ਪਿੰਡ ਮਹਾਂਬੱਧਰ ਨੇੜੇ ਅਰਨੀਵਾਲਾ ਨਹਿਰ ’ਚ 70 ਫੁੱਟ ਦਾ ਪਿਆ ਪਾੜ, 600 ਏਕੜ ਜ਼ਮੀਨ ’ਚ ਭਰਿਆ ਪਾਣੀ

ਮੰਡੀ ਲੱਖੇਵਾਲੀ/ਸ੍ਰੀ ਮੁਕਤਸਰ ਸਾਹਿਬ (ਸੁਖਪਾਲ ਢਿੱਲੋਂ, ਪਵਨ ਤਨੇਜਾ) : ਪਿੰਡ ਮਹਾਂਬੱਧਰ ਨੇੜਿਓਂ ਲੰਘਦੀ ਅਰਨੀਵਾਲਾ ਨਹਿਰ ਵਿਚ  ਬੀਤੀ ਰਾਤ ਕਰੀਬ 11 ਵਜੇ ਭੰਗਚੜੀ ਵਾਲੇ ਪਾਸੇ ਲਗਭਗ 70 ਫੁੱਟ ਦਾ ਵੱਡਾ ਪਾੜ ਪੈ ਗਿਆ ਤੇ 600 ਏਕੜ ਤੋਂ ਵੱਧ ਜ਼ਮੀਨ ਵਿਚ ਪਾਣੀ ਭਰ ਗਿਆ। ਖੇਤਾਂ ਵਿਚ ਅਜੇ ਕਣਕ ਦਾ ਨਾੜ ਸੈਂਕੜੇ ਏਕੜ ਖੜਾ ਸੀ ਤੇ ਕਿਸਾਨਾਂ ਨੇ ਤੂੜੀ ਬਣਾਉਣੀ ਸੀ। ਵੱਡੀ ਗਿਣਤੀ ਕਿਸਾਨ ਰਾਤ ਵੇਲੇ ਹੀ ਮੌਕੇ ਵਾਲੀ ਥਾਂ ’ਤੇ ਪਹੁੰਚ ਗਏ ਤੇ ਉਨ੍ਹਾਂ ਨੇ ਨਹਿਰ ਵਿਭਾਗ ਦੇ ਅਧਿਕਾਰੀਆਂ ਨੂੰ ਇਸ ਸਬੰਧੀ ਸੂਚਿਤ ਕੀਤਾ ਪਰ ਰਾਤ ਵੇਲੇ ਨਹਿਰ ਮਹਿਕਮੇ ਦਾ ਕੋਈ ਵੱਡਾ ਅਧਿਕਾਰੀ ਤਾਂ ਉਥੇ ਨਹੀਂ ਪਹੁੰਚਿਆ ਪਰ ਛੋਟੇ ਮੁਲਾਜ਼ਮ ਰਾਤ ਨੂੰ 1 ਵਜੇ ਤੱਕ ਉਥੇ ਪਹੁੰਚ ਗਏ ਸਨ। ਹੈਰਾਨੀ ਵਾਲੀ ਗੱਲ ਹੈ ਕਿ ਰਾਤ ਨੂੰ 11 ਵਜੇ ਟੁੱਟੀ ਨਹਿਰ ਦਾ ਪਾਣੀ 12 ਘੰਟੇ ਬੀਤ ਜਾਣ ’ਤੇ ਵੀ ਬੰਦ ਨਹੀਂ ਕੀਤਾ ਗਿਆ ਹੈ ਤੇ ਅਜੇ ਵਗ ਰਿਹਾ ਸੀ । ਜਿਸ ਕਰਕੇ ਨਹਿਰ ਦੇ ਪਾਣੀ ਨੇ ਖੇਤਾਂ ਵਿਚ ਦੂਰ ਤੱਕ ਮਾਰ ਕੀਤੀ। ਖੇਤਾਂ ਵਿਚ ਜਿਹੜੇ ਘਰ ਹਨ , ਉਨ੍ਹਾਂ ਨਾਲ ਵੀ ਪਾਣੀ ਲੱਗ ਗਿਆ । ਇਹ ਪਾਣੀ ਭੰਗਚੜੀ ਪਿੰਡ ਦੇ ਨੇੜਲੀਆਂ ਜ਼ਮੀਨਾਂ ਤੱਕ ਚਲਾ ਗਿਆ। ਵਰਨਣਯੋਗ ਹੈ ਕਿ ਅਜੇ ਬਹੁਤ ਸਾਰੇ ਕਿਸਾਨਾਂ ਦੀ ਤੂੜੀ ਬਣਾਉਣ ਵਾਲੀ ਸੀ ਤੇ ਕਣਕ ਦਾ ਨਾੜ ਖੇਤਾਂ ਵਿਚ ਹੀ ਖੜਾ ਸੀ । ਮਿਲੀ ਜਾਣਕਾਰੀ ਅਨੁਸਾਰ ਕਰੀਬ 500 ਏਕੜ ਕਣਕ ਦਾ ਨਾੜ ਖੜ੍ਹਾ ਸੀ, ਜਿਸ ਕਰਕੇ ਕਿਸਾਨਾਂ ਦਾ ਵੱਡਾ ਨੁਕਸਾਨ ਹੋਇਆ ਹੈ ਕਿਉਂਕਿ ਤੂੜੀ ਇਸ ਵਾਰ ਬਹੁਤ ਮਹਿੰਗੀ ਹੈ ਤੇ ਤੂੜੀ ਦੀ ਇਕ ਟਰਾਲੀ 4000 ਰੁਪਏ ਨੂੰ ਮਿਲ ਰਹੀ ਹੈ।

600 ਟਰਾਲੀਆਂ ਤੂੜੀ ਦੀਆਂ ਰੁੜ ਗਈਆਂ
ਨਹਿਰ ਦੇ ਪਾਣੀ ਦੀ ਮਾਰ ਹੇਠ ਆ ਕੇ ਲਗਭਗ 600 ਤੂੜੀ ਦੀਆਂ ਟਰਾਲੀਆਂ ਖੇਤਾਂ ਵਿਚ ਹੀ ਰੁੜ ਗਈਆਂ । ਕਿਸਾਨ ਜਗਦੀਪ ਸਿੰਘ ਪੁੱਤਰ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੀਆਂ 300 ਦੇ ਕਰੀਬ ਤੂੜੀ ਦੀਆਂ ਟਰਾਲੀਆਂ ਪਾਣੀ ਦੀ ਮਾਰ ਵਿਚ ਆ ਗਈਆਂ ਹਨ। ਜਿਸ ਕਰਕੇ ਉਨ੍ਹਾਂ ਦਾ 12 ਲੱਖ ਰੁਪਏ ਦੇ ਕਰੀਬ ਦਾ ਨੁਕਸਾਨ ਹੋਇਆ ਹੈ। ਉਨ੍ਹਾਂ ਦੱਸਿਆ ਕਿ ਅਸੀਂ 63 ਏਕੜ ਜ਼ਮੀਨ ਠੇਕੇ ’ਤੇ ਲਈ ਸੀ । ਕਿਸਾਨ ਕੁਲਦੀਪ ਸਿੰਘ ਦੀਆਂ 200 ਟਰਾਲੀਆਂ ਤੂੜੀ ਦੀਆਂ ਖਰਾਬ ਹੋ ਗਈਆਂ । ਹੋਰਨਾਂ ਕਿਸਾਨਾਂ ਦੀ ਤੂੜੀ ਵੀ ਖੇਤਾਂ ਵਿਚ ਪਈ ਸੀ ।

ਕੀ ਕਹਿਣਾ ਹੈ ਕਿਸਾਨਾਂ ਦਾ
ਘਟਨਾ ਸਥਾਨ ’ਤੇ ਜਾ ਕੇ ਜਦੋਂ ਉਥੇ ਮੌਜੂਦ ਕਿਸਾਨਾਂ ਨਾਲ ' ਜਗ ਬਾਣੀ ' ਵੱਲੋਂ ਗੱਲਬਾਤ ਕੀਤੀ ਗਈ ਤਾਂ ਉਹਨਾਂ ਦਾ ਕਹਿਣਾ ਸੀ ਕਿ ਜਿਸ ਵੇਲੇ ਨਹਿਰ ਵਿੱਚ ਪਾੜ ਪਿਆ ਉਦੋਂ ਨਹਿਰ ਵਿੱਚ ਪਾਣੀ ਉਵਰਫਲੋ ਹੋ ਕੇ ਵਗ ਰਿਹਾ ਸੀ ਤੇ ਬਹੁਤ ਜ਼ਿਆਦਾ ਸੀ । ਕਿਸਾਨ ਲਵਪ੍ਰੀਤ ਸਿੰਘ , ਬਲਕਾਰ ਸਿੰਘ , ਜਸਪਾਲ ਸਿੰਘ , ਅੰਮ੍ਰਿਤਪਾਲ ਸਿੰਘ , ਗਗਨ ਸਿੰਘ , ਗੁਰਮੀਤ ਸਿੰਘ , ਕੁਲਦੀਪ ਸਿੰਘ ਤੇ ਪਰਮਜੀਤ ਸਿੰਘ ਆਦਿ ਨੇ ਦੱਸਿਆ ਕਿ ਪਹਿਲਾਂ ਵੀ ਇਸ ਥਾਂ ਨੇੜਿਓਂ ਨਹਿਰ ਦੋ ਤਿੰਨ ਵਾਰ ਟੁੱਟੀ ਹੈ । ਜਿਥੇ ਪਾੜ ਪਿਆ ਹੈ , ਉਥੋਂ ਨਹਿਰ ਦੀ ਪੱਟੜੀ ਬੈਠ ਰਹੀ ਹੈ । ਉਨ੍ਹਾਂ ਕਿਹਾ ਕਿ ਨਹਿਰ ਦੀਆਂ ਦੋਵੇਂ ਪੱਟੜੀਆਂ ਹੀ ਖੁਰ ਗਈਆਂ ਹਨ ਤੇ ਹੋਰ ਨੁਕਸਾਨ ਵੀ ਹੋ ਸਕਦਾ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਪੰਜਾਬ ਸਰਕਾਰ ਅਤੇ ਉੱਚ ਅਧਿਕਾਰੀਆਂ ਨੂੰ ਇਸ ਪਾਸੇ ਤੁਰੰਤ ਧਿਆਨ ਦੇਣਾ ਚਾਹੀਦਾ ਹੈ ਅਤੇ ਜਿਨ੍ਹਾਂ ਕਿਸਾਨਾਂ ਦਾ ਨੁਕਸਾਨ ਹੋਇਆ ਹੈ ਉਨ੍ਹਾਂ ਨੂੰ ਯੋਗ ਮੁਆਵਜ਼ਾ ਦਿੱਤਾ ਜਾਵੇ।

ਛੇਤੀ ਬੰਨ ਦਿੱਤੀ ਜਾਵੇਗੀ ਨਹਿਰ
ਦੂਜੇ ਪਾਸੇ ਨਹਿਰ ਮਹਿਕਮੇ ਦੇ ਅਧਿਕਾਰੀਆਂ ਤੇ ਮੁਲਾਜ਼ਮਾਂ ਦਾ ਕਹਿਣਾ ਸੀ ਕਿ ਉਕਤ ਪਾੜ ਨੂੰ ਛੇਤੀ ਪੂਰਾ ਦਿੱਤਾ ਜਾਵੇਗਾ । ਜਦੋਂ ਪਾਣੀ ਬੰਦ ਹੋ ਗਿਆ ਉਦੋਂ ਮਿੱਟੀ ਦੇ ਗੱਟੇ ਭਰ ਕੇ ਲਗਾਏ ਜਾਣਗੇ । ਉਧਰ ਭਾਵੇਂ ਰਾਤ ਵੇਲੇ ਦੀ ਨਹਿਰ ਟੁੱਟੀ ਸੀ ਪਰ ਦੁਪਹਿਰ ਵੇਲੇ ਤੱਕ ਕੋਈ ਸਿਆਸੀ ਨੇਤਾ ਕਿਸਾਨਾਂ ਦੀ ਸਾਰ ਲੈਣ ਲਈ ਨਹੀਂ ਪਹੁੰਚਿਆ ਸੀ ਅਤੇ ਨਾ ਹੀ ਸਿਵਲ ਪ੍ਰਸ਼ਾਸਨ ਦਾ ਕੋਈ ਅਧਿਕਾਰੀ ਆਇਆ ਸੀ ।