ਪੰਜਾਬ ''ਚ ''ਇਸ ਬੀਮਾਰੀ'' ਬਾਰੇ ਹੈਰਾਨੀਜਨਕ ਖ਼ੁਲਾਸਾ, ਲਗਾਤਾਰ ਵਧ ਰਹੀ ਮਰੀਜ਼ਾਂ ਦੀ ਗਿਣਤੀ

ਪਾਤੜਾਂ (ਮਾਨ) : ਪੰਜਾਬ ਦੇ ਲੋਕ ਕਾਲੇ ਪਾਣੀ ਨੂੰ ਪੀ ਕੇ ਆਪਣੀ ਜਿੰਦਗੀ ਦਾਅ ’ਤੇ ਹੀ ਨਹੀ ਲਾ ਰਹੇ, ਸਗੋਂ ਵੱਡੀ ਪੱਧਰ ’ਤੇ ਕਾਲੇ ਪੀਲੀਏ (ਹੈਪੀਟਾਈਟਿਸ-ਸੀ) ਦੇ ਮਰੀਜ਼ ਬਣ ਕੇ ਸਾਹਮਣੇ ਆ ਰਹੇ ਹਨ। ਅਜਿਹੇ ਮਰੀਜ਼ਾਂ ਦੀ ਸੂਬੇ ਅੰਦਰ ਗਿਣਤੀ ਘਟਣ ਦੀ ਬਜਾਏ ਵੱਧਦੀ ਹੀ ਜਾ ਰਹੀ ਹੈ। ਭਾਵੇਂ ਸਰਕਾਰੀ ਹਸਪਤਾਲਾਂ ਅੰਦਰ ਇਸ ਬੀਮਾਰੀ ਦਾ ਇਲਾਜ ਬਿਨ੍ਹਾਂ ਕੋਈ ਖਰਚ ਲਏ ਕੀਤਾ ਜਾਂਦਾ ਹੈ, ਫਿਰ ਵੀ ਮਰੀਜ਼ਾਂ ਦੀ ਗਿਣਤੀ ਦਾ ਵਧਣਾ ਚਿੰਤਾਂ ਦਾ ਵਿਸ਼ਾ ਹੈ ਕਿਉਂਕਿ ਜੂਨ, 2016 ਤੋਂ ਲੈ ਕੇ ਦਸੰਬਰ, 2019 ਤੱਕ 76380 ਕਾਲੇ ਪੀਲੀਏ ਨਾਲ ਸਬੰਧਿਤ ਮਰੀਜ਼ ਸਾਹਮਣੇ ਆ ਚੁੱਕੇ ਹਨ।
ਆਰ. ਟੀ. ਆਈ. (ਸੂਚਨਾ ਦਾ ਅਧਿਕਾਰ) ਮਾਹਿਰ ਬ੍ਰਿਸ ਭਾਨ ਬੁਜਰਕ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਡਾਈਰੈਕਟਰ ਸਿਹਤ ਅਤੇ ਪਰਿਵਾਰ ਭਲਾਈ ਮਹਿਕਮਾ ਪੰਜਾਬ ਕੋਲੋਂ ਸੂਚਨਾ ਦੇ ਅਧਿਕਾਰ ਐਕਟ-2005 ਤਹਿਤ ਪੰਜਾਬ ਅੰਦਰ ਕਾਲੇ ਪੀਲੀਏ ਨਾਲ ਸਬੰਧਿਤ ਮਰੀਜ਼ਾਂ ਦੇ ਵੇਰਵੇ ਮੰਗੇ ਗਏ ਸਨ, ਜਿਸ ਦੇ ਸਬੰਧ 'ਚ ਸਤੰਬਰ, 2018 ’ਚ ਬਣਾਏ ਗਏ ਨੈਸ਼ਨਲ ਵਾਇਰਲ ਹੈਪੀਟਾਈਟਸ ਕੰਟਰੋਲ ਪ੍ਰੋਗਰਾਮ ਚੰਡੀਗੜ੍ਹ (ਪਹਿਲਾਂ ਮੁੱਖ ਮੰਤਰੀ ਪੰਜਾਬ ਹੈਪੀਟਾਈਟਸ ਕੰਟਰੋਲ ਪ੍ਰੋਗਰਾਮ ਹੁੰਦਾ ਸੀ) ਵੱਲੋਂ ਦੱਸਿਆ ਗਿਆ ਹੈ ਕਿ ਸੂਬੇ ਅੰਦਰ ਜੂਨ, 2016 ਤੋਂ ਲੈ ਕੇ 31 ਦਸੰਬਰ, 2019 ਤੱਕ ਕਾਲੇ ਪੀਲੀਏ ਨਾਲ ਪੀੜਤ 76380 ਵਿਅਕਤੀਆਂ ਦਾ ਵੱਖ-ਵੱਖ ਸਰਕਾਰੀ ਹਸਪਤਾਲਾਂ ਅਤੇ ਮੈਡਕੀਲ ਕਾਲਜਾਂ ’ਚ ਇਲਾਜ ਹੋ ਚੁੱਕਿਆ ਹੈ ਜਾਂ ਚੱਲ ਰਿਹਾ ਹੈ।

ਜੂਨ, 2016 ਤੋਂ ਲੈ ਕੇ 31 ਦਸੰਬਰ, 2016 (ਸਮਾਂ 6 ਮਹੀਨੇ) ਤੱਕ ਕਾਲੇ ਪੀਲੀਏ ਨਾਲ ਪੀੜਤ ਮਰੀਜ਼ਾਂ ਦੀ ਗਿਣਤੀ 19487 ਸੀ, ਜਿਹੜੀ ਸਾਲ, 2017 ’ਚ ਵੱਧ ਕੇ 19891 ਹੋ ਗਈ। ਸਾਲ 2018 ’ਚ ਇਸ ਵਾਇਰਸ ਨੂੰ ਠੱਲ੍ਹ ਪੈਣ ਕਰਕੇ ਗਿਣਤੀ 16874 ਰਹਿ ਗਈ ਪਰ ਸਾਲ, 2019 ’ਚ 20128 ਵਿਅਕਤੀ ਪੀੜਤ ਪਾਏ ਗਏ। ਸਭ ਤੋਂ ਵੱਧ ਵਿਅਕਤੀ ਸੰਗਰੂਰ 'ਚ ਪੀੜਤ ਸਨ, ਜਿਨ੍ਹਾਂ ਦੀ ਕ੍ਰਮਵਾਰ ਗਿਣਤੀ ਸਾਲ 2016 ‘ਚ 2959 (ਸਮਾਂ ਛੇ ਮਹੀਨੇ) ਸਾਲ 2017 ‘ਚ 2467,ਸਾਲ 2018 ’ਚ 1934, ਸਾਲ, 2019 ’ਚ 2086 ਅਤੇ ਕੁੱਲ ਗਿਣਤੀ 9446 ਤੱਕ ਪੁੱਜ ਗਈ। ਇਨ੍ਹਾਂ ਸਾਰੇ ਪੀੜਤਾਂ ਦਾ ਇਲਾਜ ਜ਼ਿਲ੍ਹਾ ਹਸਪਤਾਲ ਸੰਗਰੂਰ ਵਿਖੇ ਕੀਤਾ ਗਿਆ ਹੈ। ਬ੍ਰਿਸ ਭਾਨ ਬੁਜਰਕ ਨੇ ਕਿਹਾ ਕਿ ਕਾਲੇ ਪੀਲੀਏ ਨਾਲ ਪੀੜਤ ਸਭ ਤੋਂ ਘੱਟ ਵਿਅਕਤੀ ਪਠਾਨਕੋਟ ਜ਼ਿਲ੍ਹੇ 'ਚ ਪਾਏ ਗਏ, ਜਿਨ੍ਹਾਂ ਦੀ ਕੁੱਲ ਗਿਣਤੀ 289 ਸੀ, ਸਾਲ, 2016 ’ਚ 38 ਮਰੀਜ਼ ਸਨ, ਜਿਹੜੇ ਸਾਲ 2019 ’ਚ ਵੱਧ ਕੇ 164 ਹੋ ਗਏ।

