ਟਾਰਗੇਟ ਕਿਲਿੰਗ ਮਾਮਲੇ ''ਚ ਡੱਲਾ ਦਾ ਤੀਜਾ ਸਾਥੀ ਵੀ ਆਇਆ ਅੜਿੱਕੇ, .32 ਬੋਰ ਦੀ ਪਿਸਤੌਲ, ਕਾਰਤੂਸ ਬਰਾਮਦ

ਮੋਹਾਲੀ (ਜੱਸੀ) : ਸਟੇਟ ਸਪੈਸ਼ਲ ਆਪ੍ਰੇਸ਼ਨ ਸੈੱਲ ਮੋਹਾਲੀ ਨੇ ਵੱਡੀ ਟਾਰਗੇਟ ਕਿਲਿੰਗ ਸਾਜ਼ਿਸ਼ ਨੂੰ ਨਾਕਾਮ ਕਰਦਿਆਂ ਅਰਸ਼ ਡੱਲਾ ਦੇ ਤੀਜੇ ਮੁੱਖ ਸੰਚਾਲਕ ਕੁਲਵਿੰਦਰ ਸਿੰਘ ਉਰਫ਼ ਕਿੰਦਾ ਨੂੰ ਵੀ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਸ ਨੂੰ ਕਵਲਜੀਤ ਵੱਲੋਂ ਕੀਤੇ ਗਏ ਖ਼ੁਲਾਸਿਆਂ ਦੇ ਆਧਾਰ ’ਤੇ ਗ੍ਰਿਫ਼ਤਾਰ ਕੀਤਾ ਹੈ | ਪੁੱਛਗਿੱਛ ਦੌਰਾਨ ਕੁਲਵਿੰਦਰ ਉਰਫ਼ ਕਿੰਦਾ ਨੇ ਖ਼ੁਲਾਸਾ ਕੀਤਾ ਕਿ ਉਹ ਫ਼ਰੀਦਕੋਟ ਜੇਲ੍ਹ ’ਚ ਕਵਲਜੀਤ ਉਰਫ਼ ਕਾਕਾ ਨੂੰ ਮਿਲਿਆ ਸੀ। ਉਹ ਕਵਲਜੀਤ ਤੇ ਨਵਦੀਪ ਨਾਲ ਹਾਲ ਹੀ ’ਚ ਬਰਨਾਲਾ ਆਇਆ ਸੀ, ਜਿੱਥੇ ਉਨ੍ਹਾਂ ਨੇ ਯੋਜਨਾਬੱਧ ਹੱਤਿਆ ’ਚ ਵਰਤੋਂ ਲਈ ਬਣਾਏ ਗਏ ਨੌਂ ਕਾਰਤੂਸ ਬਰਾਮਦ ਕੀਤੇ ਸਨ। ਉਸ ਦੇ ਖ਼ੁਲਾਸੇ ’ਤੇ ਪੁਲਸ ਨੇ .32 ਬੋਰ ਪਿਸਤੌਲ ਦੇ ਨਾਲ-ਨਾਲ 3 ਕਾਰਤੂਸ ਵੀ ਬਰਾਮਦ ਕੀਤੇ, ਜੋ ਉਸ ਨੂੰ ਅਰਸ਼ ਡੱਲਾ ਵੱਲੋਂ ਖ਼ਾਸ ਤੌਰ 'ਤੇ ਕਤਲ ਨੂੰ ਅੰਜਾਮ ਦੇਣ ਲਈ ਮੁਹੱਈਆ ਕਰਵਾਏ ਗਏ ਸਨ। ਕੁਲਵਿੰਦਰ ਸਿੰਘ ਉਰਫ਼ ਕਿੰਦਾ ਵਿਰੁੱਧ ਚਾਰ ਅਪਰਾਧਿਕ ਮਾਮਲੇ ਦਰਜ ਹਨ, ਜਿਨ੍ਹਾਂ ’ਚ ਅਸਲਾ ਐਕਟ ਤੇ ਐੱਨ.ਡੀ.ਪੀ.ਐੱਸ. ਐਕਟ ਅਧੀਨ ਕੇਸ ਸ਼ਾਮਲ ਹਨ। ਤਿੰਨੋਂ ਮੁਲਜ਼ਮ ਨਿਸ਼ਾਨਾ ਬਣਾ ਕੇ ਕਤਲ ਕਰਨ ਦੀ ਤਿਆਰੀ ਦੇ ਅੰਤਮ ਪੜਾਅ 'ਤੇ ਸਨ। ਹੁਣ ਤਕ ਪੁਲਿਸ ਨੇ ਇਕ ਪਿਸਤੌਲ ਦੇ ਨਾਲ-ਨਾਲ 9 ਕਾਰਤੂਸ ਤੇ ਇਕ 32 ਬੋਰ ਪਿਸਤੌਲ ਦੇ ਨਾਲ-ਨਾਲ 3 ਗੋਲੀਆਂ ਬਰਾਮਦ ਕੀਤੀਆਂ ਹਨ।

