ਪੰਜਾਬ 'ਚ ਹਿੰਦੂ ਵੋਟ ਬੈਂਕ ਨੂੰ ‘ਇਗਨੋਰ’ ਕਰ ਕੇ ਫਿਰ ਉਹੀ ਗ਼ਲਤੀ ਤਾਂ ਨਹੀਂ ਕਰਨ ਜਾ ਰਹੀ ਕਾਂਗਰਸ?

ਜਲੰਧਰ (ਅਨਿਲ ਪਾਹਵਾ) - ਪੰਜਾਬ ਵਿਧਾਨ ਸਭਾ ਚੋਣਾਂ ਦੀਆਂ ਤਿਆਰੀਆਂ ਦਰਮਿਆਨ ਕਾਂਗਰਸ ਦੇ ਅੰਦਰ ਪ੍ਰਧਾਨਗੀ ਦੇ ਅਹੁਦੇ ਨੂੰ ਲੈ ਕੇ ਗਹਿਮਾ-ਗਹਿਮੀ ਚੱਲ ਰਹੀ ਹੈ। ਪਾਰਟੀ ਦੇ ਮੌਜੂਦਾ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੂੰ ਹਟਾਉਣ ਲਈ ਲਾਮਬੰਦੀ ਚੱਲ ਰਹੀ ਹੈ, ਬੈਠਕਾਂ ਹੋ ਰਹੀਆਂ ਹਨ, ਚਰਚਾਵਾਂ ਦਾ ਦੌਰ ਜਾਰੀ ਹੈ ਪਰ ਅਜੇ ਤੱਕ ਤਸਵੀਰ ਸਾਫ਼ ਨਹੀਂ ਹੋਈ ਕਿ ਅਗਲਾ ਪ੍ਰਧਾਨ ਕੌਣ ਬਣ ਰਿਹਾ ਹੈ। ਇਸ ਦੌਰਾਨ ਚਰਚਾ ਚੱਲ ਰਹੀ ਹੈ ਕਿ ਪੰਜਾਬ ਵਿਚ ਪਾਰਟੀ ਇਕ ਜੱਟ ਸਿੱਖ ਚਿਹਰੇ ਨੂੰ ਹਟਾ ਕੇ ਦੁਬਾਰਾ ਜਾਂ ਤਾਂ ਕਿਸੇ ਹੋਰ ਜੱਟ ਸਿੱਖ ਚਿਹਰੇ ਨੂੰ ਲਿਆ ਸਕਦੀ ਹੈ ਜਾਂ ਫਿਰ ਦਲਿਤ ਚਿਹਰੇ ’ਤੇ ਵੀ ਦਾਅ ਖੇਡ ਸਕਦੀ ਹੈ। 

ਪੜ੍ਹੋ ਇਹ ਵੀ - Delhi Airport 'ਤੇ IndiGo ਦੀ flight 'ਚ ਮਚੀ ਹਾਹਾਕਾਰ, ਬਿਨਾਂ AC ਤੋਂ ਬੈਠੇ ਯਾਤਰੀ, ਹੋਏ ਪਸੀਨੋ ਪਸੀਨ

