ਭਗਵੰਤ ਮਾਨ ਦੀ ਫੇਸਬੁੱਕ ਪੋਸਟ ਤੋਂ ਬਾਅਦ ਭੜਕੇ ਲੋਕ, ਦਿੱਤੀ ਇਹ ਪ੍ਰਤੀਕਿਰਿਆ

ਸੰਗਰੂਰ— ਸੁਖਪਾਲ ਸਿੰਘ ਖਹਿਰਾ ਨੂੰ ਵਿਰੋਧੀ ਧਿਰ ਦੇ ਅਹੁਦੇ ਤੋਂ ਹਟਾਏ ਜਾਣ ਤੋਂ ਬਾਅਦ ਗੁੱਸੇ ਵਿਚ ਬੈਠੇ ਲੋਕਾਂ ਨੇ ਆਪਣਾ ਸਾਰਾ ਗੁੱਸਾ ਬੀਤੇ ਦਿਨ ਸੰਗਰੂਰ ਤੋਂ ਲੋਕ ਸਭਾ ਦੇ ਮੈਂਬਰ ਭਗਵੰਤ ਮਾਨ 'ਤੇ ਕੱਢ ਦਿੱਤਾ। ਤੁਹਾਨੂੰ ਦੱਸ ਦੇਈਏ ਕਿ ਭਗਵੰਤ ਮਾਨ ਨੇ ਬੀਤੀ ਸ਼ਾਮ ਕਰੀਬ ਸਾਢੇ 4 ਵਜੇ ਆਪਣੇ ਫੇਸਬੁੱਕ ਪੇਜ਼ 'ਤੇ ਇਕ ਪੋਸਟ ਪਾਈ ਸੀ। ਇਸ ਪੋਸਟ ਤੋਂ ਤੁਰੰਤ ਬਾਅਦ ਲੋਕਾਂ ਦੀ ਪ੍ਰਤੀਕਿਰਿਆ ਆਉਣੀ ਸ਼ੁਰੂ ਹੋ ਗਈ। ਲੋਕਾਂ ਨੇ ਭਗਵੰਤ ਮਾਨ ਦੇ ਕੰਮਾਂ ਨੂੰ ਕਬੂਲਦਿਆਂ ਜਿਥੇ ਬਠਿੰਡਾ ਕਨਵੈਨਸ਼ਨ ਵਾਲੇ ਦਿਨ ਏਮਜ਼ ਵਿਚ ਦਾਖਲ ਹੋਣ ਨੂੰ ਨਿਸ਼ਾਨਾ ਬਣਾਇਆ, ਉਥੇ ਹੀ ਦਿੱਲੀ ਵਾਲਿਆਂ ਅੱਗੇ ਝੁਕਣ ਸਬੰਧੀ ਵੀ ਭੜਾਸ ਕੱਢੀ। ਇਸ ਸਬੰਧੀ ਸਰਬਜੀਤ ਸਿੰਘ ਨੇ ਲਿਖਿਆ ਹੈ- 'ਭਗਤ ਸਿੰਘ' (ਭਗਵੰਤ ਮਾਨ) ਦਾ ਸਿਆਸੀ ਕਰੀਅਰ ਖਟਕੜ ਕਲਾਂ ਤੋਂ ਸ਼ੁਰੂ ਹੋ ਕੇ ਦਿੱਲੀ ਦੇ ਇਕ ਵੱਡੇ ਹਸਪਤਾਲ ਵਿਚ ਮੁੱਕ ਗਿਆ।' ਬਿਕਰਮ ਜੀਤ ਸਿੰਘ ਨੇ ਲਿਖਿਆ ਕਿ 'ਲੋੜ ਪੈਣ 'ਤੇ ਭਗਵੰਤ ਮਾਨ ਪਿੱਠ ਦਿਖਾ ਕੇ ਦਿੱਲੀ ਦਾ ਵਫਾਦਾਰ ਬਣ ਗਿਆ।' ਇਸ ਤਰ੍ਹਾਂ ਦੇ ਕੁਮੈਂਟ ਆਉਣ ਕਰ ਕੇ ਲੋਕਾਂ ਵਿਚ ਆਪਸੀ ਬਹਿਸ ਵੀ ਚੱਲਦੀ ਰਹੀ।
ਦਰਅਸਲ ਭਗਵੰਤ ਮਾਨ ਨੇ ਪੋਸਟ ਵਿਚ ਲਿਖਿਆ ਸੀ ਕਿ 'ਮੈਂ ਪੰਜਾਬ ਦਾ ਗਦਾਰ ਹਾਂ, ਕਿਉਂਕਿ ਮੈਂ ਪਾਰਲੀਮੈਂਟ 'ਚ ਪੰਜਾਬ ਦੇ ਹੱਕਾਂ ਦੀ ਗੱਲ ਕਰਦਾ ਹਾਂ। ਵਿਦੇਸ਼ਾਂ ਤੋਂ ਧੀਆਂ-ਪੁੱਤਾਂ ਦੀਆਂ ਲਾਸ਼ਾਂ ਮੰਗਵਾ ਦਿੰਦਾ ਹਾਂ। ਮੈਂ ਲੋਕਾਂ ਦੇ ਸਾਰੇ ਪੈਸਿਆਂ ਦਾ ਹਿਸਾਬ-ਕਿਤਾਬ ਦਿੰਦਾ ਹਾਂ। ਮੈਂ ਪੰਜਾਬ ਲਈ ਸਾਰਾ ਕਾਰੋਬਾਰ ਛੱਡ ਬੈਠਾ ਹਾਂ। ਮੈਂ ਕੈਂਸਰ ਦੇ ਮਰੀਜ਼ ਦਾ ਫ੍ਰੀ ਇਲਾਜ਼ ਕਰਵਾ ਦਿੰਦਾ ਹਾਂ। ਮੇਰੇ ਖਿਲਾਫ ਕੋਈ ਬਲਾਤਕਾਰ ਦਾ ਪਰਚਾ ਨਹੀਂ। ਮੈਂ ਚਿੱਟਾ ਵੇਚ ਕੇ ਪੰਜਾਬ ਦੇ ਘਰ ਨਹੀਂ ਉਜਾੜ ਸਕਿਆ, ਇਨ੍ਹਾਂ ਗਦਾਰੀਆਂ ਲਈ ਮੈਂ ਹੱਥ ਜੋੜ ਕੇ ਮੁਆਫੀ ਮੰਗਦਾ ਹਾਂ।'