ਇੰਝ ਪੁਲਸ ਨੂੰ ਚਕਮਾ ਦਿੰਦੀ ਰਹੀ ਹਨੀਪ੍ਰੀਤ

ਚੰਡੀਗੜ੍ਹ - ਡੇਰਾ ਮੁਖੀ ਦੀ ਰਾਜ਼ਦਾਰ ਹਨੀਪ੍ਰੀਤ ਦੀ ਗੱਡੀ 38 ਦਿਨਾਂ ਵਿਚ ਹਰਿਆਣਾ ਨਾਲ ਲੱਗਦੇ ਸਿਰਫ਼ 4 ਸੂਬਿਆਂ ਵਿਚ ਹੀ ਦੌੜਦੀ ਰਹੀ। ਇਹ ਖੁਲਾਸਾ ਖੁਦ ਹਨੀਪ੍ਰੀਤ ਨੇ ਹੀ ਕੀਤਾ ਹੈ। ਹਨੀਪ੍ਰੀਤ ਅਨੁਸਾਰ ਉਹ ਕਿਤੇ ਦੂਰ ਨਹੀਂ ਸੀ, ਬਲਕਿ ਆਪਣੇ ਆਸ-ਪਾਸ ਦੇ ਕਰੀਬੀਆਂ ਕੋਲ ਹੀ ਪਨਾਹ ਲੈਂਦੀ ਰਹੀ। ਹਨੀਪ੍ਰੀਤ ਇਨ੍ਹਾਂ 38 ਦਿਨਾਂ ਵਿਚ ਹਰਿਆਣਾ 'ਚ ਰੋਹਤਕ ਦੇ ਸਿਰਸਾ, ਰਾਜਸਥਾਨ ਦੇ ਹਨੂਮਾਨਗੜ੍ਹ ਤੇ ਸ਼੍ਰੀਗੰਗਾਨਗਰ ਤੇ ਦਿੱਲੀ ਦੇ ਕਈ ਸਥਾਨਾਂ 'ਤੇ ਰਹੀ। ਅਜਿਹੇ ਵਿਚ ਸਵਾਲ ਇਹ ਉਠਦਾ ਹੈ ਕਿ ਆਖਿਰ ਹਰਿਆਣਾ ਪੁਲਸ ਦੀ ਐੱਸ. ਆਈ. ਟੀ. ਹਨੀਪ੍ਰੀਤ ਦੀ ਗ੍ਰਿਫਤਾਰੀ ਨੂੰ ਲੈ ਕੇ ਗੰਭੀਰ ਨਹੀਂ ਸੀ ਜਾਂ ਫਿਰ ਉਹ ਹਨੀਪ੍ਰੀਤ ਦੀ ਅੱਖ ਮਿਚੋਲੀ ਨੂੰ ਸਮਝ ਨਹੀਂ ਸਕੀ। ਖਾਸ ਗੱਲ ਹੈ ਕਿ ਮੰਗਲਵਾਰ ਨੂੰ ਮੀਡੀਆ ਚੈਨਲਾਂ 'ਤੇ ਹਨੀਪ੍ਰੀਤ ਦਾ ਇੰਟਰਵਿਊ ਪ੍ਰਸਾਰਿਤ ਹੋਣ ਤੋਂ ਬਾਅਦ ਵੀ ਐੱਸ. ਆਈ. ਟੀ. ਨੂੰ ਹਨੀਪ੍ਰੀਤ ਤੱਕ ਪਹੁੰਚਣ ਵਿਚ ਕਾਫੀ ਸਮਾਂ ਲੱਗ ਗਿਆ। ਕਰੀਬ ਇਕ ਘੰਟੇ ਤੱਕ ਹਨੀਪ੍ਰੀਤ ਦੀ ਗ੍ਰਿਫ਼ਤਾਰੀ ਦਾ ਸਿਹਰਾ ਆਪਣੇ ਸਿਰ ਸਜਾਉਣ ਲਈ ਪੰਜਾਬ ਤੇ ਹਰਿਆਣਾ ਪੁਲਸ ਉਲਝਦੀ ਰਹੀ। ਬਾਅਦ ਵਿਚ ਅਧਿਕਾਰੀਆਂ ਦੇ ਦਖਲ ਤੋਂ ਬਾਅਦ ਪੰਜਾਬ ਤੋਂ ਹਨੀਪ੍ਰੀਤ ਦੀ ਗ੍ਰਿਫਤਾਰੀ ਦਿਖਾਈ। 
