ਭਾਰਤੀ ਧਾਕੜ NZ ਨਾਲ ਪੂਰੀ ਵਨਡੇ ਸੀਰੀਜ਼ ''ਚੋਂ ਹੋਇਆ ਬਾਹਰ, Replacement ਦਾ ਵੀ ਹੋਇਆ ਐਲਾਨ

ਵਡੋਦਰਾ : ਭਾਰਤ ਅਤੇ ਨਿਊਜ਼ੀਲੈਂਡ ਵਿਚਕਾਰ ਅੱਜ ਤੋਂ ਸ਼ੁਰੂ ਹੋਣ ਵਾਲੀ ਤਿੰਨ ਮੈਚਾਂ ਦੀ ਵਨਡੇ ਸੀਰੀਜ਼ ਤੋਂ ਪਹਿਲਾਂ ਭਾਰਤੀ ਟੀਮ ਨੂੰ ਵੱਡਾ ਝਟਕਾ ਲੱਗਾ ਹੈ। ਸਟਾਰ ਵਿਕਟਕੀਪਰ ਬੱਲੇਬਾਜ਼ ਰਿਸ਼ਭ ਪੰਤ ਸੱਟ ਕਾਰਨ ਪੂਰੀ ਸੀਰੀਜ਼ ਤੋਂ ਬਾਹਰ ਹੋ ਗਏ ਹਨ। ਉਨ੍ਹਾਂ ਦੀ ਜਗ੍ਹਾ ਚੋਣ ਕਮੇਟੀ ਨੇ ਸ਼ਾਨਦਾਰ ਫਾਰਮ ਵਿੱਚ ਚੱਲ ਰਹੇ ਧਰੁਵ ਜੁਰੇਲ ਨੂੰ ਟੀਮ ਵਿੱਚ ਸ਼ਾਮਲ ਕੀਤਾ ਹੈ। ਜੁਰੇਲ ਪਹਿਲਾਂ ਹੀ ਵਡੋਦਰਾ ਪਹੁੰਚ ਕੇ ਟੀਮ ਨਾਲ ਜੁੜ ਚੁੱਕੇ ਹਨ ਅਤੇ ਉਹ ਸੀਰੀਜ਼ ਵਿੱਚ ਰਿਜ਼ਰਵ ਵਿਕਟਕੀਪਰ ਦੀ ਭੂਮਿਕਾ ਨਿਭਾਉਣਗੇ।

ਅਭਿਆਸ ਦੌਰਾਨ ਲੱਗੀ ਸੱਟ ਬੀਸੀਸੀਆਈ (BCCI) ਅਨੁਸਾਰ, ਸ਼ਨੀਵਾਰ ਦੁਪਹਿਰ ਨੂੰ ਵਡੋਦਰਾ ਦੇ ਬੀਸੀਏ (BCA) ਸਟੇਡੀਅਮ ਵਿੱਚ ਅਭਿਆਸ ਸੈਸ਼ਨ ਦੌਰਾਨ ਬੱਲੇਬਾਜ਼ੀ ਕਰਦੇ ਸਮੇਂ ਰਿਸ਼ਭ ਪੰਤ ਦੇ ਪੇਟ ਦੇ ਸੱਜੇ ਪਾਸੇ ਮਾਸਪੇਸ਼ੀਆਂ ਵਿੱਚ ਅਚਾਨਕ ਤੇਜ਼ ਦਰਦ ਮਹਿਸੂਸ ਹੋਇਆ। ਤੁਰੰਤ ਕੀਤੇ ਗਏ ਐਮਆਰਆਈ (MRI) ਸਕੈਨ ਅਤੇ ਮੈਡੀਕਲ ਟੀਮ ਦੀ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਪੰਤ ਨੂੰ 'ਸਾਈਡ ਸਟ੍ਰੇਨ' (ਓਬਲੀਕ ਮਸਲ ਟੀਅਰ) ਹੋਇਆ ਹੈ। ਇਸ ਗੰਭੀਰ ਸੱਟ ਕਾਰਨ ਉਨ੍ਹਾਂ ਨੂੰ ਡਾਕਟਰੀ ਸਲਾਹ 'ਤੇ ਸੀਰੀਜ਼ ਤੋਂ ਆਰਾਮ ਦਿੱਤਾ ਗਿਆ ਹੈ।

ਧਰੁਵ ਜੁਰੇਲ ਦੀ ਸ਼ਾਨਦਾਰ ਫਾਰਮ ਰਿਸ਼ਭ ਪੰਤ ਦੀ ਜਗ੍ਹਾ ਲੈਣ ਵਾਲੇ ਧਰੁਵ ਜੁਰੇਲ ਇਸ ਸਮੇਂ ਆਪਣੀ ਜ਼ਿੰਦਗੀ ਦੀ ਸਰਵੋਤਮ ਫਾਰਮ ਵਿੱਚ ਹਨ। ਵਿਜੇ ਹਜ਼ਾਰੇ ਟਰਾਫੀ ਵਿੱਚ ਉਨ੍ਹਾਂ ਦੇ ਬੱਲੇ ਨੇ ਖੂਬ ਦੌੜਾਂ ਉਗਲੀਆਂ ਹਨ। ਅੰਕੜਿਆਂ ਮੁਤਾਬਕ, ਜੁਰੇਲ ਨੇ ਆਪਣੀਆਂ ਪਿਛਲੀਆਂ ਸੱਤ ਪਾਰੀਆਂ ਵਿੱਚ ਛੇ ਵਾਰ 50 ਤੋਂ ਵੱਧ ਦੌੜਾਂ ਬਣਾਈਆਂ ਹਨ, ਜਿਨ੍ਹਾਂ ਵਿੱਚ ਦੋ ਸ਼ਾਨਦਾਰ ਸੈਂਕੜੇ ਵੀ ਸ਼ਾਮਲ ਹਨ। ਉਨ੍ਹਾਂ ਦੇ ਇਸੇ ਪ੍ਰਦਰਸ਼ਨ ਨੂੰ ਦੇਖਦੇ ਹੋਏ ਚੋਣਕਾਰਾਂ ਨੇ ਉਨ੍ਹਾਂ 'ਤੇ ਭਰੋਸਾ ਜਤਾਇਆ ਹੈ।

ਇਹ ਸੀਰੀਜ਼ ਕਪਤਾਨ ਸ਼ੁਭਮਨ ਗਿੱਲ ਦੀ ਅਗਵਾਈ ਵਿੱਚ 2027 ਦੇ ਵਿਸ਼ਵ ਕੱਪ ਲਈ ਟੀਮ ਦੀ ਤਿਆਰੀ ਦਾ ਅਹਿਮ ਹਿੱਸਾ ਹੈ। ਭਾਰਤੀ ਟੀਮ ਵਿੱਚ ਰੋਹਿਤ ਸ਼ਰਮਾ, ਵਿਰਾਟ ਕੋਹਲੀ, ਅਤੇ ਕੇ.ਐਲ. ਰਾਹੁਲ (ਮੁੱਖ ਵਿਕਟਕੀਪਰ) ਵਰਗੇ ਦਿੱਗਜ ਸ਼ਾਮਲ ਹਨ। ਪੰਤ ਦੀ ਗੈਰ-ਮੌਜੂਦਗੀ ਵਿੱਚ ਹੁਣ ਕੇ.ਐਲ. ਰਾਹੁਲ 'ਤੇ ਵਿਕਟਕੀਪਿੰਗ ਦੀ ਅਹਿਮ ਜ਼ਿੰਮੇਵਾਰੀ ਰਹੇਗੀ।