ਪੰਜਾਬ ਧੁੰਦ ਦੀ ਲਪੇਟ ’ਚ : 4 ਡਿਗਰੀ ਤੋਂ ਹੇਠਾਂ ਡਿੱਗਾ ਪਾਰਾ, 2 ਦਿਨ ‘ਆਰੇਂਜ ਅਲਰਟ’

ਜਲੰਧਰ, (ਪੁਨੀਤ)- ਸਰਦੀ ਆਪਣੇ ਸਿਖਰ ’ਤੇ ਹੈ ਅਤੇ ਧੁੰਦ ਦਾ ਪੂਰਾ ਜ਼ੋਰ ਦੇਖਣ ਨੂੰ ਮਿਲ ਰਿਹਾ ਹੈ, ਜਿਸ ਕਾਰਨ ਜਨਜੀਵਨ ਪ੍ਰਭਾਵਿਤ ਹੋ ਰਿਹਾ ਹੈ। ਪੰਜਾਬ ਦਾ ਪਾਰਾ 4 ਡਿਗਰੀ ਤੋਂ ਹੇਠਾਂ ਡਿੱਗ ਚੁੱਕਿਆ ਹੈ ਅਤੇ ਧੁੰਦ ਕਾਰਨ ਦਿਸਣ ਹੱਦ 8 ਮੀਟਰ ਤੱਕ ਰਿਕਾਰਡ ਕੀਤੀ ਗਈ ਹੈ, ਜੋ ਕਿ ਆਉਣ ਵਾਲੇ ਦਿਨਾਂ ’ਚ ਧੁੰਦ ਵਧਣ ਦਾ ਸੰਕੇਤ ਦੇ ਰਹੀ ਹੈ।

ਉੱਥੇ ਹੀ, ਮੌਸਮ ਵਿਗਿਆਨ ਵਿਭਾਗ ਵੱਲੋਂ 2 ਦਿਨਾਂ ਦਾ ਆਰੇਂਜ ਅਲਰਟ ਜਾਰੀ ਕੀਤਾ ਗਿਆ ਹੈ ਜਿਸ ਕਾਰਨ ਹਾਈਵੇਅ ’ਤੇ ਸਾਵਧਾਨੀ ਅਪਣਾਉਣ ਦੀ ਲੋੜ ਹੈ।

ਪੰਜਾਬ ਦੇ ਫਰੀਦਕੋਟ ’ਚ ਘੱਟੋ-ਘੱਟ ਤਾਪਮਾਨ 3.4 ਡਿਗਰੀ, ਹੁਸ਼ਿਆਰਪੁਰ ’ਚ 3.9 ਜਦੋਂ ਕਿ ਅੰਮ੍ਰਿਤਸਰ ਅਤੇ ਲੁਧਿਆਣਾ ’ਚ 4.4 ਡਿਗਰੀ ਰਿਕਾਰਡ ਕੀਤਾ ਗਿਆ। ਗੁਰਦਾਸਪੁਰ ’ਚ 4, ਐੱਸ. ਬੀ. ਐੱਸ. ਨਗਰ ’ਚ 4.5, ਸ੍ਰੀ ਆਨੰਦਪੁਰ ਸਾਹਿਬ ’ਚ 5.5, ਜਲੰਧਰ ’ਚ 6, ਰੂਪਨਗਰ ’ਚ 7.1 ਡਿਗਰੀ ਘੱਟੋ-ਘੱਟ ਤਾਪਮਾਨ ਰਿਕਾਰਡ ਕੀਤਾ ਗਿਆ। ਓਧਰ, ਅੰਮ੍ਰਿਤਸਰ ਦੇ ਸਾਧਾਰਣ ਤਾਪਮਾਨ ’ਚ 3.3 ਡਿਗਰੀ ਦੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ, ਜੋ ਕਿ ਠੰਡ ਵਧਣ ਦਾ ਸੰਕੇਤ ਹੈ।

ਮੌਸਮ ਵਿਭਾਗ ਵੱਲੋਂ 29 ਦਸੰਬਰ ਨੂੰ ਸੀਤ ਲਹਿਰ ਦੀ ਚਿਤਾਵਨੀ ਜਾਰੀ ਕੀਤੀ ਗਈ ਹੈ, 30 ਦਸੰਬਰ ਤੱਕ ਆਰੇਂਜ ਅਲਰਟ ਜਦੋਂ ਕਿ 31 ਦਸੰਬਰ ਅਤੇ 1 ਜਨਵਰੀ ਨੂੰ ‘ਯੈਲੋ ਅਲਰਟ’ ਦੱਸਿਆ ਗਿਆ ਹੈ। ਜਿੱਥੇ ਇਕ ਪਾਸੇ ਹਾਈਵੇਅ ’ਤੇ ਧੁੰਦ ਕਾਰਨ ਆਵਾਜਾਈ ਪ੍ਰਭਾਵਿਤ ਹੋ ਰਹੀ ਹੈ, ਉੱਥੇ ਹੀ, ਸ਼ਹਿਰੀ ਇਲਾਕਿਆਂ ’ਚ ਕਾਂਬੇ ਕਾਰਨ ਰੋਜ਼ਾਨਾ ਦੀ ਰੁਟੀਨ ਪ੍ਰਭਾਵਿਤ ਹੋ ਰਹੀ ਹੈ। ਮੌਸਮ ਮਾਹਰਾਂ ਮੁਤਾਬਕ ਦੁਪਹਿਰ ਨੂੰ ਧੁੱਪ ਨਿਕਲਣ ਕਾਰਨ ਕੁਝ ਰਾਹਤ ਮਿਲ ਰਹੀ ਹੈ, ਜਿਸ ਦਿਨ ਧੁੱਪ ਨਾ ਨਿਕਲੀ, ਉਸ ਦਿਨ ਤੋਂ ਠੰਡ ਦਾ ਕਹਿਰ ਵਧੇਗਾ।