ਓਵਰਸਪੀਡ ਟਰਾਲੇ ਨੇ ਬਾਈਕ ਸਵਾਰ ਨੌਜਵਾਨਾਂ ਨੂੰ ਮਾਰੀ ਟੱਕਰ, 2 ਦੀ ਮੌਤ

ਲੁਧਿਆਣਾ, (ਰਾਜ)- ਫੈਕਟਰੀ ’ਚ ਕੰਮ ਕਰਨ ਵਾਲੇ ਦੋ ਨੌਜਵਾਨ ਕਿਸੇ ਕੰਮ ਦੇ ਸਿਲਸਿਲੇ ਵਿਚ ਬਾਈਕ ’ਤੇ ਨਿਕਲੇ। ਕੁਝ ਹੀ ਦੂਰ ਚੌਕ ਕੋਲ ਇਕ ਓਵਰਸਪੀਡ ਟਰਾਲੇ ਨੇ ਉਨ੍ਹਾਂ ਦੇ ਬਾਈਕ ਨੂੰ ਟੱਕਰ ਮਾਰ ਦਿੱਤੀ। ਦੋਵੇਂ ਨੌਜਵਾਨ ਸਿਰ ਦੇ ਭਾਰ ਸੜਕ ’ਤੇ ਡਿੱਗ ਗਏ। ਇਕ ਨੌਜਵਾਨ ਦੀ ਮੌਤੇ ’ਤੇ ਹੀ ਮੌਤ ਹੋ ਗਈ, ਜਦੋਂਕਿ ਦੂਜੇ ਨੇ ਹਸਪਤਾਲ ਪੁੱਜਣ ਤੋਂ ਪਹਿਲਾਂ ਹੀ ਦਮ ਤੋੜ ਦਿੱਤਾ।

ਹਾਦਸੇ ਤੋਂ ਬਾਅਦ ਟਰਾਲਾ ਚਾਲਕ ਮੌਕੇ ਤੋਂ ਫਰਾਰ ਹੋ ਗਿਆ ਪਰ ਰਾਹਗੀਰਾਂ ਨੇ ਟਰਾਲੇ ਦਾ ਨੰਬਰ ਨੋਟ ਕਰ ਲਿਆ। ਸੂਚਨਾ ਤੋਂ ਬਾਅਦ ਮੌਕੇ ’ਤੇ ਥਾਣਾ ਫੋਕਲ ਪੁਆਇੰਟ ਦੇ ਅਧੀਨ ਚੌਕੀ ਜੀਵਨ ਨਗਰ ਦੀ ਪੁਲਸ ਪੁੱਜੀ। ਲੋਕਾਂ ਨੇ ਟਰਾਲੇ ਦਾ ਨੰਬਰ ਪੁਲਸ ਨੂੰ ਦੇ ਦਿੱਤਾ। ਮ੍ਰਿਤਕਾਂ ਦੀ ਪਛਾਣ ਜਮਾਲਪੁਰ ਦੇ ਰਹਿਣ ਵਾਲੇ ਅੰਕੁਸ਼ ਭਾਰਤੀ (27) ਅਤੇ ਡਾਬਾ ਇਲਾਕੇ ਦੇ ਨਵਜੋਤ ਸਿੰਘ (19) ਵਜੋਂ ਹੋਈ ਹੈ। ਪੁਲਸ ਨੇ ਅਣਪਛਾਤੇ ਟਰਾਲਾ ਚਾਲਕ ਖਿਲਾਫ ਕੇਸ ਦਰਜ ਕਰ ਕੇ ਮੁਲਜ਼ਮ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ।

