ਪੋਲਟਰੀ ਫਾਰਮ ਦੇ ਸ਼ੈੱਡ ''ਚ ਲੱਗੀ ਭਿਆਨਕ ਅੱਗ

ਅਬੋਹਰ (ਸੁਨੀਲ) : ਨੇੜਲੇ ਪਿੰਡ ਢਾਬਾ ਕੋਕਰੀਆਂ 'ਚ ਅੱਜ ਦੁਪਹਿਰ ਇੱਕ ਪੋਲਟਰੀ ਫਾਰਮ 'ਚ ਭਿਆਨਕ ਅੱਗ ਲੱਗ ਗਈ, ਜਿਸ ਕਾਰਨ ਲਗਭਗ 4,000 ਮੁਰਗੀਆਂ ਦੀ ਮੌਤ ਹੋ ਗਈ। ਇਸ ਘਟਨਾ 'ਚ ਪੋਲਟਰੀ ਮਾਲਕ ਨੂੰ ਲੱਖਾਂ ਰੁਪਏ ਦਾ ਨੁਕਸਾਨ ਹੋਇਆ। ਅਬੋਹਰ ਤੋਂ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਨੇ ਅੱਗ ’ਤੇ ਕਾਬੂ ਪਾਇਆ। ਦੱਸਿਆ ਜਾ ਰਿਹਾ ਹੈ ਕਿ ਅੱਗ ਸ਼ਾਰਟ ਸਰਕਟ ਕਾਰਨ ਲੱਗੀ ਹੈ। ਜਾਣਕਾਰੀ ਦਿੰਦੇ ਹੋਏ ਮਨਦੀਪ ਸਿੰਘ ਪੁੱਤਰ ਖਰੈਤ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦਾ ਕਰੀਬ 3-4 ਕਨਾਲਾਂ ਵਿੱਚ ਫੈਲਿਆ ਇੱਕ ਪੋਲਟਰੀ ਫਾਰਮ ਹੈ, ਜਿਸ 'ਚ ਲਗਭਗ 8,000 ਮੁਰਗੀਆਂ ਹਨ। ਅੱਜ ਦੁਪਹਿਰ 12 ਵਜੇ ਸ਼ਾਰਟ ਸਰਕਟ ਕਾਰਨ ਪੋਲਟਰੀ ਫਾਰਮ 'ਚ ਅਚਾਨਕ ਅੱਗ ਲੱਗ ਗਈ।

ਅੱਗ ਤੇਜ਼ੀ ਨਾਲ ਪੂਰੇ ਸ਼ੈੱਡ 'ਚ ਫੈਲ ਗਈ। ਜਿਸ 'ਤੇ ਉਨ੍ਹਾਂ ਨੇ ਫਾਇਰ ਵਿਭਾਗ ਨੂੰ ਸੂਚਿਤ ਕੀਤਾ ਅਤੇ ਪਿੰਡ ਵਿੱਚ ਵੀ ਅਨਾਊਂਸਮੈਂਟ ਕਰਵਾਈ। ਜਿਸ 'ਤੇ ਪਿੰਡ ਵਾਸੀ ਅੱਗ ਬੁਝਾਉਣ ਪਹੁੰਚੇ। ਸੂਚਨਾ ਮਿਲਣ ’ਤੇ ਅਬੋਹਰ ਤੋਂ ਦੋ ਫਾਇਰ ਗੱਡੀਆਂ ਪਹੁੰਚਿਆਂ। ਡਰਾਈਵਰ ਇੰਦਰਜੀਤ ਅਤੇ ਬੂਟਾ ਸਿੰਘ ਨੇ ਫਾਇਰਮੈਨ ਭੂਪੇਂਦਰ ਅਤੇ ਪ੍ਰਵੀਨ ਨਾਲ ਮਿਲ ਕੇ ਲਗਭਗ ਡੇਢ ਘੰਟੇ ਦੀ ਮਿਹਨਤ ਤੋਂ ਬਾਅਦ ਅੱਗ ’ਤੇ ਕਾਬੂ ਪਾਇਆ। ਇਸ ਭਿਆਨਕ ਅੱਗ ਵਿੱਚ ਲਗਭਗ 50 ਫ਼ੀਸਦੀ ਮੁਰਗੀਆਂ ਮਰ ਗਈਆਂ, ਅਤੇ ਅੱਧਾ ਸ਼ੈੱਡ ਵੀ ਤਬਾਹ ਹੋ ਗਿਆ। ਇਸ ਹਾਦਸੇ ਵਿੱਚ ਲੱਖਾਂ ਰੁਪਏ ਦਾ ਨੁਕਸਾਨ ਹੋਇਆ।