35 ਹਜ਼ਾਰ ਵਿਦਿਆਰਥੀਆਂ ਲਈ ਖੜ੍ਹੀ ਹੋਈ ਵੱਡੀ ਮੁਸੀਬਤ! ਸਕੂਲਾਂ 'ਚ ਹੁਣ NCERT ਦੀ ਵੈੱਬਸਾਈਟ ਤੋਂ ਹੀ...

ਚੰਡੀਗੜ੍ਹ (ਆਸ਼ੀਸ਼) : ਨਵੀਂ ਸਿੱਖਿਆ ਨੀਤੀ ਦੇ ਤਹਿਤ ਸਿਲੇਬਸ ’ਚ ਕੀਤੇ ਬਦਲਾਅ ਕਾਰਨ ਸ਼ਹਿਰ ਦੇ ਸਕੂਲਾਂ ’ਚ ਨਵੀਆਂ ਕਿਤਾਬਾਂ ਦੀ ਭਾਰੀ ਕਮੀ ਸਾਹਮਣੇ ਆਈ ਹੈ। ਨਵਾਂ ਅਕਾਦਮਿਕ ਸੈਸ਼ਨ ਸ਼ੁਰੂ ਹੋਣ ਦੇ ਬਾਵਜੂਦ ਨੌਵੀਂ, ਦਸਵੀਂ ਤੇ ਬਾਰ੍ਹਵੀਂ ਜਮਾਤ ਦੀਆਂ ਕਲਾਸਾਂ ਲਈ ਐੱਨ. ਸੀ. ਈ. ਆਰ. ਟੀ. ਦੀਆਂ ਕਿਤਾਬਾਂ ਅਜੇ ਤੱਕ ਸਕੂਲਾਂ ’ਚ ਨਹੀਂ ਪਹੁੰਚੀਆਂ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਸਿੱਖਿਆ ਵਿਭਾਗ ਵੱਲੋਂ ਕਿਤਾਬਾਂ ਲਈ ਪੌਣੇ ਚਾਰ ਕਰੋੜ ਰੁਪਏ ਦਾ ਭੁਗਤਾਨ ਵੀ ਕੀਤਾ ਜਾ ਚੁੱਕਾ ਹੈ ਪਰ ਜ਼ਮੀਨੀ ਹਕੀਕਤ ’ਚ ਵਿਦਿਆਰਥੀ ਅਜੇ ਵੀ ਉਡੀਕ ਕਰ ਰਹੇ ਹਨ। ਸਭ ਤੋਂ ਵੱਧ ਪ੍ਰਭਾਵ ਸਰਕਾਰੀ ਸਕੂਲਾਂ ’ਚ ਵੇਖਣ ਨੂੰ ਮਿਲ ਰਿਹਾ ਹੈ, ਜਿੱਥੇ ਇਸ ਸਾਲ ਤੋਂ ਚਾਰ ਜਮਾਤਾਂ (9ਵੀਂ ਤੋਂ 12ਵੀਂ) ਲਈ ਮੁਫ਼ਤ ਕਿਤਾਬਾਂ ਦੇਣ ਦਾ ਫ਼ੈਸਲਾ ਲਾਗੂ ਕੀਤਾ ਗਿਆ ਸੀ ਪਰ ਕਿਤਾਬਾਂ ਨਾ ਪਹੁੰਚਣ ਕਾਰਨ ਇਹ ਯੋਜਨਾ ਹੀ ਸੰਕਟ ਬਣ ਗਈ ਹੈ। ਸ਼ਹਿਰ ਦੇ 117 ਸਰਕਾਰੀ ਸਕੂਲਾਂ ’ਚ ਕਰੀਬ 35 ਹਜ਼ਾਰ ਵਿਦਿਆਰਥੀ ਪੜ੍ਹਾਈ ਲਈ ਪੂਰੀ ਤਰ੍ਹਾਂ ਕਿਤਾਬਾਂ ਤੋਂ ਵਾਂਝੇ ਹਨ।

