ਲੜਕੀਆਂ ਨੂੰ ਭਜਾਉਣ ਦੇ ਮਾਮਲੇ 'ਚ ਦੋ ਖਿਲਾਫ਼ ਮਾਮਲਾ ਦਰਜ

ਸ੍ਰੀ ਮੁਕਤਸਰ ਸਾਹਿਬ (ਪਵਨ ਤਨੇਜਾ) - ਪਿੰਡ ਚਿੱਬੜਾਂਵਾਲੀ ਦੀ ਮੁਕਤਸਰ ਦੇ ਕਾਲਜ 'ਚ ਪੜ੍ਹਨ ਵਾਲੀ ਇਕ ਨਾਬਾਲਿਗ ਲੜਕੀ ਨੂੰ ਉਸਦੇ ਪਿੰਡ ਦਾ ਹੀ ਇਕ ਨੌਜਵਾਨ ਭਜਾ ਕੇ ਲੈ ਗਿਆ ਹੈ। ਪੁਲਸ ਨੇ ਨੌਜਵਾਨ ਦੇ ਖਿਲਾਫ਼ ਮਾਮਲਾ ਦਰਜ ਕਰ ਲਿਆ ਹੈ। 
ਜਾਣਕਾਰੀ ਮੁਤਾਬਕ ਪਿੰਡ ਚਿੱਬੜਾਂਵਾਲੀ ਨਿਵਾਸੀ ਲੜਕੀ ਦੇ ਪਿਤਾ ਨੇ ਪੁਲਸ ਨੂੰ ਦਿੱਤੀ ਸ਼ਿਕਾਇਤ 'ਚ ਦੱਸਿਆ ਕਿ ਉਸਦੀ 15 ਸਾਲਾ ਪੁੱਤਰੀ ਮੁਕਤਸਰ ਦੇ ਕਾਲਜ 'ਚ ਪੜ੍ਹਨ ਲਈ ਆਉਂਦੀ ਹੈ। ਉਸ ਨਾਲ ਅਕਸਰ ਹੀ ਪਿੰਡ ਦਾ ਬੰਟੀ ਸਿੰਘ ਛੇੜਛਾੜ ਕਰਦਾ ਰਹਿੰਦਾ ਸੀ, ਜਿਸ ਨੂੰ ਉਨ੍ਹਾਂ ਨੇ ਬਹੁਤ ਵਾਰ ਰੋਕਿਆ ਸੀ ਪਰ ਉਹ ਆਪਣੀ ਹਰਕਤਾਂ ਤੋਂ ਬਾਜ ਨਹੀਂ ਆਇਆ। ਬੀਤੇ ਦਿਨੀਂ ਉਨ੍ਹਾਂ ਦੀ ਲੜਕੀ ਜਦ ਕਾਲਜ ਆਈ ਤਾਂ ਉਹ ਉਸ ਨੂੰ ਉਥੋਂ ਹੀ ਵਿਆਹ ਦਾ ਝਾਂਸਾ ਦੇ ਕੇ ਭਜਾ ਕੇ ਲੈ ਗਿਆ, ਜਦ ਲੜਕੀ ਦੁਪਹਿਰ ਨੂੰ ਘਰ ਨਾ ਪਹੁੰਚੀ ਤਾਂ ਉਨ੍ਹਾਂ ਨੇ ਤਲਾਸ਼ ਸ਼ੁਰੂ ਕਰ ਦਿੱਤੀ ਤੇ ਉਨ੍ਹਾਂ ਨੇ ਪੁਲਸ ਨੂੰ ਸੂਚਿਤ ਕੀਤਾ। ਉਧਰ ਥਾਣਾ ਸਦਰ ਮੁਖੀ ਪੈਰੀਵਿੰਕਲ ਗਰੇਵਾਲ ਨੇ ਦੱਸਿਆ ਕਿ ਉਨ੍ਹਾਂ ਨੇ ਦੋਸ਼ੀ ਦੇ ਖਿਲਾਫ਼ ਮਾਮਲਾ ਦਰਜ ਕਰ ਲਿਆ ਹੈ। 
ਇਸ ਦੇ ਇਲਾਵਾ ਥਾਣਾ ਲੰਬੀ ਦੇ ਪਿੰਡ ਭਾਈ ਕਾ ਕੇਰਾ 'ਚੋਂ ਪਿੰਡ ਦੇ ਹੀ ਸਰਕਾਰੀ ਸਕੂਲ 'ਚ ਨੌਵੀ ਕਲਾਸ ਦੀ ਵਿਦਿਆਰਥਣ ਨੂੰ ਉਨ੍ਹਾਂ ਦੇ ਪਿੰਡ 'ਚ ਕੰਮ ਕਰਨ ਵਾਲਾ ਪਿੰਡ ਮਨੀਆਂਵਾਲਾ, ਥਾਣਾ ਸਾਦੁਲ ਸ਼ਹਿਰ (ਰਾਜਸਥਾਨ) ਦਾ ਨਿਵਾਸੀ ਆਤਮ ਸਿੰਘ ਭਜਾ ਕੇ ਲੈ ਗਿਆ, ਜਿਸ ਖਿਲਾਫ ਪੁਲਸ ਨੇ ਮਾਮਲਾ ਦਰਜ ਕਰ ਲਿਆ ਹੈ।