ਇਸ ਦੌਰਾਨ ਭਾਵੇਂ ਹਿੰਦੂ ਚਿਹਰੇ ਨੂੰ ਲੈ ਕੇ ਕੋਈ ਚਰਚਾ ਨਹੀਂ ਚੱਲ ਰਹੀ ਪਰ ਪੰਜਾਬ ਵਿਚ ਕਾਂਗਰਸ ਦੀ ਜੋ ਹਾਲਤ ਹੈ, ਉਸ ਨੂੰ ਦੇਖਦਿਆਂ ਪਾਰਟੀ ਨੂੰ ਕਿਸੇ ਖ਼ਾਸ ਭਾਈਚਾਰੇ ਦੇ ਚਿਹਰੇ ਦੀ ਭਾਲ ਕਰਨ ਦੀ ਬਜਾਏ ਅਜਿਹੇ ਚਿਹਰੇ ਦੀ ਭਾਲ ਕਰਨੀ ਹੋਵੇਗੀ, ਜੋ ਕਾਂਗਰਸ ਨੂੰ ਪੰਜਾਬ ਵਿਚੋਂ ਖ਼ਤਮ ਹੋਣ ਤੋਂ ਬਚਾ ਸਕੇ। ਪੰਜਾਬ ਵਿਚ ਅਸਲ ’ਚ ਭਾਜਪਾ ਨੇ ਹਾਲ ਹੀ ਵਿਚ ਕੇਵਲ ਸਿੰਘ ਢਿੱਲੋਂ ਨੂੰ ਸੂਬੇ ਦੀ ਕਮਾਨ ਸੌਂਪੀ ਹੈ ਅਤੇ ਇਹ ਪਹਿਲੀ ਵਾਰ ਹੋਇਆ ਹੈ ਕਿ ਪਾਰਟੀ ਨੇ ਹਿੰਦੂ ਚਿਹਰੇ ਨੂੰ ਪਿੱਛੇ ਕਰ ਕੇ ਜੱਟ ਸਿੱਖ ਚਿਹਰੇ ’ਤੇ ਦਾਅ ਲਾਉਣ ਬਾਰੇ ਸੋਚਿਆ ਹੈ। ਹੁਣ ਕਾਂਗਰਸ ਵਿਚ ਵੀ ਪ੍ਰਧਾਨ ਬਦਲਣ ਨੂੰ ਲੈ ਕੇ ਕਈ ਤਰ੍ਹਾਂ ਦੀਆਂ ਚਰਚਾਵਾਂ ਹਨ ਪਰ ਪਾਰਟੀ ਇਸ ਸੋਚ ਤੋਂ ਉੱਪਰ ਉੱਠ ਕੇ ਅਜਿਹੇ ਚਿਹਰੇ ਨੂੰ ਅੱਗੇ ਨਹੀਂ ਲਿਆ ਪਾ ਰਹੀ, ਜੋ ਪਾਰਟੀ ਨੂੰ ਦੁਬਾਰਾ ਮਜ਼ਬੂਤੀ ਦੇ ਸਕੇ। ਦੇਸ਼ ਭਰ ਵਿਚ ਕਾਂਗਰਸ ਪਹਿਲਾਂ ਹੀ ਗਿਣੇ-ਚੁਣੇ ਸੂਬਿਆਂ ਵਿਚ ਰਹਿ ਗਈ ਹੈ। ਪੰਜਾਬ ਵਿਚ ਕਾਂਗਰਸ ਲਈ ਮਜ਼ਬੂਤ ਸੰਭਾਵਨਾਵਾਂ ਹੋ ਸਕਦੀਆਂ ਹਨ, ਬਸ਼ਰਤੇ ਕਿ ਉਹ ਸਹੀ ਦਾਅ ਖੇਡੇ।

