ਸਾਬਕਾ ਕਾਂਗਰਸੀ ਵਿਧਾਇਕ ਦੀ ਗੱਡੀ ’ਚ ‘ਚਿੱਟਾ’ ਵੇਚਣ ਵਾਲੇ 2 ਸਮੱਗਲਰ ਦਬੋਚੇ

ਅੰਮ੍ਰਿਤਸਰ, (ਸੰਜੀਵ)- ਪਿੰਡ-ਪਿੰਡ ਚਿੱਟੇ ਦੀਆਂ ਪੁਡ਼ੀਆਂ ਵੇਚਣ ਵਾਲੇ 2 ਸਮੱਗਲਰਾਂ ਨੂੰ ਅੱਜ ਜੰਡਿਆਲਾ ਗੁਰੂ ਦੇ ਪਿੰਡ ਭਾਰਡ਼ ਵਿਖੇ ਲੋਕਾਂ ਨੇ ਫਡ਼ ਕੇ ਪਹਿਲਾਂ ਤਾਂ ਜੰਮ ਕੇ ਛਿੱਤਰ-ਪਰੇਡ ਕੀਤੀ ਅਤੇ ਫਿਰ ਰੱਸੀਆਂ ਨਾਲ ਬੰਨ੍ਹ ਕੇ ਥਾਣਾ ਜੰਡਿਆਲਾ ਗੁਰੂ ਦੀ ਪੁਲਸ ਹਵਾਲੇ ਕਰ ਦਿੱਤਾ। ਦੋਸ਼ੀਆਂ ਦੀ ਪਛਾਣ ਜਸਬੀਰ ਸਿੰਘ ਵਾਸੀ ਖਿਲਚੀਆਂ ਤੇ ਅਰਸ਼ਬੀਰ ਸਿੰਘ ਵਾਸੀ ਗੁੰਨੋਵਾਲ ਦੇ ਰੂਪ ਵਿਚ ਹੋਈ, ਜਿਨ੍ਹਾਂ ਵਿਰੁੱਧ ਪੁਲਸ ਨੇ ਐੱਨ. ਡੀ. ਪੀ. ਐੱਸ. ਐਕਟ ਅਧੀਨ ਕੇਸ ਦਰਜ ਕਰ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਦੋਵੇਂ ਦੋਸ਼ੀ ਸਿਲੰਡਰ ਡਲਿਵਰੀ ਦੀ ਆਡ਼ ’ਚ ਪਿੰਡ-ਪਿੰਡ ਜਾ ਕੇ ਨੌਜਵਾਨਾਂ ਨੂੰ 4-4 ਸੌ ਰੁਪਏ ’ਚ ਹੈਰੋਇਨ ਦੀਆਂ ਪੁਡ਼ੀਆਂ ਵੇਚ ਰਹੇ ਸਨ। ਦੋਸ਼ੀਆਂ ਦੀ ਨਸ਼ਾ ਸਮੱਗਲਿੰਗ ਦੀ ਭਿਣਕ ਅੱਜ ਜਦੋਂ ਪਿੰਡ ਵਾਸੀਆਂ ਨੂੰ ਲੱਗੀ ਤਾਂ ਉਹ ਸੁਚੇਤ ਹੋ ਗਏ, ਜਿਵੇਂ ਹੀ ਸਿਲੰਡਰਾਂ ਨਾਲ ਭਰੀ ਗੱਡੀ ਨੂੰ ਲੈ ਕੇ ਦੋਵੇਂ ਸਮੱਗਲਰ  ਪਿੰਡ ਵਿਚ ਪੁੱਜੇ ਅਤੇ ਹੈਰੋਇਨ ਦੀ ਪੁਡ਼ੀ ਦਾ ਸੌਦਾ ਕਰਨ ਲੱਗੇ ਤਾਂ ਪਿੰਡ ਵਾਸੀ ਇਕੱਠੇ ਹੋ ਗਏ ਤੇ ਦੋਵਾਂ ਨੂੰ ਦਬੋਚ ਲਿਆ। ਦੋਵਾਂ ਸਮੱਗਲਰਾਂ ਦੇ ਹੱਥ ਬੰਨ੍ਹ ਕੇ ਲੋਕਾਂ ਨੇ ਜੰਮ ਕੇ ਛਿੱਤਰ-ਪਰੇਡ ਕੀਤੀ ਤੇ ਫਿਰ ਦੋਵਾਂ ਨੂੰ ਥਾਣੇ ਲੈ ਗਏ।  