ਜਾਣਕਾਰੀ ਮੁਤਾਬਕ ਫੇਸ-6 ਵਿਚ ਕੁਮਾਰ ਐਕਸਪੋਰਟ ਨਾਂ ਨਾਲ ਫਰਮ ਹੈ। ਜਮਾਲਪੁਰ ਦਾ ਅੰਕੁਸ਼ ਅਤੇ ਡਾਬੇ ਦਾ ਨਵਜੋਤ ਸਿੰਘ ਦੋਵੇਂ ਹੀ ਕੁਮਾਰ ਐਕਸਪੋਰਟ ਵਿਚ ਬਤੌਰ ਅਾਪ੍ਰੇਟਰ ਕੰਮ ਕਰਦੇ ਸਨ। ਦੋਵਾਂ ਦੀ ਨਾਈਟ ਡਿਊਟੀ ਚੱਲ ਰਹੀ ਸੀ। ਐਤਵਾਰ ਦੀ ਰਾਤ ਦੋਵੇਂ 8 ਵਜੇ ਕੰਮ ’ਤੇ ਪੁੱਜ ਗਏ ਸਨ ਪਰ ਰਾਤ ਕਰੀਬ 9 ਵਜੇ ਫੈਕਟਰੀ ਦਾ ਕੋਈ ਕੰਮ ਸੀ। ਇਸ ਲਈ ਅੰਕੁਸ਼ ਆਪਣੇ ਬਾਈਕ ’ਤੇ ਨਵਜੋਤ ਨੂੰ ਲੈ ਕੇ ਉਕਤ ਕੰਮ ਲਈ ਨਿਕਲੇ ਸਨ ਕਿ ਕੁਝ ਹੀ ਦੂਰ ਜਦੋਂ ਉਹ ਗਣਪਤੀ ਚੌਕ ਕੋਲ ਪੁੱਜੇ ਤਾਂ ਇਕ ਪਾਸਿਓਂ ਆ ਰਹੇ ਓਵਰਸਪੀਡ ਟਰਾਲੇ ਨੇ ਉਨ੍ਹਾਂ ਨੂੰ ਦਰੜ ਦਿੱਤਾ। ਹਾਦਸਾ ਦੇਖ ਕੇ ਰਾਹਗੀਰ ਰੁਕ ਗਏ। ਉਨ੍ਹਾਂ ਦੇ ਰੁਕਣ ਤੋਂ ਪਹਿਲਾਂ ਹੀ ਟਰਾਲਾ ਚਾਲਕ ਟਰਾਲਾ ਲੈ ਕੇ ਫਰਾਰ ਹੋ ਗਿਆ ਸੀ ਪਰ ਇਕ ਰਾਹਗੀਰ ਨੇ ਟਰਾਲੇ ਦਾ ਨੰਬਰ ਨੋਟ ਕਰ ਲਿਆ ਸੀ। ਲੋਕਾਂ ਨੇ ਤੁਰੰਤ ਪੁਲਸ ਅਤੇ ਐਂਬੂਲੈਂਸ ਨੂੰ ਕਾਲ ਕੀਤੀ। ਉਨ੍ਹਾਂ ਨੇ ਦੇਖਿਆ ਕਿ ਹਾਦਸੇ ਵਿਚ ਨਵਜੋਤ ਸਿੰਘ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ ਸੀ ਪਰ ਅੰਕੁਸ਼ ਦੇ ਸਾਹ ਚੱਲ ਰਹੇ ਸਨ। ਕੁਝ ਹੀ ਦੇਰ ਵਿਚ ਪੁਲਸ ਅਤੇ ਐਂਬੂਲੈਂਸ ਮੌਕੇ ’ਤੇ ਪੁੱਜ ਗਈ। ਅੰਕੁਸ਼ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ਪਹੁੰਚਾਇਆ ਗਿਆ ਪਰ ਹਸਪਤਾਲ ਪੁੱਜਣ ’ਤੇ ਡਾਕਟਰਾਂ ਨੇ ਉਸ ਨੂੰ ਮਰਿਆ ਹੋਇਆ ਐਲਾਨ ਦਿੱਤਾ।