ਪੜ੍ਹੋ ਇਹ ਵੀ - ਹੁਣ ਨਹੀਂ ਵਿਕਣਗੀਆਂ ਨਕਲੀ ਦਵਾਈਆਂ ! QR ਕੋਡ ਲਗਾਉਣ ਦੀ ਤਿਆਰੀ 'ਚ ਸਰਕਾਰ

ਉਹ ਲੋਕ ਜੋ ਕਾਂਗਰਸ ਦੀ ਮਜ਼ਬੂਤ ਨੀਂਹ ਰੱਖ ਗਏ
ਕਾਂਗਰਸ ਕੋਲ ਅਜਿਹੇ ਨੇਤਾ ਰਹੇ ਹਨ, ਜਿਨ੍ਹਾਂ ਨੇ ਪਾਰਟੀ ਨੂੰ ਫਰਸ਼ ਤੋਂ ਅਰਸ਼ ਤੱਕ ਪਹੁੰਚਾਇਆ। ਕਈ ਸਾਲਾਂ ਤੱਕ ਉਹ ਵੱਖ-ਵੱਖ ਸੂਬਿਆਂ ਦੇ ਮੁੱਖ ਮੰਤਰੀ ਵੀ ਰਹੇ। ਚੌਧਰੀ ਬੰਸੀ ਲਾਲ ਹਰਿਆਣਾ ਦੇ ਸੀ. ਐੱਮ. ਰਹੇ ਅਤੇ ਉਨ੍ਹਾਂ ਨੇ ਉੱਥੇ ਵਰ੍ਹਿਆਂ ਤੱਕ ਕੰਮ ਕਰ ਕੇ ਕਾਂਗਰਸ ਨੂੰ ਮਜ਼ਬੂਤ ਕੀਤਾ। ਕੁਝ ਅਜਿਹਾ ਹੀ ਕੰਮ ਯਸ਼ਵੰਤ ਸਿੰਘ ਪਰਮਾਰ ਨੇ ਹਿਮਾਚਲ ਵਿਚ ਕੀਤਾ, ਜਿੱਥੇ ਉਹ ਸੀ. ਐੱਮ. ਤਾਂ ਰਹੇ ਹੀ, ਸਗੋਂ ਉਨ੍ਹਾਂ ਨੂੰ ‘ਆਰਕੀਟੈਕਟ ਆਫ਼ ਹਿਮਾਚਲ’ ਵੀ ਕਿਹਾ ਜਾਂਦਾ ਹੈ। ਪੰਜਾਬ ਵਿਚ ਕਾਂਗਰਸ ਕੋਲ ਪ੍ਰਤਾਪ ਸਿੰਘ ਕੈਰੋਂ ਵਰਗੇ ਨੇਤਾ ਰਹੇ ਹਨ, ਜਿਨ੍ਹਾਂ ਨੇ ਪੰਜਾਬ ਨੂੰ ਤਾਂ ਅੱਗੇ ਵਧਾਇਆ ਹੀ, ਨਾਲ ਹੀ ਕਾਂਗਰਸ ਨੂੰ ਵੀ ਦਿਸ਼ਾ ਦੇ ਕੇ ਅੱਗੇ ਤੋਰਿਆ। ਹੈਰਾਨੀ ਦੀ ਗੱਲ ਹੈ ਕਿ ਪੰਜਾਬ ਵਿਚ ਅੱਜ ਕਾਂਗਰਸ ਅਜਿਹੇ ਕਿਸੇ ਨੇਤਾ ਦੀ ਭਾਲ ਕਰਨ ਦੀ ਬਜਾਏ ਜੱਟ ਸਿੱਖ ਜਾਂ ਦਲਿਤ ਚਿਹਰਿਆਂ ’ਤੇ ਦਾਅ ਖੇਡਣ ਦੀ ਤਿਆਰੀ ਵਿਚ ਜੁਟੀ ਹੈ, ਜਿਸ ਕਾਰਨ ਕਾਂਗਰਸ ਪਹਿਲਾਂ ਹੀ ਹੌਲੀ-ਹੌਲੀ ਸੱਤਾ ਤੋਂ ਬਾਹਰ ਹੁੰਦੀ ਜਾ ਰਹੀ ਹੈ। ਪਾਰਟੀ ਵਰਕਰਾਂ ਦਾ ਕਹਿਣਾ ਹੈ ਕਿ ਵਰ੍ਹਿਆਂ ਤੱਕ ਕਾਂਗਰਸ ਲਈ ਕੰਮ ਕਰਨ ਵਾਲੇ ਨੇਤਾਵਾਂ ਦੀ ਅਣਦੇਖੀ ਨਾਲ ਸੰਗਠਨ ਦੇ ਅੰਦਰ ਅਸੰਤੋਸ਼ ਵਧ ਸਕਦਾ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਚੋਣਾਂ ਵਰਗੇ ਅਹਿਮ ਸਮੇਂ ’ਤੇ ਸਾਰੇ ਤਜ਼ਰਬੇਕਾਰ ਨੇਤਾਵਾਂ ਨੂੰ ਨਾਲ ਲੈ ਕੇ ਚੱਲਣਾ ਪਾਰਟੀ ਦੇ ਹਿੱਤ ਵਿੱਚ ਹੋਵੇਗਾ।