ਸਟੇਟ ਸਪੈਸ਼ਲ ਆਪ੍ਰੇਸ਼ਨ ਸੈੱਲ ਵੱਲੋਂ ਸਮੇਂ ਸਿਰ ਕਾਰਵਾਈ ਨੇ ਫ਼ਰੀਦਕੋਟ ’ਚ ਸੰਭਾਵੀ ਖ਼ੂਨੀ ਘਟਨਾ ਨੂੰ ਸਫਲਤਾਪੂਰਵਕ ਰੋਕਿਆ ਹੈ, ਜਿਸ ਨਾਲ ਨਾਗਰਿਕਾਂ ਦੀਆਂ ਜਾਨਾਂ ਅਤੇ ਜਨਤਕ ਸ਼ਾਂਤੀ ਦੀ ਰੱਖਿਆ ਹੋਈ ਹੈ। ਪੁਲਸ ਇਸ ਮਾਮਲੇ 'ਚ ਉਸ ਮੁਲਜ਼ਮ ਦੀ ਭਾਲ ਕਰ ਰਹੀ ਹੈ, ਜਿਸ ਨੇ ਕਤਲ ਕਰਨ ਵਾਲੇ ਵਿਅਕਤੀ ਦੀ ਰੇਕੀ ਕੀਤੀ ਸੀ ਤੇ ਅਰਸ਼ ਡੱਲਾ ਦੀ ਕਮਾਂਡ ਹੇਠ ਕੰਮ ਕਰ ਰਹੇ ਇਸ ਅਪਰਾਧਿਕ ਨੈੱਟਵਰਕ ’ਚ ਸ਼ਾਮਲ ਹੋਰਨਾਂ ਦੀ ਪਛਾਣ ਕਰਨ ਲਈ ਵੀ ਜਾਂਚ ਜਾਰੀ ਹੈ। ਜਾਂਚ 'ਚ ਸਾਹਮਣੇ ਆਇਆ ਹੈ ਕਿ ਮੁਲਜ਼ਮ ਕਵਲਜੀਤ ਸਿੰਘ ਉਰਫ਼ ਕਾਕਾ ਇਕ ਆਦਤਨ ਅਪਰਾਧੀ ਹੈ, ਜਿਸ ਦਾ ਵਿਆਪਕ ਅਪਰਾਧਿਕ ਇਤਿਹਾਸ ਹੈ। ਰਿਕਾਰਡਾਂ ਅਨੁਸਾਰ ਉਸ ਵਿਰੁੱਧ ਅੱਠ ਮਾਮਲੇ ਦਰਜ ਕੀਤੇ ਗਏ ਹਨ, ਜਿਨ੍ਹਾਂ ’ਚ ਅਸਲਾ ਐਕਟ , ਧੋਖਾਧੜੀ, ਲੜਾਈ-ਝਗੜੇ ਤੇ ਅਪਰਾਧਿਕ ਘੁਸਪੈਠ ਸ਼ਾਮਲ ਹਨ। ਉਹ ਸ੍ਰੀ ਮੁਕਤਸਰ ਸਾਹਿਬ, ਲੁਧਿਆਣਾ, ਮੋਗਾ ਸਮੇਤ ਪੰਜਾਬ ਭਰ ਦੀਆਂ ਵੱਖ-ਵੱਖ ਜੇਲ੍ਹਾਂ ’ਚ ਬੰਦ ਰਿਹਾ ਤੇ ਅਪ੍ਰੈਲ, 2025 ’ਚ ਫਰੀਦਕੋਟ ਜੇਲ੍ਹ ਤੋਂ ਰਿਹਾਅ ਹੋਇਆ ਹੈ। ਪੁੱਛਗਿੱਛ ਦੌਰਾਨ ਕਵਲਜੀਤ ਸਿੰਘ ਨੇ ਖ਼ੁਲਾਸਾ ਕੀਤਾ ਕਿ 2023 ’ਚ ਜੇਲ੍ਹ ’ਚ ਰਹਿੰਦਿਆਂ ਉਹ ਕੈਦੀਆਂ ਰਾਹੀਂ ਗੈਂਗਸਟਰ ਸੁਖਦੂਲ ਸਿੰਘ ਉਰਫ਼ ਸੁੱਖਾ ਦੁੱਨੇਕੇ ਦੇ ਸੰਪਰਕ ’ਚ ਆਇਆ, ਜੋ ਕੈਨੇਡਾ ਸਥਿਤ ਗੈਂਗਸਟਰ ਅਰਸ਼ਦੀਪ ਸਿੰਘ ਉਰਫ਼ ਅਰਸ਼ ਡੱਲਾ ਦਾ ਨਜ਼ਦੀਕੀ ਸਾਥੀ ਸੀ, ਜਿਸ ਦੀ ਬਾਅਦ ’ਚ ਮੌਤ ਹੋ ਗਈ ਸੀ। ਸੁੱਖਾ ਦੁੱਨੇਕੇ ਨੇ ਰਿਹਾਈ ਤੋਂ ਬਾਅਦ ਅਪਰਾਧਿਕ ਗਤੀਵਿਧੀਆਂ ’ਚ ਸ਼ਾਮਲ ਕਰਨ ਦੇ ਇਰਾਦੇ ਨਾਲ ਕਵਲਜੀਤ ਦੀ ਜ਼ਮਾਨਤ ਕਰਵਾਉਣ 'ਚ ਮਦਦ ਕੀਤੀ ਸੀ। ਫਿਰ ਸੁੱਖਾ ਦੁੱਨੇਕੇ ਨੇ ਉਸ ਨੂੰ ਅਰਸ਼ ਡੱਲਾ ਨਾਲ ਮਿਲਾਇਆ।

ਸੁੱਖਾ ਦੁੱਨੇਕੇ ਮੂਲ ਰੂਪ ’ਚ ਮੋਗਾ ਦਾ ਰਹਿਣ ਵਾਲਾ ਸੀ ਤੇ ਅੱਤਵਾਦੀ ਤੱਤਾਂ ਨਾਲ ਜੁੜਿਆ ਹੋਇਆ ਸੀ, ਉਸ ਨੂੰ ਸਤੰਬਰ 2023 ’ਚ ਕੈਨੇਡਾ ਦੇ ਵਿਨੀਪੈੱਗ ’ਚ ਮਾਰ ਦਿੱਤਾ ਗਿਆ ਸੀ। ਬਾਅਦ ’ਚ ਲਾਰੈਂਸ ਬਿਸ਼ਨੋਈ ਗੈਂਗ ਨੇ ਉਸ ਦੀ ਹੱਤਿਆ ਕਰਵਾਉਣ ਦਾ ਦਾਅਵਾ ਕੀਤਾ ਸੀ। ਸੁੱਖਾ ਦੀ ਮੌਤ ਤੋਂ ਬਾਅਦ ਕਵਲਜੀਤ ਉਰਫ਼ ਕਾਕਾ ਨੂੰ ਸਿੱਧੇ ਤੌਰ 'ਤੇ ਅਰਸ਼ ਡੱਲਾ ਨੇ ਸੰਭਾਲਿਆ ਸੀ। ਅਪ੍ਰੈਲ 2025 ’ਚ ਆਪਣੀ ਰਿਹਾਈ ਤੋਂ ਬਾਅਦ ਕਵਲਜੀਤ ਨੇ ਅਰਸ਼ ਡੱਲਾ ਨਾਲ ਦੁਬਾਰਾ ਸੰਪਰਕ ਕੀਤਾ, ਜਿਸ ਨੇ ਉਸ ਨੂੰ ਫ਼ਰੀਦਕੋਟ ’ਚ ਇਕ ਹਾਈ-ਪ੍ਰੋਫਾਈਲ ਟਾਰਗੇਟ ਕਿਲਿੰਗ ਨੂੰ ਅੰਜਾਮ ਦੇਣ ਦਾ ਨਿਰਦੇਸ਼ ਦਿੱਤਾ। ਇਸ ਕੰਮ ਲਈ ਕਵਲਜੀਤ ਨੇ ਦੋ ਹੋਰ ਵਿਅਕਤੀਆਂ ਨਵਦੀਪ ਸਿੰਘ ਉਰਫ਼ ਹਨੀ, ਜੋ ਪਹਿਲਾਂ ਹੀ ਗ੍ਰਿਫ਼ਤਾਰ ਕੀਤੇ ਗਏ ਸਨ ਤੇ ਕੁਲਵਿੰਦਰ ਸਿੰਘ ਉਰਫ਼ ਕਿੰਦਾ ਵਾਸੀ ਪਿੰਡ ਦੱਤਾ, ਜ਼ਿਲ੍ਹਾ ਮੋਗਾ ਨੂੰ ਭਰਤੀ ਕੀਤਾ ਤੇ ਉਨ੍ਹਾਂ ਨੂੰ ਅਰਸ਼ ਡੱਲਾ ਨਾਲ ਮਿਲਾਇਆ ਸੀ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e