ਹਿਮਾਚਲ ਪ੍ਰਦੇਸ਼ ਦਾ ਅੰਕੁਸ਼, ਭਰਾਵਾਂ ਨਾਲ ਰੋਜ਼ੀ-ਰੋਟੀ ਲਈ ਆਇਆ ਸੀ ਲੁਧਿਆਣਾ

ਅੰਕਿਤ ਕੁਮਾਰ ਨੇ ਦੱਸਿਆ ਕਿ ਉਹ ਮੂਲ ਰੂਪ ਤੋਂ ਹਿਮਾਚਲ ਪ੍ਰਦੇਸ਼ ਦੇ ਰਹਿਣ ਵਾਲੇ ਹਨ। ਉਸ ਦਾ ਭਰਾ ਅੰਕੁਸ਼ ਅਤੇ ਮਾਸੀ ਦਾ ਲੜਕਾ ਰਿੰਕੂ ਤਿੰਨੋਂ ਕੰਮ ਲਈ ਲੁਧਿਆਣਾ ਆਏ ਸਨ। ਅੰਕਿਤ ਦਾ ਕਹਿਣਾ ਹੈ ਕਿ ਉਹ ਖੁਦ ਆਰਤੀ ਸਟੀਲ ’ਚ ਅਾਪ੍ਰੇਟਰ ਹੈ, ਜਦੋਂਕਿ ਅੰਕੁਸ਼ ਕੁਮਾਰ ਐਕਸਪੋਰਟ ਵਿਚ ਸੀ। ਉਹ ਤਿੰਨੋਂ ਜਮਾਲਪੁਰ ਸਥਿਤ ਰਸੀਲਾ ਨਗਰ ’ਚ ਕਿਰਾਏ ਦੇ ਮਕਾਨ ’ਚ ਰਹਿੰਦੇ ਸਨ। ਅੰਕਿਤ ਦਾ ਕਹਿਣਾ ਸੀ ਕਿ ਅੰਕੁਸ਼ ਦੇ ਸੁਪਨੇ ਬਹੁਤ ਵੱਡੇ ਸਨ ਪਰ ਹੁਣ ਸਭ ਕੁਝ ਖਤਮ ਹੋ ਗਿਆ।

ਦੋ ਭੈਣਾਂ ਦਾ ਇਕੱਲਾ ਭਰਾ ਸੀ ਨਵਜੋਤ ਸਿੰਘ

ਨਵਜੋਤ ਸਿੰਘ ਆਪਣੀਆਂ ਦੋ ਛੋਟੀਆਂ ਭੈਣਾਂ ਦਾ ਇਕੱਲਾ ਭਰਾ ਸੀ। ਛੋਟੀ ਉਮਰ ਵਿਚ ਹੀ ਨਵਜੋਤ ਨੇ ਪੜ੍ਹਾਈ ਛੱਡ ਕੇ ਕੰਮ ਸ਼ੁਰੂ ਕਰ ਦਿੱਤਾ ਸੀ ਤਾਂ ਕਿ ਆਪਣੇ ਮਾਤਾ-ਪਿਤਾ ਦਾ ਸਹਾਰਾ ਬਣ ਸਕੇ। ਨਵਜੋਤ ਦਾ ਪਿਤਾ ਜਗਤਾਰ ਸਿੰਘ ਵੀ ਕੰਪਨੀ ਵਿਚ ਹੀ ਕੰਮ ਕਰਦਾ ਸੀ। ਜਗਤਾਰ ਸਿੰਘ ਨੇ ਰੋ-ਰੋ ਕੇ ਦੱਸਿਆ ਕਿ ਉਸ ਦਾ ਇਕ ਹੀ ਬੇਟਾ ਸੀ, ਜੋ ਕਿ ਉਸ ਦੇ ਬੁਢਾਪੇ ਦਾ ਸਹਾਰਾ ਸੀ, ਉਹ ਵੀ ਖੋਹ ਗਿਆ।

ਮ੍ਰਿਤਕ ਦੋਵੇਂ ਨੌਜਵਾਨਾਂ ਦੀਆਂ ਲਾਸ਼ਾਂ ਦਾ ਪੋਸਟਮਾਰਟਮ ਕਰਵਾ ਕੇ ਪਰਿਵਾਰਾਂ ਵਾਲਿਆਂ ਹਵਾਲੇ ਕਰ ਦਿੱਤੀਆਂ ਹਨ। ਮੁਲਜ਼ਮ ਟਰਾਲਾ ਚਾਲਕ ਖਿਲਾਫ ਕੇਸ ਦਰਜ ਕੀਤਾ ਹੈ। ਟਰਾਲੇ ਦੇ ਨੰਬਰ ਤੋਂ ਪਤਾ ਲਗਾ ਕੇ ਉਸ ਨੂੰ ਜਲਦ ਕਾਬੂ ਕਰ ਲਿਆ ਜਾਵੇਗਾ।