ਪੜ੍ਹੋ ਇਹ ਵੀ - ਭੂਚਾਲ ਦੇ ਤੇਜ਼ ਝਟਕਿਆ ਨਾਲ ਮੁੜ ਕੰਬਿਆ ਵੈਨੇਜ਼ੁਏਲਾ, ਅਜੇ ਵੀ ਮਲਬੇ ਹੇਠ ਦੱਬੇ ਹਜ਼ਾਰਾਂ ਲੋਕ

ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਦੀ ਗੱਲ ਕਰਨ ਵਾਲਾ ਕੋਈ ਨਹੀਂ
ਪੰਜਾਬ ਵਿਚ ਹੁਣ ਰਾਜਨੀਤੀ ਬਦਲ ਚੁੱਕੀ ਹੈ, ਕਾਂਗਰਸ ਦਾ ਇਸ ਰਾਜਨੀਤੀ ਤੋਂ ਅਲੱਗ-ਥਲੱਗ ਪੈਣਾ ਚਿੰਤਾ ਦਾ ਵਿਸ਼ਾ ਹੈ। ਪੰਜਾਬ ਨੂੰ ਲੈ ਕੇ ਜਿਸ ਤਰ੍ਹਾਂ ਭਾਜਪਾ ਲਗਾਤਾਰ ਮਜ਼ਬੂਤ ਦਾਅਵੇ ਕਰ ਰਹੀ ਹੈ ਅਤੇ ਸਰਕਾਰ ਬਣਾਉਣ ਦੇ ਦਾਅਵੇ ਕਰ ਰਹੀ ਹੈ, ਉੱਥੇ ਹੀ ਕਾਂਗਰਸ ਦੇ ਨੇਤਾ ਆਪਸ ਵਿਚ ਹੀ ਉਲਝੇ ਹੋਏ ਹਨ। ਨਾ ਕੋਈ ਪੰਜਾਬ ਦੀ ਅਤੇ ਨਾ ਹੀ ਕੋਈ ਪੰਜਾਬੀਅਤ ਦੀ ਗੱਲ ਕਰ ਰਿਹਾ ਹੈ। ਪੰਜਾਬ ਵਿਚ ਕਾਂਗਰਸ ਪੂਰੀ ਤਰ੍ਹਾਂ ਜੱਟ ਸਿੱਖ ਅਤੇ ਦਲਿਤ ਵੋਟ ਬੈਂਕ ’ਤੇ ਹੀ ਕੇਂਦਰਿਤ ਰਹਿੰਦੀ ਹੈ। ਬੇਸ਼ੱਕ ਸੂਬੇ ਵਿਚ ਹਿੰਦੂ ਵੋਟ ਬੈਂਕ ਨੇ ਸਮੇਂ-ਸਮੇਂ ’ਤੇ ਕਾਂਗਰਸ ਨੂੰ ਸਹਾਰਾ ਦੇ ਕੇ ਖੜ੍ਹਾ ਕੀਤਾ ਹੈ ਪਰ ਕਾਂਗਰਸ ਸ਼ਾਇਦ ਹਿੰਦੂ ਵਰਗ ਨੂੰ ਮਾਨ-ਸਨਮਾਨ ਦੇਣ ਵਿਚ ਅਸਫਲ ਰਹੀ ਹੈ।

