ਜਲੰਧਰ ਜ਼ਿਲ੍ਹੇ ''ਚ ਵੱਧ ਰਿਹੈ ਕੋਰੋਨਾ, ਇਕੋ ਦਿਨ ਸਾਹਮਣੇ ਆਏ 132 ਨਵੇਂ ਮਾਮਲੇ ਤੇ 2 ਦੀ ਹੋਈ ਮੌਤ
Tuesday, Aug 18, 2020 - 10:19 PM (IST)
ਜਲੰਧਰ,(ਰੱਤਾ)–ਜ਼ਿਲੇ 'ਚ ਕੋਰੋਨਾ ਦਾ ਕਹਿਰ ਲਗਾਤਾਰ ਜਾਰੀ ਹੈ ਅਤੇ ਇਸ ਦੀ ਲਪੇਟ ਵਿਚ ਆਉਣ ਵਾਲੇ ਮਰੀਜ਼ਾਂ ਦਾ ਅੰਕੜਾ ਦਿਨੋ-ਦਿਨ ਵਧਦਾ ਹੀ ਜਾ ਰਿਹਾ ਹੈ। ਜ਼ਿਲ੍ਹੇ 'ਚ ਅੱਜ 132 ਹੋਰ ਲੋਕਾਂ ਦੀ ਰਿਪੋਰਟ ਕੋਰੋਨਾ ਪਾਜ਼ੇਟਿਵ ਆਈ ਅਤੇ 2 ਦੀ ਮੌਤ ਹੋ ਗਈ। ਜਾਣਕਾਰੀ ਮੁਤਾਬਕ ਸਿਹਤ ਵਿਭਾਗ ਨੂੰ ਮੰਗਲਵਾਰ 127 ਲੋਕਾਂ ਦੀ ਕੋਰੋਨਾ ਰਿਪੋਰਟ ਪਾਜ਼ੇਟਿਵ ਪ੍ਰਾਪਤ ਹੋਈ, ਜਿਨ੍ਹਾਂ ਵਿਚੋਂ 6 ਲੋਕ ਦੂਜੇ ਜ਼ਿਲ੍ਹਿਆਂ ਦੇ ਸਨ। ਪਾਜ਼ੇਟਿਵ ਆਏ ਲੋਕਾਂ ਵਿਚ 2 ਬੈਂਕਾਂ ਦੇ ਮੈਨੇਜਰ ਅਤੇ ਫਿਲੌਰ ਥਾਣੇ ਦੇ ਕੁਝ ਮੁਲਾਜ਼ਮ ਵੀ ਸ਼ਾਮਲ ਹਨ। ਦੂਜੇ ਪਾਸੇ ਏਕਤਾ ਨਗਰ ਦੇ 70 ਸਾਲਾ ਬੱਚੂ ਲਾਲ ਅਤੇ ਬੋਲੀਨਾ ਦੋਆਬਾ ਦੀ 58 ਸਾਲਾ ਦਲਜੀਤ ਕੌਰ ਦੀ ਕੋਰੋਨਾ ਨਾਲ ਮੌਤ ਹੋ ਗਈ।
ਬਸਤੀ ਸ਼ੇਖ ਤੇ ਗੁਰੂ ਨਾਨਕਪੁਰਾ ਵਿਚ ਮਿਲੇ ਕੋਰੋਨਾ ਦੇ ਕਈ ਮਰੀਜ਼
ਮੰਗਲਵਾਰ ਨੂੰ ਜਿਨ੍ਹਾਂ ਲੋਕਾਂ ਦੀ ਕੋਰੋਨਾ ਰਿਪੋਰਟ ਪਾਜ਼ੇਟਿਵ ਆਈ, ਉਨ੍ਹਾਂ ਵਿਚੋਂ ਕਈ ਲੋਕ ਬਸਤੀ ਸ਼ੇਖ ਅਤੇ ਗੁਰੂ ਨਾਨਕਪੁਰਾ ਦੇ ਰਹਿਣ ਵਾਲੇ ਦੱਸੇ ਜਾਂਦੇ ਹਨ। ਵਰਣਨਯੋਗ ਹੈ ਕਿ ਇਸ ਤੋਂ ਪਹਿਲਾਂ ਇਕੋ ਸਮੇਂ ਤੇਲ ਵਾਲੀ ਗਲੀ ਅਤੇ ਸ਼ੇਖਾਂ ਬਾਜ਼ਾਰ ਦੇ ਵੀ ਕਈ ਲੋਕ ਪਾਜ਼ੇਟਿਵ ਪਾਏ ਜਾ ਚੁੱਕੇ ਹਨ।
263 ਦੀ ਰਿਪੋਰਟ ਆਈ ਨੈਗੇਟਿਵ ਤੇ 68 ਨੂੰ ਮਿਲੀ ਛੁੱਟੀ
ਮੰਗਲਵਾਰ ਨੂੰ 263 ਲੋਕਾਂ ਦੀ ਕੋਰੋਨਾ ਰਿਪੋਰਟ ਨੈਗੇਟਿਵ ਆਈ ਅਤੇ ਇਲਾਜ ਅਧੀਨ ਕੋਰੋਨਾ ਪਾਜ਼ੇਟਿਵ ਮਰੀਜ਼ਾਂ ਵਿਚੋਂ 68 ਹੋਰਨਾਂ ਨੂੰ ਛੁੱਟੀ ਮਿਲ ਗਈ। ਸਿਹਤ ਵਿਭਾਗ ਨੇ 1174 ਹੋਰ ਲੋਕਾਂ ਦੇ ਸੈਂਪਲ ਲੈ ਕੇ ਕੋਰੋਨਾ ਦੀ ਪੁਸ਼ਟੀ ਲਈ ਭੇਜੇ ਹਨ।