ਦੂਸਰੇ ਨੰਬਰ ’ਤੇ ਪੰਜਾਬ ਦਾ ਤਰਨਤਾਰਨ ਜ਼ਿਲ੍ਹਾ ਰਿਹਾ, ਜਿੱਥੇ ਉਕਤ ਸਮੇਂ ਦੌਰਾਨ ਸਾਲ 2016 ’ਚ 1515, ਸਾਲ 2017 ’ਚ 1925, ਸਾਲ 2018 ’ਚ 1504 ਅਤੇ ਸਾਲ 2019 ’ਚ 1563 ਮਰੀਜ਼ ਕਾਲੇ ਪੀਲੀਏ ਨਾਲ ਪੀੜਤ ਹੋਣ ਕਰਕੇ ਇਹ ਗਿਣਤੀ 6507 ਹੋ ਗਈ। ਸੂਬੇ ਦੇ ਤਿੰਨ ਸਰਕਾਰੀ ਮੈਡੀਕਲ ਕਾਲਜਾਂ ਅੰਮ੍ਰਿਤਸਰ, ਫਰੀਦਕੋਟ, ਪਟਿਆਲਾ ਅਤੇ ਸਰਕਾਰ ਦੇ 22 ਜ਼ਿਲ੍ਹਾ ਹਸਪਤਾਲਾਂ ’ਚ, ਅੰਮ੍ਰਿਤਸਰ ਦੇ ਕਾਲੇ ਪੀਲੀਏ ਤੋਂ ਪੀੜਤ 4899 ਵਿਅਕਤੀ, ਬਰਨਾਲਾ 2789, ਬਠਿੰਡਾ 5513, ਫਰੀਦਕੋਟ 5845, ਫਤਹਿਗੜ੍ਹ ਸਾਹਿਬ 1275, ਫਾਜ਼ਿਲਕਾ 2022, ਫਿਰੋਜ਼ਪੁਰ 3021, ਗੁਰਦਾਸਪੁਰ 2154, ਹੁਸ਼ਿਆਰਪੁਰ 2025, ਜਲੰਧਰ 2539, ਕਪੂਰਥਲਾ 1492, ਲੁਧਿਆਣਾ 4972, ਮਾਨਸਾ 3849, ਮੋਗਾ 5039, ਮੁਕਤਸਰ ਸਾਹਿਬ 5303, ਪਟਿਆਲਾ 3683, ਰੂਪਨਗਰ 838, ਐਸ.ਏ.ਐਸ.ਨਗਰ 678, ਸ਼ਹੀਦ ਭਗਤ ਸਿੰਘ ਨਗਰ 'ਚ 2202 (ਇਹ ਵੇਰਵੇ ਜੂਨ 2016 ਤੋਂ ਲੈ ਕੇ 31 ਦਸੰਬਰ 2019 ਤੱਕ ਦੇ ਹਨ) ਵਿਅਕਤੀ ਪੀੜਤ ਸਨ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੇ ਲੋਕਾਂ ਦੀ ਵੱਡੀ ਆਬਾਦੀ ਦਾ ਕਾਲੇ ਪੀਲੀਏ ਤੋਂ ਪੀੜਤ ਹੋਣਾ ਅਤੇ ਕਾਲਾ ਪਾਣੀ ਪੀਣ ਲਈ ਮਜਬੂਰ ਹੋਣਾ ਚਿੰਤਾ ਦਾ ਵਿਸ਼ਾ ਹੈ।