ਅਭਿਗਿਆਨ ਕੁੰਡੂ, ਦੀਪੇਸ਼ ਦੇਵੇਂਦਰ ਨੇ ਭਾਰਤ ਨੂੰ ਮਲੇਸ਼ੀਆ ’ਤੇ 315 ਦੌੜਾਂ ਨਾਲ ਜਿੱਤ ਦਿਵਾਈ

ਦੁਬਈ- ਅਭਿਗਿਆਨ ਕੁੰਡੂ ਦੀਆਂ ਰਿਕਾਰਡ ਅਜੇਤੂ 209 ਦੌੜਾਂ ਅਤੇ ਦੀਪੇਸ਼ ਦੇਵੇਂਦਰ ਦੀਆਂ 5 ਵਿਕਟਾਂ ਦੀ ਮਦਦ ਨਾਲ ਭਾਰਤ ਨੇ ਅੰਡਰ-19 ਏਸ਼ੀਆ ਕੱਪ ਮੈਚ ’ਚ ਮੰਗਲਵਾਰ ਨੂੰ ਮਲੇਸ਼ੀਆ ਨੂੰ 315 ਦੌੜਾਂ ਨਾਲ ਹਰਾਇਆ। ਇਸ ਦੌੜਾਂ ਦੇ ਅੰਤਰ ਨਾਲ ਯੁਵਾ ਵਨਡੇ ’ਚ ਭਾਰਤ ਦੀ ਦੂਸਰੀ ਸਭ ਤੋਂ ਵੱਡੀ ਜਿੱਤ ਹੈ।

ਇਸ ਤੋਂ ਪਹਿਲਾਂ 2022 ਵਿਚ ਭਾਰਤ ਨੇ ਯੁਗਾਂਡਾ ਨੂੰ 322 ਦੌੜਾਂ ਨਾਲ ਹਰਾਇਆ ਸੀ। ਕੁੰਡੂ ਯੁਵਾ ਵਨਡੇ ’ਚ ਦੋਹੜਾ ਸੈਂਕੜਾ ਲਾਉਣ ਵਾਲਾ ਪਹਿਲਾ ਭਾਰਤੀ ਕ੍ਰਿਕਟਰ ਬਣਿਆ। ਉਸ ਨੇ ਆਪਣੀ ਪਾਰੀ ’ਚ 125 ਗੇਂਦਾਂ ਦਾ ਸਾਹਮਣਾ ਕਰ ਕੇ 17 ਚੌਕੇ ਅਤੇ 9 ਛੱਕੇ ਲਾਏ, ਜਿਸ ਦੀ ਮਦਦ ਨਾਲ ਭਾਰਤ ਨੇ 7 ਵਿਕਟਾਂ ’ਤੇ 408 ਦੌੜਾਂ ਜੋੜੀਆਂ। ਜਵਾਬ ’ਚ ਸੱਜੇ ਹੱਥ ਦੇ ਮੱਧਮ ਤੇਜ਼ ਗੇਂਦਬਾਜ਼ ਦੇਵੇਂਦਰ ਨੇ 22 ਦੌੜਾਂ ਦੇ ਕੇ 5 ਵਿਕਟਾਂ ਲੈਂਦਿਆਂ ਮਲੇਸ਼ੀਆਈ ਬੱਲੇਬਾਜ਼ੀ ਦੀ ਕਮਰ ਤੋੜ ਦਿੱਤੀ। ਮਲੇਸ਼ੀਆ ਦੀ ਟੀਮ 32.1 ਓਵਰ ’ਚ 93 ਦੌੜਾਂ ’ਤੇ ਆਊਟ ਹੋ ਗਈ।

ਭਾਰਤ ਲਈ ਵੈਭਵ ਸੂਰਿਯਾਵੰਸ਼ੀ ਨੇ 26 ਗੇਂਦਾਂ ’ਚ 50 ਦੌੜਾਂ ਬਣਾਈਆਂ। ਉਸ ਨੇ ਯੂ. ਏ. ਈ. ਖਿਲਾਫ ਇਸੇ ਟੂਰਨਾਮੈਂਟ ’ਚ 171 ਦੌੜਾਂ ਦੀ ਪਾਰੀ ਖੇਡੀ ਸੀ। ਚੌਥੇ ਨੰਬਰ ’ਤੇ ਉਤਰੇ ਵੇਦਾਂਤ ਤ੍ਰਿਵੇਦੀ ਅਤੇ ਕੁੰਡੂ ਨੇ ਚੌਥੀ ਵਿਕਟ ਲਈ 209 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਕੁੰਡੂ ਨੇ ਆਪਣੀ ਪਾਰੀ ’ਚ 55 ਸਿੰਗਲ ਕੱਢੇ।

17 ਸਾਲਾ ਕੁੰਡੂ ਦੱਖਣੀ ਅਫਰੀਕਾ ਦੇ ਜੋਰਿਚ ਵਾਨ ਸ਼ਾਕਵਿਕ ਤੋਂ ਬਾਅਦ ਅੰਡਰ-19 ਵਨਡੇ ’ਚ ਦੋਹਰਾ ਸੈਂਕੜਾ ਜੜਨ ਵਾਲਾ ਦੂਸਰਾ ਬੱਲੇਬਾਜ਼ ਬਣ ਗਿਆ। ਜੋਰਿਚ ਨੇ ਇਸ ਸਾਲ ਦੀ ਸ਼ੁਰੂਆਤ ’ਚ ਹਰਾਰੇ ’ਚ ਜ਼ਿੰਮਬਾਬਵੇ ਖਿਲਾਫ 153 ਗੇਂਦਾਂ ’ਚ 215 ਦੌੜਾਂ ਬਣਾਈਆਂ ਸਨ। ਤ੍ਰਿਵੇਦੀ ਨੇ 106 ਗੇਂਦਾਂ ’ਚ 7 ਚੌਕਿਆਂ ਦੀ ਮਦਦ ਨਾਲ 90 ਦੌੜਾਂ ਬਣਾਈਆਂ। ਕੁੰਡੂ ਨੇ ਕਨਿਸ਼ਕ ਚੌਹਾਨ ਨਾਲ 5ਵੀਂ ਵਿਕਟਾਂ ਲਈ 87 ਦੌੜਾਂ ਦੀ ਸਾਂਝੇਦਾਰੀ ਕੀਤੀ।