UPI ਨੇ ਬਣਾਇਆ ਰਿਕਾਰਡ, ਦਸੰਬਰ ’ਚ ₹16.73 ਬਿਲੀਅਨ ਦੀ ਕੀਤੀ ਟ੍ਰਾਂਜ਼ੈਕਸ਼ਨ

ਨੈਸ਼ਨਲ ਡੈਸਕ - ਦਸੰਬਰ 2024 ਦੇ ਮਹੀਨੇ ’ਚ, ਭਾਰਤ ਦੇ ਲੋਕ ਡਿਜੀਟਲ ਭੁਗਤਾਨ ਕਰਨ ਲਈ ਯੂਨੀਫਾਈਡ ਪੇਮੈਂਟਸ ਇੰਟਰਫੇਸ (UPI) ਵੱਲ ਵਧੇ। ਲੋਕਾਂ ਨੇ ਇਸ ਰਾਹੀਂ ਇੰਨੇ ਪੈਸੇ ਦਾ ਲੈਣ-ਦੇਣ ਕੀਤਾ ਕਿ ਰਿਕਾਰਡ ਬਣ ਗਿਆ। ਨੈਸ਼ਨਲ ਪੇਮੈਂਟਸ ਕਾਰਪੋਰੇਸ਼ਨ ਆਫ ਇੰਡੀਆ (NPCI) ਦੇ ਅੰਕੜਿਆਂ ਅਨੁਸਾਰ, ਦਸੰਬਰ 2024 ’ਚ UPI ਰਾਹੀਂ ਲੈਣ-ਦੇਣ ਦੀ ਗਿਣਤੀ 8% ਵਧ ਕੇ ਰਿਕਾਰਡ 16.73 ਬਿਲੀਅਨ ਹੋ ਗਈ ਹੈ। ਇਹ ਵਾਧਾ ਭਾਰਤ ’ਚ ਡਿਜੀਟਲ ਭੁਗਤਾਨ ਪ੍ਰਣਾਲੀਆਂ ਦੀ ਵਧਦੀ ਪ੍ਰਸਿੱਧੀ ਅਤੇ ਸਹੂਲਤ ਨੂੰ ਦਰਸਾਉਂਦਾ ਹੈ।

UPI ਪੇਮੈਂਟ ’ਚ ਗ੍ਰੋਥ
ਨਵੰਬਰ 2024 ’ਚ UPI ਲੈਣ-ਦੇਣ ਦੀ ਗਿਣਤੀ 15.48 ਅਰਬ ਸੀ। ਦਸੰਬਰ 'ਚ ਕੁੱਲ ਟ੍ਰਾਂਜੈਕਸ਼ਨ ਵੈਲਿਊ 23.25 ਲੱਖ ਕਰੋੜ ਰੁਪਏ ਸੀ, ਜੋ ਨਵੰਬਰ 'ਚ 21.55 ਲੱਖ ਕਰੋੜ ਰੁਪਏ ਸੀ। ਲੋਕ UPI ਰਾਹੀਂ ਵੱਡੇ ਪੱਧਰ 'ਤੇ ਲੈਣ-ਦੇਣ ਕਰ ਰਹੇ ਹਨ, ਜਿਸ ਕਾਰਨ ਇਸ ਦੀ ਮਹੱਤਤਾ ਵਧ ਰਹੀ ਹੈ।

UPI ਦੇ ਰਾਹੀਂ ਰੋਜ਼ਾਨਾ ਔਸਤ ਲੈਣ-ਦੇਣ
ਦਸੰਬਰ 2024 ’ਚ, ਰੋਜ਼ਾਨਾ ਔਸਤਨ 53.97 ਕਰੋੜ ਲੈਣ-ਦੇਣ ਹੋਏ। ਨਵੰਬਰ 2024 ’ਚ ਇਹ ਅੰਕੜਾ 51.1 ਕਰੋੜ ਸੀ। ਦਸੰਬਰ 'ਚ ਰੋਜ਼ਾਨਾ ਲੈਣ-ਦੇਣ ਦਾ ਔਸਤ ਮੁੱਲ 74,990 ਕਰੋੜ ਰੁਪਏ ਰਿਹਾ। ਨਵੰਬਰ 'ਚ ਇਹ 71,840 ਕਰੋੜ ਰੁਪਏ ਸੀ। ਦਸੰਬਰ 'ਚ ਨਾ ਸਿਰਫ UPI ਲੈਣ-ਦੇਣ ਦੀ ਗਿਣਤੀ ਸਗੋਂ ਇਸ ਦੇ ਮੁੱਲ 'ਚ ਵੀ ਕਾਫੀ ਵਾਧਾ ਦਰਜ ਕੀਤਾ ਗਿਆ।

