FCI ਨੇ ਖੁਰਾਕੀ ਰੇਲਾਂ ਦੀ ਲਦਾਈ ''ਚ ਨਵਾਂ ਬੈਂਚਮਾਰਕ ਸਥਾਪਿਤ ਕੀਤਾ

ਜਲੰਧਰ (ਸਰਬਜੀਤ ਸਿੰਘ ਸਿੱਧੂ)-ਭਾਰਤੀ ਖੁਰਾਕ ਨਿਗਮ (ਐੱਫ.ਸੀ.ਆਈ) ਨੇ 22ਅਪ੍ਰੈਲ 2020 ਨੂੰ ਲਗਭਗ 2.8 ਲੱਖ ਮੀਟ੍ਰਿਕ ਟਨ ਅਨਾਜ ਲਿਜਾਣ ਵਾਲੀਆਂ 102 ਰੇਲ ਖੇਪਾਂ ਭੇਜਣ ਦੇ ਨਾਲ ਹੀ ਇੱਕ ਨਵਾਂ ਬੈਂਚਮਾਰਕ ਸਥਾਪਿਤ ਕਰ ਲਿਆ ਹੈ। ਪੰਜਾਬ ਤੋਂ ਸਭ ਤੋਂ ਵੱਧ 46 ਅਤੇ ਦੂਜੇ ਸਥਾਨ ‘ਤੇ ਤੇਲੰਗਾਨਾ ਨੇ 18 ਰੇਲਾਂ 'ਚ ਅਨਾਜ ਦੀ ਭਰਾਈ ਕੀਤੀ। ਪੰਜਾਬ ਅਤੇ ਹਰਿਆਣਾ ਤੋਂ ਕਣਕ ਅਤੇ ਚਾਵਲ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ 'ਚ ਭੇਜੇ ਗਏ, ਤੇਲੰਗਾਨਾ ਤੋਂ ਉਬਲੇ ਹੋਏ ਚਾਵਲ ਕੇਰਲ, ਤਮਿਲਨਾਡੂ ਅਤੇ ਪੱਛਮੀ ਬੰਗਾਲ ਨੂੰ ਭੇਜੇ ਗਏ। ਇਸ ਸੰਚਾਲਨ ਨਾਲ ਐੱਫ.ਸੀ.ਆਈ ਨੇ ਲਾਕਡਾਊਨ ਦੌਰਾਨ 1.65 ਰੋਜ਼ਾਨਾ ਦੀ ਔਸਤ ਨਾਲ ਕੁੱਲ 5 ਐੱਮ.ਐੱਮ.ਟੀ. ਅਨਾਜ ਭੇਜਿਆ ਹੈ। 

ਇਸੇ ਸਮੇਂ ਦੌਰਾਨ ਐੱਫ.ਸੀ.ਆਈ ਨੇ 4.6 ਐੱਮ.ਐੱਮ.ਟੀ ਨੇ ਲੁਹਾਈ ਕਰਵਾਈ ਹੈ ਅਤੇ ਦੇਸ਼ ਭਰ 'ਚ ਲਾਕਡਾਊਨ ਦੀਆਂ ਚੁਣੌਤੀਆਂ ਦੇ ਚਲਦਿਆਂ ਅਤੇ ਕੰਟੈਨਮੈਂਟ ਜ਼ੋਨਾਂ ਦੇ ਐਲਾਨ ਦੇ ਬਾਵਜੂਦ ਪ੍ਰਧਾਨ ਮੰਤਰੀ ਗ਼ਰੀਬ ਕਲਿਆਣ ਅੰਨ ਯੋਜਨਾ ਸਮੇਤ ਹੋਰ ਸਕੀਮਾਂ ਤਹਿਤ 9.8 ਐੱਮ.ਐੱਮ.ਟੀ ਅਨਾਜ ਵੰਡਿਆ ਹੈ। ਪ੍ਰਧਾਨ ਮੰਤਰੀ ਗ਼ਰੀਬ ਕਲਿਆਣ ਯੋਜਨਾ (ਪੀ.ਐੱਮ.ਜੀ.ਕੇ.ਵਾਈ) ਤਹਿਤ ਐੱਫ.ਸੀ.ਆਈ ਨੇ ਪਹਿਲਾਂ ਹੀ ਲਗਭਗ 80 ਕਰੋੜ ਲਾਭਾਰਥੀਆਂ ਨੂੰ 5 ਕਿਲੋਗ੍ਰਾਮ ਪ੍ਰਤੀ ਵਿਅਕਤੀ ਨੂੰ ਮੁਫ਼ਤ ਵੰਡ ਲਈ 4.23 ਐੱਮ.ਐੱਮ.ਟੀ ਅਨਾਜ ਰਾਜ ਸਰਕਾਰਾਂ ਨੂੰ ਸੌਂਪ ਦਿੱਤਾ ਹੈ। 