ਧਿਆਨਯੋਗ ਹੈ ਕਿ ਬੀਤੀ 25 ਅਗਸਤ ਨੂੰ ਪੰਚਕੂਲਾ ਹਿੰਸਾ ਦੇ ਦਿਨ ਡੇਰਾ ਮੁਖੀ ਦੇ ਸੁਨਾਰੀਆ ਜੇਲ ਜਾਣ ਦੇ ਬਾਅਦ ਤੋਂ ਹਨੀਪ੍ਰੀਤ ਗਾਇਬ ਸੀ। ਹਰਿਆਣਾ ਪੁਲਸ ਦੀ ਐੱਸ. ਆਈ. ਟੀ. ਤੇ ਹਨੀਪ੍ਰੀਤ ਵਿਚਕਾਰ ਪਿਛਲੇ 38 ਦਿਨਾਂ ਤੋਂ ਲੁਕਣਮੀਟੀ ਦਾ ਖੇਡ ਚੱਲ ਰਿਹਾ ਸੀ ਜਦਕਿ ਰੋਹਤਕ ਤੋਂ ਬਾਅਦ ਹਨੀਪ੍ਰੀਤ ਦੋ ਦਿਨ ਸਿਰਸਾ ਡੇਰੇ ਵਿਚ ਰਹੀ ਤੇ ਉਸ ਤੋਂ ਬਾਅਦ ਫਿਰ ਰਾਜਸਥਾਨ ਦੇ ਹਨੂਮਾਨਗੜ੍ਹ ਆਪਣੇ ਰਿਸ਼ੇਤਦਾਰ ਦੇ ਘਰ। ਰਾਜਸਥਾਨ 'ਚ ਕਈ ਟਿਕਾਣਿਆਂ 'ਤੇ ਰਹਿਣ ਦੌਰਾਨ ਹੀ ਹਰਿਆਣਾ ਪੁਲਸ ਵਲੋਂ ਹਨੀਪ੍ਰੀਤ ਦੇ ਨੇਪਾਲ ਪਹੁੰਚਣ ਦਾ ਦਾਅਵਾ ਕੀਤਾ ਗਿਆ ਤੇ ਨੇਪਾਲ ਦੇ ਰੇਡੀਓ ਤੇ ਟੀ. ਵੀ. ਚੈਨਲਾਂ 'ਤੇ ਖ਼ਬਰਾਂ ਜਾਰੀ ਕੀਤੀਆਂ ਗਈਆਂ ਪਰ ਉਥੇ ਵੀ ਪੁਲਸ ਨੂੰ ਕੋਈ ਕਾਮਯਾਬੀ ਨਹੀਂ ਮਿਲੀ। ਪੁਲਸ ਜਦ ਤੱਕ ਹਨੀਪ੍ਰੀਤ ਦੇ ਕੋਲ ਪਹੁੰਚਦੀ ਤਾਂ ਉਹ ਆਪਣਾ ਟਿਕਾਣਾ ਬਦਲ ਲੈਂਦੀ ਸੀ। 

24 ਘੰਟੇ ਚੰਡੀਗੜ੍ਹ ਤੇ ਮੋਹਾਲੀ ਖੇਤਰ 'ਚ ਰਹੀ ਘੁੰਮਦੀ   
