ਚੱਲਦੀ ਬੱਸ ਦਾ ਟਾਇਰ ਫੱਟਣ ਕਾਰਨ ਜ਼ੋਰਦਾਰ ਧਮਾਕਾ, ਸਵਾਰੀਆਂ ਦੇ ਲੱਗੀਆਂ ਸੱਟਾਂ

ਲੁਧਿਆਣਾ (ਮੁਕੇਸ਼) : ਚੰਡੀਗੜ੍ਹ ਰੋਡ ’ਤੇ ਵਰਧਮਾਨ ਚੌਂਕ ਨੇੜੇ ਚੱਲਦੀ ਬੱਸ ਦਾ ਟਾਇਰ ਫਟ ਗਿਆ। ਜਿਉਂ ਹੀ ਟਾਇਰ ਫੱਟਿਆ, ਜ਼ੋਰਦਾਰ ਧਮਾਕਾ ਹੋਇਆ, ਜਿਸ ਦੀ ਆਵਾਜ਼ ਦੂਰ ਤੱਕ ਸੁਣਾਈ ਦਿੱਤੀ। ਧਮਾਕੇ ਦੌਰਾਨ ਸੜਕ ਤੋਂ ਲੰਘ ਰਹੇ ਵਾਹਨ ਚਾਲਕਾਂ ’ਚ ਹਫੜਾ-ਦਫੜੀ ਮਚ ਗਈ। ਲੋਕਾਂ ਦਾ ਕਹਿਣਾ ਸੀ ਕਿ ਇੰਝ ਲੱਗ ਰਿਹਾ ਸੀ ਜਿਵੇਂ ਕਿ ਬੰਬ ਫੱਟ ਗਿਆ ਹੋਵੇ। ਧਮਾਕਾ ਇੰਨਾ ਜ਼ਬਰਦਸਤ ਸੀ ਕਿ ਟਾਇਰ ਦੇ ਬਾਹਰ ਬੱਸ ਦੀ ਲੋਹੇ ਦੀ ਚਾਦਰ ਤੇ ਟਾਇਰ ’ਤੇ ਲੱਗੀ ਸੀਟ ਜਿੱਥੇ ਸਵਾਰੀਆਂ ਬੈਠੀਆਂ ਹੋਈਆਂ ਸਨ, ਫਰਸ਼ ਉੱਡ ਗਿਆ, ਜਿਸ ਕਾਰਨ 2 ਸਵਾਰੀਆਂ ਦੇ ਸੱਟਾਂ ਲੱਗੀਆਂ।

ਮਹਿਲਾ ਸਵਾਰੀ ਦਾ ਸੂਟ ਫੱਟ ਗਿਆ ਤੇ ਮੂੰਹ ਤੇ ਲੱਤ ’ਤੇ ਹਲਕੀਆਂ ਸੱਟਾਂ ਲਗੀਆਂ, ਜਦੋਂ ਕਿ ਇਕ ਪੁਰਸ਼ ਸਵਾਰੀ ਦੇ ਵੀ ਹਲਕੀਆਂ ਸੱਟਾਂ ਲਗੀਆਂ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਜਿਉਂ ਹੀ ਟਾਇਰ ਫੱਟਣ ਕਾਰਨ ਧਮਾਕਾ ਹੋਇਆ ਧੂੜ-ਮਿੱਟੀ ਦਾ ਗੁਬਾਰ ਉਨ੍ਹਾਂ ਦੇ ਮੂੰਹ-ਸਰੀਰ ’ਤੇ ਪੈ ਗਿਆ। ਕੁੱਝ ਸਮੇਂ ਲਈ ਤਾਂ ਦਿਖਣਾ ਬੰਦ ਹੋ ਗਿਆ ਸੀ ਪਰ ਦੋਵੇਂ ਠੀਕ ਹਨ। ਬੱਸ ਚਾਲਕ ਤੇ ਕੰਡਕਟਰ ਨੇ ਕਿਹਾ ਕਿ ਵਰਧਮਾਨ ਚੌਂਕ ਨੇੜੇ ਅਚਾਨਕ ਬੱਸ ਦਾ ਟਾਇਰ ਫੱਟ ਗਿਆ। ਉਨ੍ਹਾਂ ਨੇ ਬੱਸ ਸਾਈਡ ’ਤੇ ਲਗਾ ਕੇ ਸਵਾਰੀਆਂ ਨੂੰ ਦੂਜੀ ਬੱਸ ’ਚ ਰਵਾਨਾ ਕਰ ਦਿੱਤਾ।