ਕਾਂਗਰਸ ਵਿਚ ਵੈਸੇ ਤਾਂ ਗਿਣੇ-ਚੁਣੇ ਹਿੰਦੂ ਚਿਹਰੇ ਹਨ, ਜਿਨ੍ਹਾਂ ਦਾ ਪਾਰਟੀ ਨਾਲ ਪੁਰਾਣਾ ਨਾਤਾ ਹੈ। ਸੁਨੀਲ ਜਾਖੜ ਅਤੇ ਮਨੀਸ਼ ਤਿਵਾੜੀ ਪਾਰਟੀ ਦੇ ਵੱਡੇ ਹਿੰਦੂ ਨੇਤਾਵਾਂ ਵਿਚ ਗਿਣੇ ਜਾਂਦੇ ਰਹੇ ਹਨ ਪਰ ਹਿੰਦੂ ਵਰਗ ਦੀ ਅਣਦੇਖੀ ਕਾਰਨ ਜਾਖੜ ਪਾਰਟੀ ਛੱਡ ਕੇ ਚਲੇ ਗਏ। ਉਨ੍ਹਾਂ ਨੂੰ CM ਬਣਾਉਣ ਨੂੰ ਲੈ ਕੇ ਜਿਸ ਤਰ੍ਹਾਂ ਪਾਰਟੀ ਨੇ ਬੇਰੁਖ਼ੀ ਦਿਖਾਈ, ਉਸ ਤੋਂ ਇਹ ਗੱਲ ਸਾਫ਼ ਹੋ ਗਈ ਕਿ ਕਾਂਗਰਸ ਹਿੰਦੂ ਵਰਗ ਪ੍ਰਤੀ ਵੱਖਰਾ ਰਵੱਈਆ ਰੱਖਦੀ ਹੈ। ਕੁੱਲ ਮਿਲਾ ਕੇ ਹੁਣ ਮਨੀਸ਼ ਤਿਵਾੜੀ ਪਾਰਟੀ ਵਿਚ ਹਨ, ਜੋ ਵੱਡੇ ਹਿੰਦੂ ਨੇਤਾ ਵਜੋਂ ਜਾਣੇ ਜਾਂਦੇ ਹਨ। ਸੰਸਦ ਮੈਂਬਰ ਵਜੋਂ ਉਨ੍ਹਾਂ ਕੋਲ ਲੰਮਾ ਤਜ਼ਰਬਾ ਵੀ ਹੈ ਅਤੇ ਵੈਸੇ ਵੀ ਕਾਂਗਰਸ ਦੇ ਸੀਨੀਅਰ ਕੇਂਦਰੀ ਨੇਤਾਵਾਂ ਨਾਲ ਵੀ ਤਿਵਾੜੀ ਕੰਮ ਕਰ ਚੁੱਕੇ ਹਨ। ਸ਼ਾਇਦ ਉਨ੍ਹਾਂ ਦੇ ਤਜ਼ਰਬੇ ਨੂੰ ਦੇਖਦਿਆਂ ਹੀ ‘ਆਪ੍ਰੇਸ਼ਨ ਸਿੰਧੂਰ’ ਤੋਂ ਬਾਅਦ ਉਹ ਆਲ-ਪਾਰਟੀ ਪਾਰਲੀਮੈਂਟਰੀ ਡੈਲੀਗੇਸ਼ਨ (ਸਰਵ-ਦਲੀ ਸੰਸਦੀ ਵਫ਼ਦ) ਵਿਚ ਵੀ ਸ਼ਾਮਲ ਸਨ, ਜਿਸ ਨੂੰ ਵਿਦੇਸ਼ਾਂ ਵਿਚ ਭਾਰਤ ਦੇ ‘ਕਾਊਂਟਰ-ਟੈਰਰ ਨੈਰੇਟਿਵ’ (ਅੱਤਵਾਦ ਵਿਰੋਧੀ ਪੱਖ) ਨੂੰ ਮਜ਼ਬੂਤ ਕਰਨ ਲਈ ਭੇਜਿਆ ਗਿਆ ਸੀ।

ਪੜ੍ਹੋ ਇਹ ਵੀ - 'ਪਤਨੀ ਰਾਤ ਨੂੰ ਕਿਸੇ ਬੰਦੇ ਨਾਲ ਗੱਲ ਕਰੇ ਤਾਂ ਚਰਿੱਤਰ ’ਤੇ ਸ਼ੱਕ ਨਹੀਂ ਕਰ ਸਕਦੇ..!' ਦਿੱਲੀ ਅਦਾਲਤ ਦੀ ਟਿੱਪਣੀ

