ਖੰਨਾ ਦੇ SSP ਨੂੰ ਬਦਲਣ ਦੇ ਮਾਮਲੇ ''ਤੇ ਭਖੀ ਸਿਆਸਤ, ਅਫ਼ਸਰਸ਼ਾਹੀ ਦੇ ਹੱਕ ''ਚ ਆਈ ਕਾਂਗਰਸ
01/17/2023 3:37:43 PM
ਪਾਇਲ (ਖੰਨਾ) : ਪਾਇਲ ਤੋਂ ਵਿਧਾਇਕ ਮਨਵਿੰਦਰ ਸਿੰਘ ਗਿਆਸਪੁਰਾ ਵੱਲੋਂ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਚਿੱਠੀ ਲਿਖ ਕੇ ਖੰਨਾ ਦੇ ਐੱਸ. ਐੱਸ. ਪੀ ਨੂੰ ਬਦਲਣ ਦੇ ਮਾਮਲੇ 'ਚ ਹੁਣ ਸਿਆਸਤ ਭਖ ਗਈ ਹੈ। ਇਸ ਮਾਮਲੇ 'ਚ ਕਾਂਗਰਸ ਅਫ਼ਸਰਸ਼ਾਹੀ ਦੇ ਹੱਕ 'ਚ ਖੜ੍ਹ ਗਈ ਹੈ। ਸਾਬਕਾ ਮੰਤਰੀ ਗੁਰਕੀਰਤ ਸਿੰਘ ਕੋਟਲੀ ਨੇ ਐੱਸ. ਐੱਸ. ਪੀ. ਖੰਨਾ ਦੇ ਕੰਮ ਦੀ ਤਾਰੀਫ਼ ਕਰਦੇ ਹੋਏ 'ਆਪ' ਵਿਧਾਇਕ ਗਿਆਸਪੁਰਾ 'ਤੇ ਦੂਸ਼ਣਬਾਜ਼ੀ ਦੇ ਇਲਜਾਮ ਲਾਏ ਅਤੇ ਗਿਆਸਪੁਰਾ ਦੇ ਅਸਤੀਫ਼ੇ ਦੀ ਮੰਗ ਕੀਤੀ। ਉੱਥੇ ਹੀ ਰਾਹੁਲ ਗਾਂਧੀ ਦੀ ਸੁਰੱਖਿਆ 'ਚ ਚੂਕ ਮਾਮਲੇ 'ਚ ਕੋਟਲੀ ਨੇ ਕਿਹਾ ਕਿ ਇਹ ਗੰਭੀਰ ਮਸਲਾ ਹੈ। ਕੋਟਲੀ ਨੇ ਕਿਹਾ ਕਿ ਮਨਵਿੰਦਰ ਸਿੰਘ ਗਿਆਸਪੁਰਾ ਲੰਬੇ ਸਮੇਂ ਤੋਂ ਇਹ ਇਲਜ਼ਾਮ ਕਾਂਗਰਸ 'ਤੇ ਲਾਉਂਦੇ ਆ ਰਹੇ ਸੀ।
ਹੁਣ ਵਿਧਾਇਕ ਬਣਨ ਮਗਰੋਂ ਆਪਣੀ ਸਰਕਾਰ 'ਚ ਵੀ ਇਹੀ ਦੋਸ਼ ਲਗਾ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਅਫ਼ਸਰਸ਼ਾਹੀ ਨੂੰ ਬਦਨਾਮ ਕੀਤਾ ਜਾ ਰਿਹਾ ਹੈ ਅਥੇ ਸਰਕਾਰ ਨੂੰ ਕਿਸੇ ਨਤੀਜੇ 'ਤੇ ਪਹੁੰਚਣਾ ਚਾਹੀਦਾ ਹੈ। ਰਾਹੁਲ ਗਾਂਧੀ ਦੀ ਸੁਰੱਖਿਆ 'ਚ ਚੂਕ ਬਾਰੇ ਕੋਟਲੀ ਨੇ ਕਿਹਾ ਕਿ ਗਾਂਧੀ ਪਰਿਵਾਰ ਨੂੰ ਪਹਿਲਾਂ ਹੀ ਖ਼ਤਰਾ ਹੈ। ਇਹ ਗੰਭੀਰ ਮਸਲਾ ਹੈ। ਇਸ 'ਤੇ ਗੌਰ ਕਰਨਾ ਚਾਹੀਦਾ ਹੈ। ਮੁੱਖ ਮੰਤਰੀ ਭਗਵੰਤ ਮਾਨ ਵੱਲੋਂ ਰਾਹੁਲ ਗਾਂਧੀ ਦੀ ਟਿੱਪਣੀ 'ਤੇ ਜਵਾਬ ਦੇ ਮਾਮਲੇ 'ਚ ਕੋਟਲੀ ਨੇ ਕਿਹਾ ਕਿ ਪੰਜਾਬ ਦਿੱਲੀ ਤੋਂ ਚੱਲਦਾ ਹੈ, ਇਸ 'ਚ ਕੋਈ ਸ਼ੱਕ ਨਹੀਂ। ਰੋਜ਼ਾਨਾ ਦਿੱਲੀ ਤੋਂ ਫ਼ੈਸਲੇ ਆਉਂਦੇ ਹਨ। ਐੱਸ. ਐੱਸ. ਪੀ. ਵੀ ਦਿੱਲੀ ਤੋਂ ਲੱਗ ਕੇ ਆ ਰਹੇ ਹਨ।
