ਸੈਂਟਰਲ ਜੇਲ੍ਹ ’ਚੋਂ ਫਿਰ 6 ਮੋਬਾਇਲ ਬਰਾਮਦ

ਲੁਧਿਆਣਾ (ਸਿਆਲ) : ਸੈਂਟਰਲ ਜੇਲ੍ਹ ’ਚ ਚੈਕਿੰਗ ਦੌਰਾਨ ਬਾਥਰੂਮਾਂ ਅਤੇ ਬੈਰਕਾਂ ’ਚੋਂ 6 ਮੋਬਾਇਲ ਬਰਾਮਦ ਹੋਣ ’ਤੇ ਪੁਲਸ ਨੇ ਹਵਾਲਾਤੀਆਂ ਅਤੇ ਅਣਪਛਾਤਿਆਂ ਖ਼ਿਲਾਫ਼ ਪ੍ਰਿਜ਼ਨ ਐਕਟ ਦੀ ਧਾਰਾ ਤਹਿਤ ਕੇਸ ਦਰਜ ਕੀਤਾ ਹੈ। ਡਵੀਜ਼ਨ ਨੰਬਰ-7 ਦੇ ਅਧੀਨ ਪੈਂਦੀ ਤਾਜਪੁਰ ਪੁਲਸ ਚੌਂਕੀ ’ਚ ਸਹਾਇਕ ਸੁਪਰੀਡੈਂਟ ਸਤਨਾਮ ਸਿੰਘ ਨੇ ਭੇਜੇ ਸ਼ਿਕਾਇਤ-ਪੱਤਰ ’ਚ ਦੱਸਿਆ ਕਿ ਜੇਲ੍ਹ ਦੇ ਅੰਦਰ ਚੈਕਿੰਗ ਮੁਹਿੰਮ ਚਲਾਈ ਗਈ ਸੀ।

ਜਿਸ ਦੌਰਾਨ ਬੈਰਕਾਂ ਅਤੇ ਬਾਥਰੂਮਾਂ ’ਚੋਂ 3 ਅਤੇ ਹਵਾਲਾਤੀਆਂ ਤੋਂ 3 ਮੋਬਾਇਲ ਬਰਾਮਦ ਕੀਤੇ ਗਏ। ਪੁਲਸ ਜਾਂਚ ਅਧਿਕਾਰੀ ਗੁਰਦਿਆਲ ਸਿੰਘ ਨੇ ਦੱਸਿਆ ਕਿ ਨਾਮਜ਼ਦ ਕੀਤੇ ਹਵਾਲਾਤੀਆਂ ਦੀ ਪਛਾਣ ਰੌਬਿਨ ਕੁਮਾਰ ਉਰਫ਼ ਰੌਕੀ, ਵਿਸ਼ਾਲ ਕੁਮਾਰ, ਅਜੇ ਕੁਮਾਰ ਵਜੋਂ ਹੋਈ ਹੈ।