ਮਿਆਮੀ ਓਪਨ : ਸਬਾਲੇਂਕਾ ਅਤੇ ਰਾਇਬਾਕੀਨਾ ਦੀ ਜੇਤੂ ਸ਼ੁਰੂਆਤ

ਮਿਆਮੀ : ਵਿਸ਼ਵ ਦੀ ਨੰਬਰ ਇੱਕ ਟੈਨਿਸ ਖਿਡਾਰਨ ਆਰਿਆਨਾ ਸਬਾਲੇਂਕਾ ਅਤੇ ਦੂਜੇ ਨੰਬਰ ਦੀ ਐਲੇਨਾ ਰਾਇਬਾਕੀਨਾ ਨੇ ਮਿਆਮੀ ਓਪਨ ਵਿੱਚ ਆਪਣੇ ਅਭਿਆਨ ਦੀ ਸ਼ਾਨਦਾਰ ਸ਼ੁਰੂਆਤ ਕੀਤੀ ਹੈ। ਹਾਰਡ ਰੌਕ ਸਟੇਡੀਅਮ ਵਿੱਚ ਸ਼ੁੱਕਰਵਾਰ ਰਾਤ ਨੂੰ ਖੇਡੇ ਗਏ ਮੁਕਾਬਲਿਆਂ ਵਿੱਚ ਦੋਵਾਂ ਦਿੱਗਜਾਂ ਨੇ ਆਪਣੇ-ਆਪਣੇ ਮੈਚ ਜਿੱਤ ਕੇ ਤੀਜੇ ਦੌਰ ਵਿੱਚ ਪ੍ਰਵੇਸ਼ ਕਰ ਲਿਆ ਹੈ।

ਸਬਾਲੇਂਕਾ ਦੀ ਸਖ਼ਤ ਚੁਣੌਤੀ ਤੋਂ ਬਾਅਦ ਜਿੱਤ 
ਆਰਿਆਨਾ ਸਬਾਲੈਂਕਾ ਨੇ ਅਮਰੀਕਾ ਦੀ ਐਨ ਲੀ ਨੂੰ 1 ਘੰਟਾ 42 ਮਿੰਟ ਤੱਕ ਚੱਲੇ ਮੁਕਾਬਲੇ ਵਿੱਚ 7-6(5), 6-4 ਨਾਲ ਹਰਾਇਆ। ਹਾਲਾਂਕਿ ਸਬਾਲੈਂਕਾ ਨੇ ਮੰਨਿਆ ਕਿ ਉਹ ਆਪਣੇ ਖੇਡ ਦੇ ਪੱਧਰ ਤੋਂ ਪੂਰੀ ਤਰ੍ਹਾਂ ਸੰਤੁਸ਼ਟ ਨਹੀਂ ਸੀ, ਪਰ ਉਸਨੇ ਮੁਸ਼ਕਲ ਹਾਲਾਤ ਵਿੱਚ ਦਿਖਾਈ ਮਾਨਸਿਕ ਮਜ਼ਬੂਤੀ 'ਤੇ ਖੁਸ਼ੀ ਜ਼ਾਹਰ ਕੀਤੀ। ਐਨ ਲੀ ਨੇ ਸਬਾਲੇਂਕਾ ਨੂੰ ਸਖ਼ਤ ਟੱਕਰ ਦਿੱਤੀ ਅਤੇ ਇੱਕ ਸਮੇਂ ਲਗਾਤਾਰ ਤਿੰਨ ਗੇਮਾਂ ਜਿੱਤ ਕੇ ਬਰਾਬਰੀ ਕਰ ਲਈ ਸੀ, ਪਰ ਸਬਾਲੈਂਕਾ ਨੇ ਟਾਈਬ੍ਰੇਕਰ ਵਿੱਚ ਸ਼ਾਨਦਾਰ ਵਾਪਸੀ ਕਰਦਿਆਂ ਜਿੱਤ ਦਰਜ ਕੀਤੀ। ਸਬਾਲੇਂਕਾ ਨੇ ਆਪਣੇ ਵਿਰੋਧੀ ਦੀ ਤਾਰੀਫ਼ ਕਰਦਿਆਂ ਉਸ ਨੂੰ 'ਸੁਪਰ ਐਗਰੈਸਿਵ' ਦੱਸਿਆ। ਹੁਣ ਤੀਜੇ ਦੌਰ ਵਿੱਚ ਸਬਾਲੇਂਕਾ ਦਾ ਮੁਕਾਬਲਾ ਕੈਟੀ ਮੈਕਨੇਲੀ ਨਾਲ ਹੋਵੇਗਾ।

ਰਾਇਬਾਕੀਨਾ ਦੀ 2026 ਦੀ 18ਵੀਂ ਜਿੱਤ 
ਦੂਜੇ ਪਾਸੇ, ਐਲੇਨਾ ਰਾਇਬਾਕੀਨਾ ਨੇ ਯੂਲੀਆ ਪੁਤਿਨਤਸੇਵਾ ਨੂੰ ਸਿੱਧੇ ਸੈੱਟਾਂ ਵਿੱਚ 6-3, 6-3 ਨਾਲ ਮਾਤ ਦਿੱਤੀ। ਰਾਇਬਾਕੀਨਾ ਨੇ 1 ਘੰਟਾ 17 ਮਿੰਟ ਵਿੱਚ ਇਹ ਜਿੱਤ ਪੱਕੀ ਕੀਤੀ। ਮੈਚ ਤੋਂ ਬਾਅਦ ਉਸਨੇ ਕਿਹਾ ਕਿ ਯੂਲੀਆ ਵਿਰੁੱਧ ਮੈਚ ਹਮੇਸ਼ਾ ਮੁਸ਼ਕਲ ਹੁੰਦੇ ਹਨ ਅਤੇ ਉਹ ਆਪਣੀ ਸਰਵਿਸ ਦੇ ਸਹੀ ਸਮੇਂ 'ਤੇ ਕੰਮ ਕਰਨ ਤੋਂ ਬਹੁਤ ਖੁਸ਼ ਹੈ। ਜ਼ਿਕਰਯੋਗ ਹੈ ਕਿ ਸਾਲ 2026 ਵਿੱਚ ਰਾਇਬਾਕੀਨਾ ਦੀ ਇਹ 18ਵੀਂ ਟੂਰ-ਪੱਧਰ ਦੀ ਜਿੱਤ ਹੈ। ਹੁਣ ਉਸਦਾ ਅਗਲਾ ਮੁਕਾਬਲਾ ਯੂਕਰੇਨ ਦੀ ਮਾਰਟਾ ਕੋਸਤਯੂਕ ਨਾਲ ਹੋਵੇਗਾ, ਜਿਸ ਨੂੰ ਉਸਨੇ ਦੋ ਹਫ਼ਤੇ ਪਹਿਲਾਂ ਇੰਡੀਅਨ ਵੇਲਜ਼ ਵਿੱਚ ਵੀ ਹਰਾਇਆ ਸੀ।