ਰੇਲਵੇ ਯਾਤਰੀ ਦੇਣ ਧਿਆਨ! 1 ਮਾਰਚ ਤੋਂ ਬਦਲ ਜਾਵੇਗਾ ਟਿਕਟ ਬੁਕਿੰਗ ਸਿਸਟਮ; ਇਹ ਐਪ ਹੋਵੇਗੀ ਬੰਦ

ਨੈਸ਼ਨਲ ਡੈਸਕ : ਭਾਰਤੀ ਰੇਲਵੇ ਨੇ ਆਪਣੇ ਡਿਜੀਟਲ ਟਿਕਟਿੰਗ ਸਿਸਟਮ ਵਿੱਚ ਇੱਕ ਵੱਡਾ ਬਦਲਾਅ ਕਰਨ ਦਾ ਫੈਸਲਾ ਕੀਤਾ ਹੈ। 1 ਮਾਰਚ, 2026 ਤੋਂ ਜਨਰਲ ਅਤੇ ਪਲੇਟਫਾਰਮ ਟਿਕਟਾਂ ਦੀ ਬੁਕਿੰਗ ਲਈ ਵਰਤੀ ਜਾਣ ਵਾਲੀ ਪ੍ਰਸਿੱਧ UTS (Unreserved Ticketing System) ਐਪ ਪੂਰੀ ਤਰ੍ਹਾਂ ਕੰਮ ਕਰਨਾ ਬੰਦ ਕਰ ਦੇਵੇਗੀ। ਰੇਲਵੇ ਨੇ ਯਾਤਰੀਆਂ ਨੂੰ ਹੁਣ ਨਵੀਂ ਸੁਪਰ ਐਪ 'RailOne' ਦੀ ਵਰਤੋਂ ਕਰਨ ਦੀ ਸਲਾਹ ਦਿੱਤੀ ਹੈ।

ਇੱਕੋ ਐਪ 'ਚ ਮਿਲਣਗੀਆਂ ਸਾਰੀਆਂ ਸਹੂਲਤਾਂ 
ਰੇਲਵੇ ਅਨੁਸਾਰ ਇਹ ਬਦਲਾਅ ਯਾਤਰੀਆਂ ਨੂੰ ਇੱਕੋ ਪਲੇਟਫਾਰਮ 'ਤੇ ਸਾਰੀਆਂ ਸੇਵਾਵਾਂ ਪ੍ਰਦਾਨ ਕਰਨ ਦੇ ਮਕਸਦ ਨਾਲ ਕੀਤਾ ਗਿਆ ਹੈ। 'RailOne' ਐਪ ਸਿਰਫ਼ ਜਨਰਲ ਟਿਕਟਾਂ ਤੱਕ ਹੀ ਸੀਮਿਤ ਨਹੀਂ ਹੈ, ਸਗੋਂ ਇਸ ਵਿੱਚ ਰਿਜ਼ਰਵ ਟਿਕਟ ਬੁਕਿੰਗ, ਲਾਈਵ ਟ੍ਰੇਨ ਸਟੇਟਸ, ਕੋਚ ਪੋਜੀਸ਼ਨ, ਪੀ.ਐਨ.ਆਰ. (PNR) ਸਟੇਟਸ ਅਤੇ ਪਲੇਟਫਾਰਮ ਦੀ ਜਾਣਕਾਰੀ ਵਰਗੀਆਂ ਸਹੂਲਤਾਂ ਮਿਲਣਗੀਆਂ। ਇਸ ਤੋਂ ਇਲਾਵਾ, ਇਸ ਵਿੱਚ IRCTC ਰੇਲ ਕਨੈਕਟ, ਰੇਲ ਮਦਦ ਅਤੇ 'ਫੂਡ ਆਨ ਟ੍ਰੈਕ' ਵਰਗੀਆਂ ਸੇਵਾਵਾਂ ਨੂੰ ਵੀ ਜੋੜਿਆ ਗਿਆ ਹੈ।

R-Wallet ਦਾ ਬੈਲੇਂਸ ਰਹੇਗਾ ਸੁਰੱਖਿਅਤ 
ਯਾਤਰੀਆਂ ਲਈ ਰਾਹਤ ਦੀ ਖ਼ਬਰ ਇਹ ਹੈ ਕਿ UTS ਐਪ ਦੇ R-Wallet ਵਿੱਚ ਮੌਜੂਦ ਉਨ੍ਹਾਂ ਦਾ ਬੈਲੇਂਸ ਬੇਕਾਰ ਨਹੀਂ ਜਾਵੇਗਾ। ਯਾਤਰੀ ਉਸੇ ਪੁਰਾਣੀ ਲੋਗਇਨ ਆਈਡੀ ਅਤੇ ਪਾਸਵਰਡ ਦੀ ਵਰਤੋਂ ਕਰਕੇ 'RailOne' ਐਪ ਵਿੱਚ ਸਾਈਨ-ਇਨ ਕਰ ਸਕਦੇ ਹਨ ਅਤੇ ਆਪਣੇ ਵਾਲਿਟ ਬੈਲੇਂਸ ਦੀ ਵਰਤੋਂ ਕਰ ਸਕਦੇ ਹਨ। ਭੁਗਤਾਨ ਲਈ ਯੂ.ਪੀ.ਆਈ. (UPI), ਡੈਬਿਟ-ਕ੍ਰੈਡਿਟ ਕਾਰਡ ਅਤੇ ਨੈੱਟ ਬੈਂਕਿੰਗ ਵਰਗੇ ਵਿਕਲਪ ਵੀ ਉਪਲਬਧ ਰਹਿਣਗੇ।

ਡਿਜੀਟਲ ਬੁਕਿੰਗ 'ਤੇ ਮਿਲੇਗੀ 3% ਦੀ ਛੋਟ 
ਨਵੀਂ ਐਪ ਨੂੰ ਉਤਸ਼ਾਹਿਤ ਕਰਨ ਲਈ ਰੇਲਵੇ ਵੱਲੋਂ ਜਨਰਲ ਟਿਕਟ ਦੀ ਡਿਜੀਟਲ ਬੁਕਿੰਗ 'ਤੇ 3% ਦੀ ਛੋਟ ਦਿੱਤੀ ਜਾ ਰਹੀ ਹੈ। ਇਹ ਪੇਸ਼ਕਸ਼ 14 ਜੁਲਾਈ 2026 ਤੱਕ ਮਿਆਦ ਰਹੇਗੀ। ਰੇਲਵੇ ਨੇ ਯਾਤਰੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਸਮੇਂ ਸਿਰ 'RailOne' ਐਪ ਡਾਊਨਲੋਡ ਕਰ ਲੈਣ ਤਾਂ ਜੋ 1 ਮਾਰਚ ਤੋਂ ਬਾਅਦ ਟਿਕਟ ਬੁਕਿੰਗ ਵਿੱਚ ਕਿਸੇ ਤਰ੍ਹਾਂ ਦੀ ਪਰੇਸ਼ਾਨੀ ਨਾ ਆਵੇ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e