ਮੰਗਲਵਾਰ ਦੁਪਹਿਰ ਬਾਅਦ ਅਧਿਕਾਰਤ ਤੌਰ 'ਤੇ ਹਰਿਆਣਾ ਪੁਲਸ ਦੇ ਹੱਥੇ ਚੜ੍ਹੀ ਹਨੀਪ੍ਰੀਤ ਸੋਮਵਾਰ ਸ਼ਾਮ ਤੋਂ ਹੀ ਚੰਡੀਗੜ੍ਹ ਦੇ ਮੋਹਾਲੀ ਦੇ ਖੇਤਰ ਵਿਚ ਘੁੰਮਦੀ ਰਹੀ। ਦੱਸਿਆ ਗਿਆ ਕਿ ਇਸੇ ਦੌਰਾਨ ਉਸ ਨੇ ਟੀ. ਵੀ. ਚੈਨਲਾਂ 'ਤੇ ਇੰਟਰਵਿਊ ਦਿੱਤੀ। ਇਸ ਦੇ ਬਾਵਜੂਦ ਹਰਿਆਣਾ ਪੁਲਸ ਨੂੰ ਇਸ ਦੀ ਖ਼ਬਰ ਨਹੀਂ ਲੱਗੀ। ਜਦੋਂ ਮੰਗਲਵਾਰ ਦੁਪਹਿਰ ਤੱਕ ਇਕ ਚਰਚਾ ਉਠੀ ਕਿ ਹਨੀਪ੍ਰੀਤ ਪੰਜਾਬ ਪੁਲਸ ਦੇ ਕਬਜ਼ੇ ਵਿਚ ਹੈ ਤਾਂ ਹਰਿਆਣਾ ਪੁਲਸ ਦੇ ਹੱਥ-ਪੈਰ ਫੁੱਲ ਗਏ। ਪੰਜਾਬ ਪੁਲਸ ਨੇ ਇਕ ਵਾਰ ਤਾਂ ਹਰਿਆਣਾ ਪੁਲਸ ਦੀ ਸਾਖ ਨੂੰ ਕਟਹਿਰੇ ਵਿਚ ਖੜ੍ਹਾ ਕਰ ਦਿੱਤਾ। ਸੂਤਰਾਂ ਦੀ ਮੰਨੀਏ ਤਾਂ ਮੋਹਾਲੀ ਪੁਲਸ ਨੇ ਕਿਹਾ ਕਿ ਉਹ ਹਨੀਪ੍ਰੀਤ ਨੂੰ ਅਦਾਲਤ ਵਿਚ ਪੇਸ਼ ਕਰੇਗੀ ਤੇ ਹਰਿਆਣਾ ਪੁਲਸ ਉਸ ਨੂੰ ਉਥੋਂ ਰਿਮਾਂਡ ਲੈ ਕੇ ਹਾਸਲ ਕਰੇ। ਇਸ ਤੋਂ ਬਾਅਦ ਹਰਿਆਣਾ ਪੁਲਸ ਦੇ ਅਧਿਕਾਰੀਆਂ ਨੇ ਪੰਜਾਬ ਪੁਲਸ ਦੇ ਅਧਿਕਾਰੀਆਂ ਨਾਲ ਸੰਪਰਕ ਸਾਧਿਆ। ਕਰੀਬ ਅੱਧਾ ਘੰਟਾ ਉਨ੍ਹਾਂ ਨੂੰ ਆਪਸ ਵਿਚ ਸਹਿਮਤੀ ਬਣਾਉਣ 'ਚ ਲੱਗ ਗਿਆ। ਇਸ ਤੋਂ ਬਾਅਦ ਹਰਿਆਣਾ ਪੁਲਸ ਨੇ ਆਪਣੀ ਇੱਜ਼ਤ ਬਚਾਉਣ ਲਈ ਹਨੀਪ੍ਰੀਤ ਨੂੰ ਪੰਜਾਬ ਦੇ ਜ਼ੀਰਕਪੁਰ ਤੋਂ ਗ੍ਰਿਫਤਾਰ ਕੀਤਾ। 
