਰਾ ਹੋਣ ਦੇ ਨਾਲ, ਮੀਰਾਬਾਈ ਨੇ ਪੈਰਿਸ ਓਲੰਪਿਕ ਲਈ ਨਿਰਧਾਰਤ ਮਾਪਦੰਡਾਂ ਨੂੰ ਪੂਰਾ ਕਰ ਲਿਆ ਹੈ ਜਿਸ ਵਿੱਚ ਦੋ ਲਾਜ਼ਮੀ ਟੂਰਨਾਮੈਂਟਾਂ ਵਿੱਚ ਹਿੱਸਾ ਲੈਣਾ ਅਤੇ ਤਿੰਨ ਹੋਰ ਕੁਆਲੀਫਾਇਰ ਸ਼ਾਮਲ ਹਨ। ਭਾਰਤ ਦੀ 2017 ਦੀ ਵਿਸ਼ਵ ਚੈਂਪੀਅਨ ਮੀਰਾਬਾਈ ਇਸ ਸਮੇਂ ਔਰਤਾਂ ਦੀ 49 ਕਿਲੋਗ੍ਰਾਮ ਓਲੰਪਿਕ ਯੋਗਤਾ ਦਰਜਾਬੰਦੀ (OQR) ਵਿੱਚ ਚੀਨ ਦੀ ਜਿਆਨ ਹੁਈਹੁਆ ਤੋਂ ਬਾਅਦ ਦੂਜੇ ਸਥਾਨ 'ਤੇ ਹੈ।

ਯੋਗ ਖਿਡਾਰੀਆਂ ਦੀ ਅਧਿਕਾਰਤ ਘੋਸ਼ਣਾ ਵਿਸ਼ਵ ਕੱਪ ਦੀ ਸਮਾਪਤੀ ਤੋਂ ਬਾਅਦ ਕੀਤੀ ਜਾਵੇਗੀ ਜਦੋਂ OQR ਨੂੰ ਅਪਡੇਟ ਕੀਤਾ ਜਾਵੇਗਾ। ਹਰੇਕ ਭਾਰ ਵਰਗ ਦੇ ਚੋਟੀ ਦੇ 10 ਲਿਫਟਰ ਪੈਰਿਸ ਓਲੰਪਿਕ ਲਈ ਕੁਆਲੀਫਾਈ ਕਰਨਗੇ। ਮੀਰਾਬਾਈ ਨੇ ਆਖਰੀ ਵਾਰ ਪਿਛਲੇ ਸਾਲ ਸਤੰਬਰ 'ਚ ਏਸ਼ੀਆਈ ਖੇਡਾਂ 'ਚ ਹਿੱਸਾ ਲਿਆ ਸੀ ਜਿੱਥੇ ਉਹ ਜ਼ਖਮੀ ਹੋ ਗਈ ਸੀ। ਉਹ ਆਪਣਾ ਸਰਵੋਤਮ ਪ੍ਰਦਰਸ਼ਨ ਨਹੀਂ ਕਰ ਸਕੀ ਪਰ ਪੰਜ ਵਾਰ ਭਾਰ ਚੁੱਕਣ ਵਿੱਚ ਉਸ ਨੇ ਕੋਈ ਗਲਤੀ ਨਹੀਂ ਕੀਤੀ।

ਉਹ ਸਨੈਚ ਅਤੇ ਕਲੀਨ ਐਂਡ ਜਰਕ ਵਿੱਚ ਆਪਣੇ ਸਰਵੋਤਮ ਪ੍ਰਦਰਸ਼ਨ ਦੇ ਨੇੜੇ ਵੀ ਨਹੀਂ ਪਹੁੰਚ ਸਕੀ। 29 ਸਾਲਾ ਖਿਡਾਰਨ ਦਾ ਸਨੈਚ ਵਿੱਚ 88 ਕਿਲੋਗ੍ਰਾਮ ਦਾ ਨਿੱਜੀ ਸਰਵੋਤਮ ਪ੍ਰਦਰਸ਼ਨ ਹੈ, ਜਦੋਂ ਕਿ ਉਸਨੇ 2021 ਵਿੱਚ ਏਸ਼ੀਅਨ ਚੈਂਪੀਅਨਸ਼ਿਪ ਵਿੱਚ ਕਲੀਨ ਐਂਡ ਜਰਕ ਵਿੱਚ 119 ਕਿਲੋਗ੍ਰਾਮ ਦਾ ਉਸ ਸਮੇਂ ਦਾ ਵਿਸ਼ਵ ਰਿਕਾਰਡ ਬਣਾਇਆ ਸੀ ਪਰ ਉਹ ਹੁਣੇ ਹੀ ਸੱਟ ਤੋਂ ਠੀਕ ਹੋਈ ਹੈ ਅਤੇ ਸੰਭਾਵਨਾ ਹੈ ਕਿ ਜੁਲਾਈ ਤੱਕ ਆਪਣੇ ਸਿਖਰ 'ਤੇ ਪਹੁੰਚੇਗੀ। ਪੈਰਿਸ ਓਲੰਪਿਕ 'ਚ ਹਿੱਸਾ ਲੈਣ ਵਾਲੀ ਮੀਰਾਬਾਈ ਇਕਲੌਤੀ ਭਾਰਤੀ ਵੇਟਲਿਫਟਰ ਹੋਵੇਗੀ। ਇਹ ਤੀਜੀ ਵਾਰ ਹੋਵੇਗਾ ਜਦੋਂ ਉਹ ਓਲੰਪਿਕ ਵਿੱਚ ਹਿੱਸਾ ਲਵੇਗੀ।