ਮੰਦਿਰ ''ਚ ਪੁਜਾਰੀ ਨੇ ਜਨਾਨੀ ਨਾਲ ਕੀਤਾ ਜਬਰ-ਜ਼ਿਨਾਹ, ਗ੍ਰਿਫ਼ਤਾਰ

ਲਾਲੜੂ (ਜ. ਬ.) : ਲਾਲੜੂ ਦੇ ਪਿੰਡ ਖੇਲਣ ਵਿਚ ਠਾਕੁਰਦੁਆਰਾ ਮੰਦਿਰ ਦੇ ਪੁਜਾਰੀ ਨੇ ਮੰਦਿਰ ਵਿਚ ਆਈ ਇਕ ਜਨਾਨੀ ਨਾਲ ਜਬਰ-ਜ਼ਿਨਾਹ ਕੀਤਾ। ਪੁਲਸ ਨੇ ਮੁਲਜ਼ਮ ਖ਼ਿਲਾਫ਼ ਕੇਸ ਦਰਜ ਕਰ ਕੇ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ ਅਤੇ ਅਦਾਲਤ ਵਿਚ ਪੇਸ਼ ਕਰ ਕੇ 3 ਦਿਨ ਦਾ ਰਿਮਾਂਡ ਲਿਆ। ਉਥੇ ਹੀ ਪੁਜਾਰੀ ਦੀ ਇਕ ਵੀਡੀਓ ਵੀ ਖੂਬ ਵਾਇਰਲ ਹੋ ਰਹੀ ਹੈ , ਜਿਸ ਵਿਚ ਉਹ ਗੁਨਾਹ ਕਬੂਲਦਾ ਹੋਇਆ ਕਈ ਖ਼ੁਲਾਸੇ ਕਰ ਰਿਹਾ ਹੈ। ਥਾਣਾ ਮੁਖੀ ਹੰਡੇਸਰਾ ਰਜਨੀਸ਼ ਚੌਧਰੀ ਨੇ ਦੱਸਿਆ ਕਿ ਮੰਦਿਰ ਵਿਚ ਕੁਰੂਕਸ਼ੇਤਰ ਦੀ ਜਨਾਨੀ ਆਪਣੇ ਮੁੰਡੇ ’ਤੇ ਭੂਤ ਦਾ ਸਾਇਆ ਹੋਣ ਕਾਰਨ ਪੁਜਾਰੀ ਤੋਂ ਇਲਾਜ ਕਰਾਉਣ ਆਈ ਸੀ, ਜਿਸ ’ਤੇ ਪੁਜਾਰੀ ਨੇ ਮੰਦਿਰ ਕੰਪਲੈਕਸ ਵਿਚ ਹੀ ਜਨਾਨੀ ਨਾਲ ਕਮਰੇ ਵਿਚ ਜਬਰ-ਜ਼ਿਨਾਹ ਕੀਤਾ। ਜਨਾਨੀ ਦੇ ਰੌਲਾ ਪਾਉਣ ’ਤੇ ਲੋਕ ਇਕੱਠੇ ਹੋ ਗਏ ਅਤੇ ਉਨ੍ਹਾਂ ਨੇ ਪੁਜਾਰੀ ਰਾਮਜੀ ਦਾਸ ਨੂੰ ਪੁਲਸ ਹਵਾਲੇ ਕਰ ਦਿੱਤਾ ।
ਆਗੂ ਦੀ ਸ਼ਹਿ ’ਤੇ ਆਉਂਦੇ ਹਨ ਨਸ਼ੇੜੀ
ਪੁਜਾਰੀ ਨੇ ਵਾਇਰਲ ਵੀਡੀਓ ਵਿਚ ਦੱਸਿਆ ਕਿ ਉਹ 7-8 ਮਹੀਨਿਆਂ ਤੋਂ ਉਕਤ ਮੰਦਿਰ ਵਿਚ ਰਹਿ ਰਿਹਾ ਹੈ ਅਤੇ ਉਸਨੇ ਗੁਨਾਹ ਕਬੂਲਦਿਆਂ ਕਿਹਾ ਕਿ ਮੰਦਿਰ ਕੰਪਲੈਕਸ ਵਿਚ ਪਿੰਡ ਦੇ ਹੀ ਸਿਆਸੀ ਰਸੂਖ ਵਾਲੇ ਕਈ ਵਿਅਕਤੀ ਅਫੀਮ, ਗਾਂਜਾ , ਚਿੱਟਾ ਅਤੇ ਸੁਲਫਾ ਲੈ ਕੇ ਆਉਂਦੇ ਹਨ ਅਤੇ ਉਹ ਸਾਰੇ ਨਸ਼ੇ ਦੇ ਆਦੀ ਹਨ। ਸਰਪੰਚ ਤਰਸੇਮ ਸਿੰਘ ਨੇ ਦੱਸਿਆ ਕਿ ਠਾਕੁਰਦੁਆਰਾ ਮੰਦਿਰ ਨਸ਼ੇੜੀਆਂ ਦਾ ਅੱਡਾ ਬਣਾ ਹੋਇਆ ਹੈ। ਗਲਤ ਕੰਮਾਂ ਅਤੇ ਸ਼ਰਾਰਤੀ ਅਨਸਰਾਂ ਸਬੰਧੀ ਪ੍ਰਸ਼ਾਸਨ ਅਤੇ ਪੁਲਸ ਨੂੰ ਕਈ ਵਾਰ ਸੂਚਿਤ ਕੀਤਾ ਗਿਆ ਪਰ ਇਕ ਆਗੂ ਦੀ ਸਪੋਰਟ ਹੋਣ ਕਾਰਨ ਕਦੇ ਕੋਈ ਕਾਰਵਾਈ ਨਹੀਂ ਹੋਈ।