ਸਹੇਲੀ ਨਾਲ ਜ਼ੀਰਕਪੁਰ ਦੇ ਰੇਸਤਰਾਂ 'ਚ ਸੀ ਮੌਜੂਦ 
ਹਰਿਆਣਾ ਪੁਲਸ ਦੀ ਐੱਸ. ਆਈ. ਟੀ. ਵਲੋਂ ਬੇਸ਼ੱਕ ਹਨੀਪ੍ਰੀਤ ਦੀ ਗ੍ਰਿਫਤਾਰੀ ਦਾ ਦਾਅਵਾ ਜ਼ੀਰਕਪੁਰ ਦੀ ਪਟਿਆਲਾ ਰੋਡ ਤੋਂ ਚਲਦੀ ਗੱਡੀ 'ਚੋਂ ਕੀਤਾ ਗਿਆ ਹੋਵੇ ਪਰ ਅਸਲ 'ਚ ਉਹ ਇਕ ਰੇਸਤਰਾਂ 'ਚ ਸੀ। ਇਹ ਰੇਸਤਰਾਂ ਜ਼ੀਰਕਪੁਰ ਦੇ ਪਟਿਆਲਾ ਰੋਡ 'ਤੇ ਹੈ, ਜੋ ਹਨੀਪ੍ਰੀਤ ਦੇ ਕਿਸੇ ਕਰੀਬੀ ਦਾ ਦੱਸਿਆ ਜਾ ਰਿਹਾ ਹੈ। ਹਨੀਪ੍ਰੀਤ ਦੇ ਨਾਲ ਉਸ ਦੀ ਸਹੇਲੀ ਨੂੰ ਵੀ ਗ੍ਰਿਫਤਾਰ ਕੀਤਾ ਹੈ।
ਪੁਲਸ ਰਿਮਾਂਡ 'ਚ ਹਨੀਪ੍ਰੀਤ ਤੋਂ ਕਰਵਾਏਗੀ ਖੁਲਾਸਾ 
ਐੱਸ. ਆਈ. ਟੀ. ਦੇ ਆਈ. ਜੀ. ਤੇ ਪੰਚਕੂਲਾ ਪੁਲਸ ਕਮਿਸ਼ਨਰ ਏ. ਐੱਸ. ਚਾਵਲਾ ਨੇ ਕਿਹਾ ਕਿ ਬੁੱਧਵਾਰ ਨੂੰ ਕੋਰਟ 'ਚ ਪੇਸ਼ ਕਰਨ ਤੋਂ ਬਾਅਦ ਹਨੀਪ੍ਰੀਤ ਦਾ ਇਕ ਹਫਤੇ ਦਾ ਰਿਮਾਂਡ ਮੰਗਿਆ ਜਾਵੇਗਾ। ਇਸ ਦੇ ਇਲਾਵਾ ਹਨੀਪ੍ਰੀਤ ਤੋਂ ਪੁੱਛਗਿੱਛ 'ਚ ਇਹ ਵੀ ਪਤਾ ਕੀਤਾ ਜਾਵੇਗਾ ਕਿ ਬੀਤੇ 38 ਦਿਨਾਂ ਤਕ ਕਿਸ-ਕਿਸ ਨੇ ਉਸ ਨੂੰ ਸ਼ਰਨ ਦਿੱਤੀ ਅਤੇ ਉਹ ਪੰਚਕੂਲਾ ਤੋਂ ਰੋਹਤਕ ਜਾਣ ਦੇ ਬਾਅਦ ਕਿੱਥੇ-ਕਿੱਥੇ ਗਈ ਸੀ। ਚਾਵਲਾ ਨੇ ਇਹ ਵੀ ਇਸ਼ਾਰਾ ਕੀਤਾ ਕਿ ਹਨੀਪ੍ਰੀਤ ਨੂੰ ਸ਼ਰਨ ਦੇਣ ਵਾਲਿਆਂ ਦੀ ਲਿਸਟ ਤਿਆਰ ਕੀਤੀ ਜਾਵੇਗੀ।