ਪੀ. ਡੀ. ਐੱਫ. ਅਤੇ ਨੋਟਸ ਬਣੇ ਸਹਾਰਾ

ਕਿਤਾਬਾਂ ਦੀ ਘਾਟ ਕਾਰਨ ਅਧਿਆਪਕ ਹੁਣ ਆਨਲਾਈਨ ਰਸਤੇ ਅਪਣਾਉਣ ਲਈ ਮਜਬੂਰ ਹਨ। ਕਈ ਸਕੂਲਾਂ ’ਚ ਅਧਿਆਪਕ ਐੱਨ. ਸੀ. ਈ. ਆਰ. ਟੀ. ਦੀ ਵੈੱਬਸਾਈਟ ਤੋਂ ਪੀ. ਡੀ. ਐੱਫ. ਡਾਊਨਲੋਡ ਕਰਕੇ ਵਿਦਿਆਰਥੀਆਂ ਨੂੰ ਪੜ੍ਹਾ ਰਹੇ ਹਨ, ਜਦਕਿ ਕਈ ਥਾਵਾਂ ’ਤੇ ਅਧਿਆਪਕ ਆਪਣੇ ਨੋਟਸ ਤਿਆਰ ਕਰਕੇ ਪਾਠ ਕਰਵਾ ਰਹੇ ਹਨ। ਜ਼ਿਲ੍ਹਾ ਸਿੱਖਿਆ ਦਫ਼ਤਰ ਵੱਲੋਂ ਵੀ ਸਕੂਲਾਂ ਨੂੰ ਨਿਰਦੇਸ਼ ਦਿੱਤੇ ਗਏ ਹਨ ਕਿ ਪਹਿਲੇ ਚਾਰ ਪਾਠਾਂ ਦੀਆਂ ਫੋਟੋ ਕਾਪੀਆਂ ਵਿਦਿਆਰਥੀਆਂ ਨੂੰ ਦਿੱਤੀਆਂ ਜਾਣ।
ਇਹ ਵੀ ਪੜ੍ਹੋ : ਪੰਜਾਬੀ ਹੋ ਜਾਣ ਸਾਵਾਧਾਨ! ਅਗਲੇ 3 ਘੰਟਿਆਂ ਲਈ ਮੌਸਮ ਵਿਭਾਗ ਨੇ ਜਾਰੀ ਕੀਤੀ ਵੱਡੀ ਚਿਤਾਵਨੀ

ਦੇਰੀ ਨਾਲ ਫ਼ੈਸਲਾ, ਛਪਾਈ ’ਚ ਵੀ ਹੋਈ ਦੇਰੀ

ਜਾਣਕਾਰੀ ਅਨੁਸਾਰ ਨਵੇਂ ਸਿਲੇਬਸ ’ਚ ਸਭ ਤੋਂ ਵੱਧ ਬਦਲਾਅ ਨੌਵੀਂ ਜਮਾਤ ’ਚ ਕੀਤਾ ਗਿਆ ਹੈ। ਇਹ ਫ਼ੈਸਲਾ ਦਸੰਬਰ-ਜਨਵਰੀ ’ਚ ਦੇਰੀ ਨਾਲ ਲਿਆ ਗਿਆ, ਜਿਸ ਕਾਰਨ ਕਿਤਾਬਾਂ ਦੀ ਛਪਾਈ ਵੀ ਸਮੇਂ ’ਤੇ ਨਹੀਂ ਹੋ ਸਕੀ। ਇਸ ਦਾ ਸਿੱਧਾ ਅਸਰ ਸਪਲਾਈ ’ਤੇ ਪਿਆ ਤੇ ਨਵਾਂ ਸੈਸ਼ਨ ਸ਼ੁਰੂ ਹੋਣ ਤੱਕ ਕਿਤਾਬਾਂ ਉਪਲੱਬਧ ਨਹੀਂ ਹੋ ਸਕੀਆਂ।

ਪ੍ਰਾਈਵੇਟ ਸਕੂਲ ਵੀ ਪ੍ਰਭਾਵਿਤ

ਸਮੱਸਿਆ ਸਿਰਫ਼ ਸਰਕਾਰੀ ਸਕੂਲਾਂ ਤੱਕ ਸੀਮਤ ਨਹੀਂ ਰਹੀ। ਪ੍ਰਾਈਵੇਟ ਸਕੂਲਾਂ ਦੇ ਵਿਦਿਆਰਥੀਆਂ ਨੂੰ ਵੀ ਬਾਜ਼ਾਰ ’ਚ ਨਵੇਂ ਸਿਲੇਬਸ ਦੀਆਂ ਸਾਰੀਆਂ ਕਿਤਾਬਾਂ ਪੂਰੀਆਂ ਤਰ੍ਹਾਂ ਨਹੀਂ ਮਿਲ ਰਹੀਆਂ। ਕੁੱਝ ਵਿਦਿਆਰਥੀਆਂ ਨੇ ਅਧੂਰੀਆਂ ਕਿਤਾਬਾਂ ਖ਼ਰੀਦੀਆਂ ਹਨ, ਜਿਸ ਨਾਲ ਉਨ੍ਹਾਂ ਦੀ ਪੜ੍ਹਾਈ ਵੀ ਪ੍ਰਭਾਵਿਤ ਹੋ ਰਹੀ ਹੈ।

