ਆਰਿਆਨਾ ਸਬਾਲੇਂਕਾ ਅਤੇ ਜੈਸਿਕਾ ਪੇਗੁਲਾ ਵੁਹਾਨ ਓਪਨ ਕੁਆਰਟਰ ਫਾਈਨਲ ਵਿੱਚ ਪੁੱਜੀਆਂ

ਵੁਹਾਨ (ਚੀਨ)- ਯੂਐਸ ਓਪਨ ਚੈਂਪੀਅਨ ਆਰਿਆਨਾ ਸਬਾਲੇਂਕਾ ਅਤੇ ਜੈਸਿਕਾ ਪੇਗੁਲਾ ਵੀਰਵਾਰ ਨੂੰ ਇੱਥੇ ਵੁਹਾਨ ਓਪਨ ਟੈਨਿਸ ਟੂਰਨਾਮੈਂਟ ਦੇ ਕੁਆਰਟਰ ਫਾਈਨਲ ਵਿੱਚ ਪਹੁੰਚ ਗਈਆਂ। ਚੋਟੀ ਦੀ ਰੈਂਕਿੰਗ ਵਾਲੀ ਸਬਾਲੇਂਕਾ ਨੇ ਵੁਹਾਨ ਓਪਨ ਵਿੱਚ ਆਪਣੀ ਜਿੱਤ ਦਾ ਸਿਲਸਿਲਾ ਜਾਰੀ ਰੱਖਿਆ, ਲਿਉਡਮਿਲਾ ਸਮਸੋਨੋਵਾ ਨੂੰ 6-3, 6-3 ਨਾਲ ਹਰਾ ਕੇ ਆਪਣੀ 19ਵੀਂ ਜਿੱਤ ਦਰਜ ਕੀਤੀ। 

ਸਬਾਲੇਂਕਾ ਨੇ 2018, 2019 ਅਤੇ 2024 ਵਿੱਚ ਵੁਹਾਨ ਓਪਨ ਜਿੱਤਿਆ ਸੀ। ਇਸ ਤੋਂ ਪਹਿਲਾਂ, ਜੈਸਿਕਾ ਪੇਗੁਲਾ ਨੇ ਤੀਜੇ ਸੈੱਟ ਵਿੱਚ ਸ਼ੁਰੂਆਤੀ ਸਰਵਿਸ ਬ੍ਰੇਕ ਤੋਂ ਉਭਰ ਕੇ ਏਕਾਟੇਰੀਨਾ ਅਲੈਗਜ਼ੈਂਡਰੋਵਾ ਨੂੰ 7-5, 3-6, 6-3 ਨਾਲ ਹਰਾਇਆ। ਪਿਛਲੇ ਹਫ਼ਤੇ ਚਾਈਨਾ ਓਪਨ ਸੈਮੀਫਾਈਨਲ ਵਿੱਚ ਹਾਰਨ ਵਾਲੀ ਪੇਗੁਲਾ ਨੇ ਫੈਸਲਾਕੁੰਨ ਸੈੱਟ ਵਿੱਚ ਸਕੋਰ 2-2 ਨਾਲ ਬਰਾਬਰ ਕੀਤਾ ਅਤੇ ਫਿਰ ਆਖਰੀ ਪੰਜ ਵਿੱਚੋਂ ਚਾਰ ਗੇਮਾਂ ਜਿੱਤ ਕੇ ਕੁਆਰਟਰ ਫਾਈਨਲ ਵਿੱਚ ਆਪਣੀ ਜਗ੍ਹਾ ਪੱਕੀ ਕੀਤੀ।