- 25 ਅਗਸਤ ਨੂੰ ਡੇਰਾ ਮੁਖੀ ਨੂੰ ਦੋਸ਼ੀ ਕਰਾਰ ਦਿੱਤੇ ਜਾਣ ਬਾਅਦ ਹਨੀਪ੍ਰੀਤ ਸੁਨਾਰੀਆ ਜੇਲ ਪਹੁੰਚੀ ਸੀ।
- 27 ਅਗਸਤ ਨੂੰ ਉਹ ਸਿਰਸਾ ਦੇ ਡੇਰਾ ਹੈੱਡਕੁਆਰਟਰ 'ਚ ਗਈ।
- 28-29 ਅਗਸਤ ਨੂੰ ਹਨੀਪ੍ਰੀਤ ਰਾਜਸਥਾਨ ਦੇ ਹਨੂਮਾਨਗੜ੍ਹ ਸਥਿਤ ਆਪਣੇ ਨਜ਼ਦੀਕੀ ਰਿਸ਼ਤੇਦਾਰ ਦੇ ਘਰ ਠਹਿਰੀ।
- 30 ਅਗਸਤ ਨੂੰ ਪੰਚਕੂਲਾ ਹਿੰਸਾ 'ਚ ਹਨੀਪ੍ਰੀਤ ਦਾ ਨਾਂ ਆਉਣ 'ਤੇ ਉਸ ਖਿਲਾਫ ਲੁਕਆਊਟ ਨੋਟਿਸ ਜਾਰੀ ਕੀਤਾ ਗਿਆ।
- 5 ਸਤੰਬਰ ਨੂੰ ਹਨੀਪ੍ਰੀਤ ਦੇ ਨੇਪਾਲ ਭੱਜਣ ਦੀ ਸੂਚਨਾ ਮਿਲੀ ਅਤੇ ਯੂ. ਪੀ. ਬਾਰਡਰ 'ਤੇ ਅਲਰਟ ਕੀਤਾ ਗਿਆ।
- 25 ਸਤੰਬਰ ਨੂੰ ਹਨੀਪ੍ਰੀਤ ਦੇ ਦਿੱਲੀ 'ਚ ਵਕੀਲ ਦੇ ਘਰ ਜਾਣ ਦੀ ਸੀ. ਸੀ. ਟੀ .ਵੀ. ਫੁਟੇਜ ਸਾਹਮਣੇ ਆਈ।
- 26 ਸਤੰਬਰ ਨੂੰ ਹਨੀਪ੍ਰੀਤ ਦੀ ਦਿੱਲੀ ਹਾਈਕੋਰਟ 'ਚ ਅਗਾਊਂ ਜ਼ਮਾਨਤ ਪਟੀਸ਼ਨ ਰੱਦ ਹੋਈ।
- 27 ਸਤੰਬਰ ਨੂੰ ਪੁਲਸ ਨੇ ਜ਼ਮਾਨਤ ਪਟੀਸ਼ਨ ਖਾਰਿਜ ਹੋਣ ਦੇ ਬਾਅਦ ਦਿੱਲੀ ਦੇ ਕਈ ਇਲਾਕਿਆਂ 'ਚ ਕੀਤੀ ਛਾਪੇਮਾਰੀ 
- 3 ਅਕਤੂਬਰ ਨੂੰ ਪਹਿਲੀ ਵਾਰ ਹਨੀਪ੍ਰੀਤ ਦਾ ਮੀਡੀਆ ਚੈਨਲਾਂ 'ਤੇ ਇੰਟਰਵਿਊ ਆਇਆ, ਪੁਲਸ ਨੇ ਉਸਨੂੰ ਗ੍ਰਿਫਤਾਰ ਕਰ ਲਿਆ।