AFC ਅੰਡਰ-20 ਮਹਿਲਾ ਏਸ਼ੀਆਈ ਕੱਪ ਲਈ ਭਾਰਤੀ ਟੀਮ ਦਾ ਐਲਾਨ

ਸਪੋਰਟਸ ਡੈਸਕ : ਭਾਰਤੀ ਅੰਡਰ-20 ਮਹਿਲਾ ਟੀਮ ਦੇ ਮੁੱਖ ਕੋਚ ਜੋਆਕਿਮ ਐਲੇਕਜੈਂਡਰਸਨ ਨੇ ਥਾਈਲੈਂਡ ਵਿੱਚ ਹੋਣ ਵਾਲੇ AFC ਅੰਡਰ-20 ਮਹਿਲਾ ਏਸ਼ੀਆਈ ਕੱਪ 2026 ਲਈ 'ਯੰਗ ਟਾਈਗਰੈੱਸ' ਦੀ 23 ਮੈਂਬਰੀ ਟੀਮ ਦਾ ਐਲਾਨ ਕਰ ਦਿੱਤਾ ਹੈ। ਭਾਰਤ ਲਈ ਇਹ ਇੱਕ ਇਤਿਹਾਸਕ ਮੌਕਾ ਹੈ ਕਿਉਂਕਿ ਟੀਮ ਨੇ ਪੂਰੇ 20 ਸਾਲਾਂ ਦੇ ਵਕਫ਼ੇ ਤੋਂ ਬਾਅਦ ਇਸ ਵੱਕਾਰੀ ਟੂਰਨਾਮੈਂਟ ਲਈ ਕੁਆਲੀਫਾਈ ਕੀਤਾ ਹੈ।

2 ਅਪ੍ਰੈਲ ਨੂੰ ਜਾਪਾਨ ਵਿਰੁੱਧ ਪਹਿਲਾ ਮੁਕਾਬਲਾ 
ਭਾਰਤੀ ਟੀਮ ਆਪਣੇ ਅਭਿਆਨ ਦੀ ਸ਼ੁਰੂਆਤ 2 ਅਪ੍ਰੈਲ ਨੂੰ ਥੰਮਾਸੇਟ ਸਟੇਡੀਅਮ ਵਿੱਚ ਮਜ਼ਬੂਤ ਜਾਪਾਨ ਵਿਰੁੱਧ ਕਰੇਗੀ। ਇਸ ਤੋਂ ਬਾਅਦ ਭਾਰਤ ਦਾ ਮੁਕਾਬਲਾ 5 ਅਪ੍ਰੈਲ ਨੂੰ ਆਸਟ੍ਰੇਲੀਆ ਨਾਲ ਅਤੇ 8 ਅਪ੍ਰੈਲ ਨੂੰ ਚੀਨੀ ਤਾਈਪੇ ਨਾਲ ਪਾਥੁਮ ਥਾਨੀ ਸਟੇਡੀਅਮ ਵਿੱਚ ਹੋਵੇਗਾ । ਗਰੁੱਪ ਦੀਆਂ ਚੋਟੀ ਦੀਆਂ ਦੋ ਟੀਮਾਂ ਅਤੇ ਤਿੰਨਾਂ ਗਰੁੱਪਾਂ ਵਿੱਚੋਂ ਤੀਜੇ ਸਥਾਨ 'ਤੇ ਰਹਿਣ ਵਾਲੀਆਂ ਦੋ ਸਰਵੋਤਮ ਟੀਮਾਂ ਕੁਆਰਟਰ ਫਾਈਨਲ ਵਿੱਚ ਜਗ੍ਹਾ ਬਣਾਉਣਗੀਆਂ। ਖਾਸ ਗੱਲ ਇਹ ਹੈ ਕਿ ਕੁਆਰਟਰ ਫਾਈਨਲ ਜਿੱਤਣ ਵਾਲੀਆਂ ਚਾਰ ਟੀਮਾਂ ਫੀਫਾ ਅੰਡਰ-20 ਮਹਿਲਾ ਵਿਸ਼ਵ ਕੱਪ ਪੋਲੈਂਡ 2026 ਲਈ ਸਿੱਧਾ ਕੁਆਲੀਫਾਈ ਕਰਨਗੀਆਂ।

ਤਿਆਰੀਆਂ ਲਈ ਬੈਂਕਾਕ ਪਹੁੰਚੀ ਟੀਮ 
ਭਾਰਤੀ ਟੀਮ 20 ਮਾਰਚ ਨੂੰ ਹੀ ਬੈਂਕਾਕ ਪਹੁੰਚ ਗਈ ਸੀ ਤਾਂ ਜੋ ਉੱਥੋਂ ਦੇ ਸਥਾਨਕ ਮਾਹੌਲ ਵਿੱਚ ਢਲ ਸਕੇ। ਪਹਿਲਾਂ ਦਲ ਵਿੱਚ 24 ਖਿਡਾਰਨਾਂ ਸ਼ਾਮਲ ਸਨ, ਪਰ ਅੰਤਿਮ ਚੋਣ ਦੌਰਾਨ ਡਿਫੈਂਡਰ ਅਲਕਾ ਇੰਦਵਾਰ ਨੂੰ ਟੀਮ ਵਿੱਚੋਂ ਬਾਹਰ ਕਰ ਦਿੱਤਾ ਗਿਆ ਹੈ।

ਚੁਣੀ ਗਈ 23 ਮੈਂਬਰੀ ਭਾਰਤੀ ਟੀਮ:

ਗੋਲਕੀਪਰ: ਮੋਨਾਲੀਸ਼ਾ ਦੇਵੀ ਮੋਇਰੰਗਥੇਮ, ਨੰਦਿਨੀ, ਰਿਬਾਂਸੀ ਜਮੂ।

ਡਿਫੈਂਡਰ: ਸਿੰਡੀ ਰੇਮਰੂਆਤਪੁਈ ਕੋਲਨੀ, ਨਿਸ਼ੀਮਾ ਕੁਮਾਰੀ, ਰੇਮੀ ਥੋਕਚੋਮ, ਰੁਚੀ ਯਾਦਵ, ਸਹੇਨਾ ਟੀਐਚ, ਸ਼ੁਭਾਂਗੀ ਸਿੰਘ, ਥੋਇਬੀਸਾਨਾ ਚਾਨੂ ਤੋਇਜਮ।

ਮਿਡਫੀਲਡਰ: ਅੰਜੂ ਚਾਨੂ ਕਾਏਨਪਾਇਬਮ, ਅਰੀਨਾ ਦੇਵੀ ਨਾਮੀਰਾਕਪਮ, ਭੂਮਿਕਾ ਦੇਵੀ ਖੁਮੁਕਚਮ, ਮੋਨੀਸ਼ਾ ਸਿੰਘਾ, ਨੇਹਾ, ਪੂਜਾ, ਸ਼ਰੂਤੀ ਕੁਮਾਰੀ।

ਫਾਰਵਰਡ: ਬਬੀਤਾ ਕੁਮਾਰੀ, ਦੀਪਿਕਾ ਪਾਲ, ਲਿੰਗਦੇਇਕਿਮ, ਸ਼ਿਲਜੀ ਸ਼ਾਜੀ, ਸਿਬਾਨੀ ਦੇਵੀ ਨੋਂਗਮੇਇਕਾਪਮ, ਸੁਲੰਜਨਾ ਰਾਉਲ।