ਹਿੰਦੂ ਵਰਗ ਨੂੰ ਇਗਨੋਰ ਕਿਉਂ ਕਰਦੀ ਹੈ ਕਾਂਗਰਸ?
ਹਿੰਦੂ ਵਰਗ ਨੂੰ ਕਾਂਗਰਸ ਉਸ ਸਮੇਂ ਤੋਂ ਹੀ ਇਗਨੋਰ ਕਰਦੀ ਆ ਰਹੀ ਹੈ, ਜਦੋਂ ਤੋਂ ਪੰਜਾਬ, ਹਰਿਆਣਾ ਅਤੇ ਹਿਮਾਚਲ ਵੱਖ ਹੋਏ ਹਨ। 1966 ਤੋਂ ਲਗਾਤਾਰ ਪੰਜਾਬ ਵਿਚ ਜਦੋਂ ਵੀ ਕਾਂਗਰਸ ਦੀ ਸਰਕਾਰ ਰਹੀ, ਹਿੰਦੂ ਨੇਤਾਵਾਂ ਨੂੰ ਉਸ ਤਰ੍ਹਾਂ ਦੀ ਤਰਜੀਹ ਨਹੀਂ ਮਿਲੀ, ਜਿਸ ਤਰ੍ਹਾਂ ਜੱਟ ਸਿੱਖ ਜਾਂ ਦਲਿਤ ਨੇਤਾਵਾਂ ਨੂੰ ਦਿੱਤੀ ਗਈ, ਭਾਵੇਂ ਹੀ ਹਿੰਦੂ ਵੋਟਰਾਂ ਨੇ ਖੁੱਲ੍ਹ ਕੇ ਕਾਂਗਰਸ ਦਾ ਸਮਰਥਨ ਕੀਤਾ। ਇਸ ਸਮੇਂ ਵੀ ਪੰਜਾਬ ਵਿਚ ਕਾਂਗਰਸ ਦੇ ਪ੍ਰਧਾਨ ਵਜੋਂ ਰਾਜਾ ਵੜਿੰਗ ਦੇ ਰੂਪ ਵਿਚ ਜੱਟ ਸਿੱਖ ਨੇਤਾ ਤਾਇਨਾਤ ਹਨ, ਜਦਕਿ ਵਿਧਾਨ ਸਭਾ ਵਿਚ ਵਿਰੋਧੀ ਧਿਰ ਦੇ ਨੇਤਾ ਵਜੋਂ ਪ੍ਰਤਾਪ ਸਿੰਘ ਬਾਜਵਾ ਨਿਯੁਕਤ ਹਨ। ਅਗਲੇ ਪ੍ਰਧਾਨ ਦੀ ਗੱਲ ਤੁਰੀ ਤਾਂ ਫਿਰ ਤੋਂ ਜੱਟ ਸਿੱਖ ਨੇਤਾਵਾਂ ਅਤੇ ਦਲਿਤ ਨੇਤਾਵਾਂ ਦੇ ਨਾਵਾਂ ’ਤੇ ਹੀ ਚਰਚਾ ਘੁੰਮ ਰਹੀ ਹੈ। ਅਜਿਹੇ ਵਿਚ ਲਾਜ਼ਮੀ ਹੈ ਕਿ ਹਿੰਦੂ ਵੋਟਰਾਂ ਨੂੰ ਆਪਣੇ ਖੇਮੇ ਵਿਚ ਕਰਨ ਤੋਂ ਕਾਂਗਰਸ ਇਕ ਵਾਰ ਫਿਰ ਖੁੰਝ ਸਕਦੀ ਹੈ, ਸ਼ਾਇਦ ਉਸੇ ਤਰ੍ਹਾਂ ਜਿਸ ਤਰ੍ਹਾਂ 2022 ਦੀਆਂ ਚੋਣਾਂ ਵਿਚ ਹੋ ਚੁੱਕਾ ਹੈ।

ਪੜ੍ਹੋ ਇਹ ਵੀ - ਵਾਹਨ ਚਾਲਕਾਂ ਲਈ Good News : ਹੁਣ AI ਦੇ ਹੱਥ ਪ੍ਰਦੂਸ਼ਣ ਦੀ ਕਮਾਨ ! ਸੰਭਾਲੇਗਾ ਹਾਈਵੇ ਦਾ ਟਰੈਫ਼ਿਕ

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e