ਏਕਤਾ ਪਾਰਟੀ ਵੱਲੋਂ ਖੈਰਾਬਾਦ ਦਸੂਹਾ ਵਿਖੇ ਸਮਾਗਮ ਅੱਜ

ਹੁਸ਼ਿਆਰਪੁਰ (ਝਾਵਰ)-ਪੰਜਾਬ ਏਕਤਾ ਪਾਰਟੀ ਵੱਲੋਂ ਜ਼ਿਲਾ ਪੱਧਰੀ ਸਮਾਗਮ ਦਸੂਹਾ ਨਜ਼ਦੀਕ ਪਿੰਡ ਖੈਰਾਬਾਦ ਵਿਖੇ ਅੱਜ 5 ਮਾਰਚ ਨੂੰ ਹੋ ਰਿਹਾ ਹੈ। ਸਮਾਗਮ ’ਚ ਪੰਜਾਬ ਏਕਤਾ ਪਾਰਟੀ ਦੇ ਪ੍ਰਧਾਨ ਸੁਖਪਾਲ ਸਿੰਘ ਖਹਿਰਾ ਦੁਪਹਿਰ 12 ਵਜੇ ਪਹੁੰਚਣਗੇ, ਜਿੱਥੇ ਉਨ੍ਹਾਂ ਦਾ ਪਾਰਟੀ ਵਰਕਰਾਂ ਵੱਲੋਂ ਭਰਪੂਰ ਸਵਾਗਤ ਕੀਤਾ ਜਾਵੇਗਾ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਪਾਰਟੀ ਦੇ ਸੀਨੀਅਰ ਅਹੁਦੇਦਾਰ ਮਦਨ ਲਾਲ ਸੂਦ, ਬਲਵੀਰ ਕੌਰ ਫੁੱਲ, ਯਾਦਵਿੰਦਰ ਸਿੰਘ ਫੁੱਲ ਨੇ ਦੱਸਿਆ ਕਿ ਸਮਾਗਮ ਦੌਰਾਨ ਕਾਂਗਸੀ ਆਈ ਦੇ ਸੀਨੀਅਰ ਆਗੂ ਤੇ ਬਾਰ ਐਸੋਸੀਏਸ਼ਨ ਦਸੂਹਾ ਦੇ ਸਾਬਕਾ ਪ੍ਰਧਾਨ ਭੂਪਿੰਦਰ ਸਿੰਘ ਘੁੰਮਣ ਸੈਂਕਡ਼ੇ ਸਾਥੀਆਂ ਸਮੇਤ ਪੰਜਾਬ ਏਕਤਾ ਪਾਰਟੀ ’ਚ ਸ਼ਾਮਲ ਹੋਣਗੇ। ਜਿਨ੍ਹਾਂ ਨੂੰ ਪਾਰਟੀ ਪ੍ਰਧਾਨ ਵਿਸ਼ੇਸ਼ ਤੌਰ ’ਤੇ ਸਨਮਾਨਤ ਕਰਨਗੇ। ਇਸ ਸਬੰਧੀ ਐਡਵੋਕੇਟ ਭੁਪਿੰਦਰ ਸਿੰਘ ਘੁੰਮਣ ਨੇ ਕਿਹਾ ਕਿ ਕਾਂਗਰਸ ਪਾਰਟੀ ਨੇ ਜੋ ਲੋਕਾਂ ਨਾਲ ਵਾਅਦੇ ਕੀਤੇ ਸਨ ਉਨ੍ਹਾਂ ’ਚੋਂ ਕਿਸੇ ਨੂੰ ਵੀ ਪੂਰਾ ਨਹੀਂ ਕੀਤਾ। ਲੋਕ ਹਿੱਤਾਂ ਨੂੰ ਦੇਖਦੇ ਹੋਏ ਅਸੀਂ ਇਹ ਕਦਮ ਉਠਾ ਰਹੇ ਹਾਂ। ਇਸ ਮੌਕੇ ਫਕੀਰ ਸਿੰਘ, ਜਗਦੀਪ ਕੌਰ ਨਾਗਰਾ, ਬਲਜੀਤ ਸੈਣੀ, ਜੋਗਿੰਦਰ ਸਿੰਘ ਭਾਨਾ ਆਦਿ ਹਾਜ਼ਰ ਸਨ।