ਅਲਕਾਰਾਜ਼ ਅਤੇ ਹੋਲਗਰ ਰੂਨ ਫ੍ਰੈਂਚ ਓਪਨ ਦੇ ਚੌਥੇ ਦੌਰ ਵਿੱਚ ਪੁੱਜੇ

ਪੈਰਿਸ- ਮੌਜੂਦਾ ਚੈਂਪੀਅਨ ਕਾਰਲੋਸ ਅਲਕਾਰਾਜ਼ ਨੇ ਚਾਰ ਸੈੱਟਾਂ ਦੇ ਔਖੇ ਮੈਚ ਵਿੱਚ ਜਿੱਤ ਦਰਜ ਕਰਕੇ ਹੋਲਗਰ ਰੂਨ ਦੇ ਨਾਲ ਫ੍ਰੈਂਚ ਓਪਨ ਟੈਨਿਸ ਟੂਰਨਾਮੈਂਟ ਦੇ ਚੌਥੇ ਦੌਰ ਵਿੱਚ ਪ੍ਰਵੇਸ਼ ਕੀਤਾ। ਅਲਕਾਰਾਜ਼ ਨੇ ਰਾਤ ਦੇ ਸੈਸ਼ਨ ਵਿੱਚ ਖੇਡੇ ਗਏ ਮੈਚ ਵਿੱਚ 33 ਸਾਲਾ ਬੋਸਨੀਆਈ ਖਿਡਾਰੀ ਦਾਮਿਰ ਡਜ਼ੁਮਹੁਰ ਨੂੰ 6-1, 6-3, 4-6, 6-4 ਨਾਲ ਹਰਾਇਆ। ਇਹ ਪਹਿਲਾ ਮੌਕਾ ਸੀ ਜਦੋਂ ਸਪੇਨ ਦਾ ਦੂਜਾ ਦਰਜਾ ਪ੍ਰਾਪਤ ਅਲਕਾਰਾਜ਼ ਬੋਸਨੀਆਈ ਖਿਡਾਰੀ ਵਿਰੁੱਧ ਖੇਡ ਰਿਹਾ ਸੀ। ਉਸਨੇ ਮੰਨਿਆ ਕਿ ਇਹ ਮੈਚ ਜਿੱਤਣਾ ਆਸਾਨ ਨਹੀਂ ਸੀ। 

ਅਲਕਾਰਾਜ਼ ਨੇ ਕਿਹਾ, "ਅੱਜ ਮੈਨੂੰ ਬਹੁਤ ਮੁਸ਼ਕਲ ਆਈ। ਮੈਂ ਪਹਿਲੇ ਦੋ ਸੈੱਟਾਂ ਵਿੱਚ ਕੰਟਰੋਲ ਬਣਾਈ ਰੱਖਿਆ ਪਰ ਇਸ ਤੋਂ ਬਾਅਦ ਉਸਨੇ ਹਮਲਾਵਰ ਢੰਗ ਨਾਲ ਖੇਡਣਾ ਸ਼ੁਰੂ ਕਰ ਦਿੱਤਾ। ਇਹ ਮੇਰੇ ਲਈ ਸੱਚਮੁੱਚ ਮੁਸ਼ਕਲ ਸੀ।" ਉਹ ਚੌਥੇ ਦੌਰ ਵਿੱਚ ਬੇਨ ਸ਼ੈਲਟਨ ਦਾ ਸਾਹਮਣਾ ਕਰੇਗਾ। 

ਇਸ ਦੌਰਾਨ, ਡੈਨਮਾਰਕ ਦੇ 10ਵਾਂ ਦਰਜਾ ਪ੍ਰਾਪਤ ਖਿਡਾਰੀ ਰੂਨ ਨੇ ਪੰਜ ਸੈੱਟਾਂ ਦੇ ਮੈਚ ਵਿੱਚ ਫਰਾਂਸ ਦੇ ਕਵਾਂਟਿਨ ਹੈਲਿਸ ਨੂੰ 4-6, 6-2, 5-7, 7-5, 6-2 ਨਾਲ ਹਰਾ ਕੇ ਚੌਥੇ ਦੌਰ ਵਿੱਚ ਪ੍ਰਵੇਸ਼ ਕੀਤਾ। ਇਸ ਦੌਰਾਨ, ਰੂਨ ਨੇ ਇੱਕ ਦਰਸ਼ਕ ਨੂੰ ਬਾਹਰ ਕੱਢਣ ਦੀ ਬੇਨਤੀ ਵੀ ਕੀਤੀ ਜੋ ਉਸ 'ਤੇ ਲਗਾਤਾਰ ਰੌਲਾ ਪਾ ਰਿਹਾ ਸੀ। ਚੌਥੇ ਦੌਰ ਵਿੱਚ, ਉਸਦਾ ਸਾਹਮਣਾ ਇਟਲੀ ਦੇ ਅੱਠਵਾਂ ਦਰਜਾ ਪ੍ਰਾਪਤ ਲੋਰੇਂਜੋ ਮੁਸੇਟੀ ਨਾਲ ਹੋਵੇਗਾ।