ਕੀ ਕੋਹਲੀ ਟੈਸਟ ਕ੍ਰਿਕਟ 'ਚ ਕਰਨ ਜਾ ਰਹੇ ਨੇ ਵਾਪਸੀ? ਦੱਖਣੀ ਅਫਰੀਕਾ ਖਿਲਾਫ ਸੈਂਕੜਾ ਠੋਕਦੇ ਹੀ ਦਿੱਤਾ ਵੱਡਾ ਬਿਆਨ

ਸਪੋਰਟਸ ਡੈਸਕ- ਭਾਰਤੀ ਕ੍ਰਿਕਟ ਦੇ ਮਹਾਨ ਬੱਲੇਬਾਜ਼ ਵਿਰਾਟ ਕੋਹਲੀ ਨੇ ਦੱਖਣੀ ਅਫਰੀਕਾ ਖ਼ਿਲਾਫ਼ ਪਹਿਲੇ ਵਨਡੇ ਮੈਚ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਤੋਂ ਬਾਅਦ ਆਪਣੇ ਭਵਿੱਖ ਦੀਆਂ ਯੋਜਨਾਵਾਂ ਨੂੰ ਲੈ ਕੇ ਵੱਡਾ ਖੁਲਾਸਾ ਕੀਤਾ ਹੈ। ਕੋਹਲੀ ਨੇ ਸਾਫ਼ ਕਰ ਦਿੱਤਾ ਹੈ ਕਿ ਉਹ ਫਿਲਹਾਲ ਟੈਸਟ ਕ੍ਰਿਕਟ ਵਿੱਚ ਵਾਪਸੀ ਨਹੀਂ ਕਰਨ ਜਾ ਰਹੇ ਹਨ। ਇਸ ਬਿਆਨ ਨੇ ਉਨ੍ਹਾਂ ਸਾਰੀਆਂ ਅਟਕਲਾਂ 'ਤੇ ਰੋਕ ਲਗਾ ਦਿੱਤੀ ਹੈ ਜੋ ਹਾਲ ਹੀ ਵਿੱਚ ਉਨ੍ਹਾਂ ਦੀ ਟੈਸਟ ਟੀਮ ਵਿੱਚ ਵਾਪਸੀ ਨੂੰ ਲੈ ਕੇ ਚੱਲ ਰਹੀਆਂ ਸਨ।

ਕੋਹਲੀ ਦਾ 'ਵਨਡੇ ਫੋਕਸ' ਸਟੈਂਡ
ਰਾਂਚੀ ਵਿੱਚ ਖੇਡੇ ਗਏ ਪਹਿਲੇ ਵਨਡੇ ਵਿੱਚ ਧਮਾਕੇਦਾਰ ਪ੍ਰਦਰਸ਼ਨ ਕਰਨ ਤੋਂ ਬਾਅਦ ਅਤੇ 'ਮੈਨ ਆਫ਼ ਦਾ ਮੈਚ' ਬਣਨ ਤੋਂ ਬਾਅਦ, ਵਿਰਾਟ ਕੋਹਲੀ ਨੇ ਸਪੱਸ਼ਟ ਕੀਤਾ ਕਿ ਉਹ ਹੁਣ ਸਿਰਫ਼ ਵਨਡੇ ਫਾਰਮੈਟ 'ਤੇ ਹੀ ਧਿਆਨ ਦੇ ਰਹੇ ਹਨ।  ਕੋਹਲੀ ਨੇ ਕਿਹਾ: "ਬਸ ਅਜਿਹੇ ਹੀ ਰਹਿਣ ਵਾਲਾ ਹੈ, ਮੈਂ ਸਿਰਫ਼ ਇੱਕ ਹੀ ਫਾਰਮੈਟ ਖੇਡ ਰਿਹਾ ਹਾਂ"। 37 ਸਾਲ ਦੀ ਉਮਰ ਵਿੱਚ ਕੋਹਲੀ ਦਾ ਮੰਨਣਾ ਹੈ ਕਿ ਉਨ੍ਹਾਂ ਲਈ ਇੱਕ ਤੋਂ ਵੱਧ ਫਾਰਮੈਟ ਖੇਡਣਾ ਹੁਣ ਸੰਭਵ ਨਹੀਂ ਹੈ, ਕਿਉਂਕਿ ਉਨ੍ਹਾਂ ਨੂੰ ਆਪਣੇ ਸਰੀਰ ਅਤੇ ਦਿਮਾਗ ਦੀਆਂ ਜ਼ਰੂਰਤਾਂ ਨੂੰ ਸਮਝਣਾ ਪੈਂਦਾ ਹੈ।  ਉਨ੍ਹਾਂ ਨੇ ਦੱਸਿਆ ਕਿ ਮੈਚ ਤੋਂ ਇੱਕ ਦਿਨ ਪਹਿਲਾਂ ਉਨ੍ਹਾਂ ਨੇ ਪੂਰਾ ਆਰਾਮ ਕੀਤਾ ਤਾਂ ਜੋ ਮੈਚ ਲਈ ਊਰਜਾ ਬਰਕਰਾਰ ਰਹੇ।