ਇਹ ਵੀ ਪੜ੍ਹੋ : ਪੰਜਾਬ ਦੀਆਂ ਤਹਿਸੀਲਾਂ ਨੂੰ ਲੈ ਕੇ 9 ਤੇ 10 ਅਪ੍ਰੈਲ ਲਈ ਵੱਡਾ ਐਲਾਨ, ਪੜ੍ਹੋ ਕੀ ਹੈ ਪੂਰੀ ਖ਼ਬਰ

ਪਿਛਲੇ ਸਾਲ ਤੋਂ ਵੱਖਰਾ ਪ੍ਰਬੰਧ ਬਣਿਆ ਮੁੱਦਾ

ਪਿਛਲੇ ਸਾਲ ਤੱਕ ਸਰਕਾਰੀ ਸਕੂਲਾਂ ਦੇ ਵਿਦਿਆਰਥੀ ਆਪਣੀਆਂ ਕਿਤਾਬਾਂ ਖ਼ੁਦ ਬਾਜ਼ਾਰ ਤੋਂ ਖ਼ਰੀਦਦੇ ਸਨ, ਜਿਸ ਨਾਲ ਅਜਿਹੀ ਸਮੱਸਿਆ ਨਹੀਂ ਆਉਂਦੀ ਸੀ। ਇਸ ਸਾਲ ਮੁਫ਼ਤ ਵੰਡ ਦੇ ਨਵੇਂ ਪ੍ਰਬੰਧ ਨੇ ਸਮੇਂ ਸਿਰ ਸਪਲਾਈ ਨਾ ਹੋਣ ਕਾਰਨ, ਸਿਸਟਮ ਨੂੰ ਅਸਰ ਗ੍ਰਸਤ ਕਰ ਦਿੱਤਾ ਹੈ।

15 ਦਿਨਾਂ ’ਚ ਹਾਲਤ ਸੁਧਰਨ ਦੀ ਉਮੀਦ

ਜ਼ਿਲ੍ਹਾ ਸਿੱਖਿਆ ਅਧਿਕਾਰੀ ਦੇਵੇਂਦਰ ਕੁਮਾਰ ਮੁਤਾਬਕ ਕਿਤਾਬਾਂ ਦਾ ਆਰਡਰ ਦਿੱਤਾ ਜਾ ਚੁੱਕਾ ਹੈ ਅਤੇ ਭੁਗਤਾਨ ਵੀ ਹੋ ਗਿਆ ਹੈ। ਵਿਭਾਗ ਲਗਾਤਾਰ ਐੱਨ. ਸੀ. ਈ. ਆਰ. ਟੀ. ਨਾਲ ਸੰਪਰਕ ’ਚ ਹੈ। ਉਨ੍ਹਾਂ ਨੇ ਦਾਅਵਾ ਕੀਤਾ ਕਿ ਅਗਲੇ 10 ਤੋਂ 15 ਦਿਨਾਂ ’ਚ ਕਿਤਾਬਾਂ ਸਕੂਲਾਂ ਤੱਕ ਪਹੁੰਚ ਜਾਣਗੀਆਂ। ਫਿਲਹਾਲ ਵਿਦਿਆਰਥੀਆਂ ਤੇ ਅਧਿਆਪਕਾਂ ਨੂੰ ਅਸਥਾਈ ਪ੍ਰਬੰਧਾਂ ਨਾਲ ਹੀ ਕੰਮ ਚਲਾਉਣਾ ਪੈ ਰਿਹਾ ਹੈ ਪਰ ਸਵਾਲ ਇਹ ਹੈ ਕਿ ਜਦੋਂ ਭੁਗਤਾਨ ਸਮੇਂ ਸਿਰ ਹੋ ਗਿਆ ਸੀ ਤਾਂ ਸਪਲਾਈ ਕਿਉਂ ਨਹੀਂ ਹੋ ਸਕੀ, ਇਹ ਗੱਲ ਸਿੱਖਿਆ ਪ੍ਰਣਾਲੀ ’ਤੇ ਗੰਭੀਰ ਸਵਾਲ ਖੜ੍ਹੇ ਕਰਦੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8