ਜਿੱਥੇ ਸਾਰੇ ਯਤਨ ਖਪਤਕਾਰ ਰਾਜਾਂ ਨੂੰ ਭੰਡਾਰ ਦੀ ਸਮੇਂ ਸਿਰ ਆਵਾਜਾਈ ਅਤੇ ਜਨਤਕ ਵੰਡ ਪ੍ਰਣਾਲੀ (ਪੀ.ਡੀ.ਐੱਸ) ਨੂੰ ਨਿਯਮਿਤ ਸਪਲਾਈ ਯਕੀਨੀ ਬਣਾਉਣ ਤੇ ਕੇਂਦ੍ਰਿਤ ਕੀਤੇ ਜਾ ਰਹੇ ਹਨ, ਉੱਥੇ ਹੀ 15 ਅਪ੍ਰੈਲ ਤੋਂ ਸਾਰੇ ਉਤਪਾਦਕ ਰਾਜਾਂ ਦੁਆਰਾ ਖਰੀਦ ਗਤੀਵਿਧੀਆਂ ਸ਼ੁਰੂ ਕਰਨ ਤੋਂ ਬਾਅਦ ਕਣਕ ਖਰੀਦ ਦੀ ਰਫ਼ਤਾਰ ਤੇਜ਼ ਹੋ ਗਈ ਹੈ। 22 ਅਪ੍ਰੈਲ ਤੱਕ ਕੇਂਦਰੀ ਭੰਡਾਰ ਲਈ 3.38 ਐੱਮ.ਐੱਮ.ਟੀ ਕਣਕ ਖਰੀਦੀ ਜਾ ਚੁੱਕੀ ਹੈ, ਜਿਸ ਇਕੱਲੇ ਪੰਜਾਬ ਤੋਂ 2.15 ਐੱਮ.ਐੱਮ.ਟੀ ਕਣਕ ਖਰੀਦੀ ਗਈ ਹੈ। ਇਸ ਸੀਜ਼ਨ ਦੌਰਾਨ 40 ਐੱਮ.ਐੱਮ.ਟੀ ਕਣਕ ਖਰੀਦਣ ਦਾ ਟੀਚਾ ਰੱਖਿਆ ਗਿਆ ਹੈ। ਕੇਂਦਰੀ ਭੰਡਾਰ 'ਚ ਇਸ ਤਰ੍ਹਾਂ ਤੇਜ਼ੀ ਆਉਣ ਨਾਲ ਐੱਫ.ਸੀ.ਆਈ ਮੌਜੂਦਾ ਸੰਕਟ ਦੌਰਾਨ ਲੋਕਾਂ ਨੂੰ ਅਨਾਜ ਦੀਆਂ ਲੋੜਾਂ ਦੀ ਪੂਰਤੀ ਕਰਨ ਮਗਰੋਂ ਤਾਜ਼ੇ ਸਟਾਕ ਨਾਲ ਭੰਡਾਰ ਭਰਨ ਦੇ ਯੋਗ ਹੋ ਜਾਵੇਗਾ।