ਧਮਾਕੇਦਾਰ ਸੈਂਕੜਾ ਅਤੇ ਜਿੱਤ
ਵਿਰਾਟ ਕੋਹਲੀ ਨੇ ਦੱਖਣੀ ਅਫਰੀਕਾ ਖ਼ਿਲਾਫ਼ ਪਹਿਲੇ ਵਨਡੇ ਵਿੱਚ 102 ਗੇਂਦਾਂ ਵਿੱਚ 135 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡਦੇ ਹੋਏ ਆਪਣਾ 52ਵਾਂ ਵਨਡੇ ਸੈਂਕੜਾ ਜੜ੍ਹਿਆ। ਕੋਹਲੀ ਦੀ ਇਸ ਪਾਰੀ ਨੇ ਸਾਬਤ ਕਰ ਦਿੱਤਾ ਕਿ ਉਹ ਅਜੇ ਵੀ ਸਫੇਦ ਗੇਂਦ ਦੇ ਬੇਤਾਜ ਬਾਦਸ਼ਾਹ ਹਨ। ਇਸ ਸੈਂਕੜੇ ਦੀ ਮਦਦ ਨਾਲ ਭਾਰਤ ਇੱਕ ਮਜ਼ਬੂਤ ​​ਸਥਿਤੀ 'ਤੇ ਪਹੁੰਚਿਆ ਅਤੇ ਟੀਮ ਨੂੰ ਦੱਖਣੀ ਅਫਰੀਕਾ ਖ਼ਿਲਾਫ਼ 17 ਦੌੜਾਂ ਨਾਲ ਆਸਾਨ ਜਿੱਤ ਮਿਲੀ।

ਕੋਹਲੀ ਨੇ ਦੱਸਿਆ ਕਿ ਉਨ੍ਹਾਂ ਦੀ ਸਭ ਤੋਂ ਵੱਡੀ ਤਿਆਰੀ ਮਾਨਸਿਕ ਹੁੰਦੀ ਹੈ ਅਤੇ ਉਹ ਪ੍ਰੈਕਟਿਸ ਨਾਲੋਂ ਜ਼ਿਆਦਾ ਆਪਣੀ ਮਾਨਸਿਕ ਤਾਕਤ ਅਤੇ ਜਨੂੰਨ 'ਤੇ ਭਰੋਸਾ ਕਰਦੇ ਹਨ। ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਪਿੱਚ ਸ਼ੁਰੂਆਤ ਵਿੱਚ ਆਸਾਨ ਲੱਗ ਰਹੀ ਸੀ, ਪਰ ਬਾਅਦ ਵਿੱਚ ਸਲੋਅ ਹੋ ਗਈ, ਜਿੱਥੇ ਉਨ੍ਹਾਂ ਦਾ ਅਨੁਭਵ ਅਤੇ ਸ਼ਾਟ ਚੋਣ ਕੰਮ ਆਏ।