UPI ਦੀ ਕਿੱਥੇ-ਕਿੱਥੇ ਹੁੰਦੀ ਹੈ ਵਰਤੋ
ਨੈਸ਼ਨਲ ਪੇਮੈਂਟਸ ਕਾਰਪੋਰੇਸ਼ਨ ਆਫ ਇੰਡੀਆ (NPCI) ਭਾਰਤ ’ਚ ਡਿਜੀਟਲ ਲੈਣ-ਦੇਣ ਦੀ ਨਿਗਰਾਨੀ ਕਰਦਾ ਹੈ। NPCI UPI ਦਾ ਸੰਚਾਲਨ ਕਰਦਾ ਹੈ, ਜੋ ਕਿ ਡਿਜੀਟਲ ਭੁਗਤਾਨ ਦਾ ਇਕ ਸੁਰੱਖਿਅਤ ਅਤੇ ਭਰੋਸੇਮੰਦ ਸਾਧਨ ਹੈ। UPI ਦੀ ਮਦਦ ਨਾਲ ਲੋਕ ਆਪਸ 'ਚ ਪੈਸੇ ਭੇਜਦੇ ਹਨ, ਦੁਕਾਨਾਂ 'ਤੇ ਭੁਗਤਾਨ ਕਰਦੇ ਹਨ ਅਤੇ ਬਿੱਲਾਂ ਦਾ ਨਿਪਟਾਰਾ ਕਰਦੇ ਹਨ। ਇਹ ਪ੍ਰਕਿਰਿਆ ਨਾ ਸਿਰਫ ਤੇਜ਼ ਅਤੇ ਆਸਾਨ ਹੈ, ਸਗੋਂ ਇਹ ਨਕਦ ਲੈਣ-ਦੇਣ 'ਤੇ ਨਿਰਭਰਤਾ ਨੂੰ ਵੀ ਘਟਾਉਂਦੀ ਹੈ।

UPI ਦਾ ਭਾਰਤ ’ਚ ਤੇਜ਼ੀ ਨਾਲ ਵੱਧ ਰਿਹਾ ਰੁਝਾਣ
ਭਾਰਤ ’ਚ ਡਿਜੀਟਲ ਭੁਗਤਾਨ ਦਾ ਰੁਝਾਣ ਤੇਜ਼ੀ ਨਾਲ ਵੱਧ ਰਿਹਾ ਹੈ। ਇਹ ਨਾ ਸਿਰਫ਼ ਵੱਡੇ ਸ਼ਹਿਰਾਂ ’ਚ ਸਗੋਂ ਛੋਟੇ ਕਸਬਿਆਂ ਅਤੇ ਪੇਂਡੂ ਖੇਤਰਾਂ ’ਚ ਵੀ ਪ੍ਰਸਿੱਧ ਹੋ ਰਿਹਾ ਹੈ। UPI ਨੇ ਭਾਰਤ ਨੂੰ ਨਕਦੀ ਰਹਿਤ ਅਰਥਵਿਵਸਥਾ ਵੱਲ ਵਧਾਇਆ ਹੈ। ਇਸਦੀ ਵਰਤੋਂ ਕਰਨ ਨਾਲ ਸਮੇਂ ਦੀ ਬਚਤ ਹੁੰਦੀ ਹੈ ਅਤੇ ਪ੍ਰਕਿਰਿਆ ਪਾਰਦਰਸ਼ੀ ਅਤੇ ਸੁਰੱਖਿਅਤ ਹੁੰਦੀ ਹੈ। ਇਸ ਨਾਲ, ਲੈਣ-ਦੇਣ ਹਰ ਕਿਸੇ ਲਈ ਸਰਲ ਅਤੇ ਪਹੁੰਚਯੋਗ ਹੋ ਗਿਆ ਹੈ।