ਜਿਸ ਗੱਡੀ ਵਿਚ ਦੋਵੇਂ ਸਮੱਗਲਰ ਸਿਲੰਡਰ ਵੇਚਣ ਆਏ ਸਨ ਉਹ ਕਿਸੇ ਹੋਰ ਦੀ ਨਹੀਂ ਸਗੋਂ ਜੰਡਿਆਲਾ ਗੁਰੂ ਖੇਤਰ ਦੇ ਇਕ ਤਾਕਤਵਰ ਨੇਤਾ ਅਤੇ ਕਾਂਗਰਸ ਦੇ ਸਾਬਕਾ ਵਿਧਾਇਕ ਦੀ ਸੀ। ਲੋਕਾਂ ਨੇ ਸਿਲੰਡਰਾਂ ਨਾਲ ਭਰੀ ਗੱਡੀ ਤੇ ਸਮੱਗਲਰਾਂ ਦੀ ਵੀਡੀਓ ਬਣਾ ਕੇ ਉਸ ਨੂੰ ਸੋਸ਼ਲ ਮੀਡੀਆ ’ਤੇ ਵਾਇਰਲ ਕਰ ਦਿੱਤਾ ਤਾਂ ਕਿ ਪੰਜਾਬ ਸਰਕਾਰ ਵੱਲੋਂ ਨਸ਼ੇ ਵਿਰੁੱਧ ਛੇਡ਼ੀ ਗਈ ਮੁਹਿੰਮ ਵਿਚ ਹੋਰ ਵੀ ਲੋਕ ਅੱਗੇ ਆਉਣ ਤੇ ਨਸ਼ਾ ਸਮੱਗਲਿੰਗ ਕਰਨ ਵਾਲਿਆਂ ਨੂੰ ਫਡ਼ ਕੇ ਪੁਲਸ ਹਵਾਲੇ ਕਰ ਦੇਣ। 
ਜਾਣਕਾਰੀ  ਅਨੁਸਾਰ ਗੈਸ ਡਲਿਵਰੀ ਕਰਨ ਵਾਲਾ ਉਕਤ ਦੋਸ਼ੀ ਜਸਬੀਰ ਸਿੰਘ ਹੈਰੋਇਨ ਲੈ ਕੇ ਆਉਂਦਾ ਤੇ ਉਸ ਦੀਅਾਂ ਪੁਡ਼ੀਆਂ ਬਣਾ ਕੇ ਪਿੰਡ-ਪਿੰਡ ਬਣਾਏ ਆਪਣੇ ਗਾਹਕਾਂ ਨੂੰ ਦਿੰਦਾ ਸੀ। ਫਡ਼ੇ ਗਏ ਦੋਵਾਂ ਸਮੱਗਲਰ ਵੀ ਨਸ਼ੇ ਦੇ ਆਦੀ ਹਨ, ਉਹ ਆਪ ਵੀ ਨਸ਼ਾ ਕਰਦੇ ਹਨ ਤੇ ਆਪਣੀ ਇਸ ਲੱਤ ਨੂੰ ਪੂਰਾ ਕਰਨ ਲਈ ਕਈ ਨੌਜਵਾਨਾਂ ਨੂੰ ਨਸ਼ੇ ਵਿਚ ਫਸਾ ਕੇ ਉਨ੍ਹਾਂ ਨੂੰ 400 ਰੁਪਏ ਦੀ ਪੁਡ਼ੀ ਦਿੰਦੇ ਹਨ। ਅੱਜ ਪਿੰਡ ਵਾਸੀਆਂ ਨੇ ਦੋਵਾਂ ਨੂੰ ਫਡ਼ਨ ਲਈ ਪੂਰੀ ਯੋਜਨਾ ਬਣਾ ਰੱਖੀ ਸੀ ਅਤੇ ਗੱਡੀ ਆਉਂਦੇ ਹੀ ਦੋਵਾਂ ਨੂੰ ਕਾਬੂ ਕਰ ਲਿਆ।
ਕੀ ਕਹਿਣਾ ਹੈ ਥਾਣਾ ਮੁਖੀ ਦਾ
ਥਾਣਾ ਜੰਡਿਆਲਾ ਗੁਰੂ ਦੇ ਇੰਚਾਰਜ ਸ਼ਮਿੰਦਰਜੀਤ ਸਿੰਘ ਦਾ ਕਹਿਣਾ ਹੈ ਕਿ ਦੋਵਾਂ ਦੋਸ਼ੀਆਂ ਵਿਰੁੱਧ ਕੇਸ ਦਰਜ ਕਰ ਕੇ ਉਨ੍ਹਾਂ ਨੂੰ ਮਾਣਯੋਗ ਅਦਾਲਤ ਦੇ ਨਿਰਦੇਸ਼ਾਂ ’ਤੇ ਜੇਲ ਭੇਜ ਦਿੱਤਾ ਗਿਆ ਹੈ, ਜਦੋਂ ਕਿ ਉਨ੍ਹਾਂ ਦੇ ਕੁਝ ਹੋਰ ਸਾਥੀਆਂ ਦੀ ਗ੍ਰਿਫਤਾਰੀ ਲਈ ਛਾਪੇਮਾਰੀ ਕੀਤੀ ਜਾ ਰਹੀ ਹੈ।