ਵਿੰਟਰ ਓਲੰਪਿਕ ''ਚ ਮਸ਼ਾਲ ਫੜ ਕੇ ਮਾਣ ਮਹਿਸੂਸ ਕਰ ਰਿਹਾ ਹਾਂ : ਬਿੰਦਰਾ

ਨਵੀਂ ਦਿੱਲੀ/ਇਟਲੀ: ਭਾਰਤ ਦੇ ਪਹਿਲੇ ਵਿਅਕਤੀਗਤ ਓਲੰਪਿਕ ਸੋਨ ਤਗਮਾ ਜੇਤੂ ਨਿਸ਼ਾਨੇਬਾਜ਼ ਅਭਿਨਵ ਬਿੰਦਰਾ ਨੇ ਇੱਕ ਵਾਰ ਫਿਰ ਅੰਤਰਰਾਸ਼ਟਰੀ ਮੰਚ 'ਤੇ ਦੇਸ਼ ਦਾ ਮਾਣ ਵਧਾਇਆ ਹੈ। ਇਟਲੀ ਵਿੱਚ ਸ਼ੁਰੂ ਹੋਣ ਵਾਲੀਆਂ ਮਿਲਾਨ-ਕੋਰਟੀਨਾ 2026 ਵਿੰਟਰ ਓਲੰਪਿਕਸ (ਸੀਤਕਾਲੀਨ ਓਲੰਪਿਕ) ਤੋਂ ਪਹਿਲਾਂ ਬਿੰਦਰਾ ਨੇ ਓਲੰਪਿਕ ਮਸ਼ਾਲ ਫੜ ਕੇ ਇਸ ਵੱਕਾਰੀ ਯਾਤਰਾ ਵਿੱਚ ਹਿੱਸਾ ਲਿਆ। 

ਬਿੰਦਰਾ ਨੇ ਮੀਂਹ ਦੇ ਵਿਚਕਾਰ ਮਸ਼ਾਲ ਫੜ ਕੇ ਆਪਣੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' (X) 'ਤੇ ਸਾਂਝੀਆਂ ਕੀਤੀਆਂ ਅਤੇ ਇਸ ਪਲ ਨੂੰ ਆਪਣੇ ਲਈ ਬਹੁਤ ਮਾਣਮੱਤਾ ਦੱਸਿਆ। ਅਭਿਨਵ ਬਿੰਦਰਾ, ਜਿਨ੍ਹਾਂ ਨੇ 2008 ਦੀਆਂ ਬੀਜਿੰਗ ਓਲੰਪਿਕ ਖੇਡਾਂ ਵਿੱਚ 10 ਮੀਟਰ ਏਅਰ ਰਾਈਫਲ ਵਿੱਚ ਸੋਨ ਤਗਮਾ ਜਿੱਤਿਆ ਸੀ, ਨੂੰ ਪਿਛਲੇ ਸਾਲ ਅਕਤੂਬਰ ਵਿੱਚ ਇਸ ਮਸ਼ਾਲ ਵਾਹਕ ਵਜੋਂ ਚੁਣਿਆ ਗਿਆ ਸੀ। ਉਨ੍ਹਾਂ ਕਿਹਾ ਕਿ ਓਲੰਪਿਕ ਮਸ਼ਾਲ ਏਕਤਾ, ਦ੍ਰਿੜਤਾ ਅਤੇ ਸਾਂਝੀ ਮਨੁੱਖੀ ਇੱਛਾ ਦਾ ਪ੍ਰਤੀਕ ਹੈ। ਦੱਸਣਯੋਗ ਹੈ ਕਿ ਇਹ ਵਿੰਟਰ ਓਲੰਪਿਕ ਖੇਡਾਂ 22 ਫਰਵਰੀ ਤੱਕ ਚੱਲਣਗੀਆਂ, ਜਿਸ ਵਿੱਚ 16 ਵੱਖ-ਵੱਖ ਖੇਡਾਂ ਵਿੱਚ 116 ਤਗਮੇ ਦਾਅ 'ਤੇ ਲੱਗੇ ਹੋਏ ਹਨ।