ਦਿੱਲੀ ਯੂਨੀਵਰਸਿਟੀ ਵਿਦਿਆਰਥੀ ਸੰਘ ਦੇ ਦਫ਼ਤਰ ''ਚ ਹੰਗਾਮਾ, ਪ੍ਰਧਾਨ ਤੇ ਉਪ ਪ੍ਰਧਾਨ ਵਿਚਾਲੇ ਹੋਈ ਮਾਰਕੁੱਟ
Monday, Jul 15, 2024 - 06:06 AM (IST)
![](https://static.jagbani.com/multimedia/2024_7image_06_05_399310903delhiuniversity.jpg)
ਨੈਸ਼ਨਲ ਡੈਸਕ : ਰਾਸ਼ਟਰੀ ਸਵੈਮ ਸੇਵਕ ਸੰਘ (ਆਰਐੱਸਐੱਸ) ਨਾਲ ਸਬੰਧਤ ਅਖਿਲ ਭਾਰਤੀ ਵਿਦਿਆਰਥੀ ਪ੍ਰੀਸ਼ਦ (ਏਬੀਵੀਪੀ) ਨੇ ਐਤਵਾਰ ਨੂੰ ਦੋਸ਼ ਲਾਇਆ ਕਿ ਦਿੱਲੀ ਯੂਨੀਵਰਸਿਟੀ ਸਟੂਡੈਂਟਸ ਯੂਨੀਅਨ (ਡੀਯੂਐੱਸਯੂ) ਦੇ ਉਪ ਪ੍ਰਧਾਨ ਅਭੀ ਦਹੀਆ ਸਮੇਤ ਐੱਨਐੱਸਯੂਆਈ ਦੇ ਕੁਝ ਮੈਂਬਰਾਂ ਨੇ ਉੱਤਰੀ ਕੈਂਪਸ ਵਿਚ ਵਿਦਿਆਰਥੀ ਯੂਨੀਅਨ ਦੇ ਦਫ਼ਤਰ ਵਿਚ ਭੰਨਤੋੜ ਕੀਤੀ। ਪੁਲਸ ਨੇ ਕਿਹਾ ਕਿ ਉਨ੍ਹਾਂ ਨੂੰ ਸ਼ਿਕਾਇਤ ਮਿਲੀ ਹੈ ਅਤੇ ਐੱਫਆਈਆਰ ਦਰਜ ਕੀਤੀ ਜਾਵੇਗੀ। ਡਿਪਟੀ ਕਮਿਸ਼ਨਰ ਆਫ ਪੁਲਸ (ਉੱਤਰੀ) ਐੱਮ.ਕੇ. ਮੀਨਾ ਨੇ ਕਿਹਾ, "ਮੌਰੀਸ ਨਗਰ ਪੁਲਸ ਸਟੇਸ਼ਨ 'ਚ ਸ਼ਿਕਾਇਤ ਮਿਲੀ ਹੈ। ਪੁਲਸ ਮਾਮਲੇ ਦੀ ਜਾਂਚ ਕਰੇਗੀ ਅਤੇ ਉਸ ਮੁਤਾਬਕ ਕਾਰਵਾਈ ਕਰੇਗੀ।"
ਏਬੀਵੀਪੀ ਦੇ ਇਕ ਬਿਆਨ ਦੇ ਅਨੁਸਾਰ, ਕਾਂਗਰਸ ਦੇ ਵਿਦਿਆਰਥੀ ਵਿੰਗ ਨੈਸ਼ਨਲ ਸਟੂਡੈਂਟਸ ਯੂਨੀਅਨ ਆਫ ਇੰਡੀਆ (ਐੱਨਐੱਸਯੂਆਈ) ਦੇ ਮੈਂਬਰ ਦਹੀਆ ਅਤੇ ਹੋਰਾਂ ਨੇ ਐਤਵਾਰ ਸਵੇਰੇ ਡੀਯੂਐੱਸਯੂ ਦੇ ਪ੍ਰਧਾਨ ਤੁਸ਼ਾਰ ਡੇਢਾ, ਡੀਯੂਐੱਸਯੂ ਸਕੱਤਰ ਅਪਰਾਜਿਤਾ, ਡੀਯੂਐੱਸਯੂ ਦੇ ਸੰਯੁਕਤ ਸਕੱਤਰ ਸਚਿਨ ਬੈਸਲਾ ਦੇ ਦਫਤਰਾਂ ਅਤੇ ਵਿਜ਼ਟਰ ਰੂਮ ਵਿਚ ਭੰਨਤੋੜ ਕੀਤੀ।
ਇਹ ਵੀ ਪੜ੍ਹੋ : ਆਤਿਸ਼ੀ ਨੇ ਕੇਜਰੀਵਾਲ ਦੀ ਸਿਹਤ ਨੂੰ ਦੱਸਿਆ ਖ਼ਤਰਾ, ਕਿਹਾ- 'ਵਜ਼ਨ 8.5 KG ਘਟਿਆ, ਸ਼ੂਗਰ ਲੇਵਲ ਵੀ ਹੇਠਾਂ ਡਿੱਗਿਆ
ਐੱਨਐੱਸਯੂਆਈ ਨੇ ਦੋਸ਼ ਲਾਇਆ, ‘‘ਹਮਲਾਵਰਾਂ ਨੇ ਪਹਿਲਾਂ ਡੀਯੂਐੱਸਯੂ ਦੇ ਉਪ ਪ੍ਰਧਾਨ ਅਭੀ ਦਹੀਆ ਦੇ ਦਫ਼ਤਰ ਵਿਚ ਸ਼ਰਾਬ ਪੀਤੀ ਅਤੇ ਫਿਰ ਡੀਯੂਐੱਸਯੂ ਦਫ਼ਤਰ ਵਿਚ ਭੰਨਤੋੜ ਕੀਤੀ। ਏਬੀਵੀਪੀ ਨੇ ਦਹੀਆ ਦੇ ਦਫ਼ਤਰ ਦਾ ਇਕ ਵੀਡੀਓ ਸਾਂਝਾ ਕੀਤਾ ਹੈ, ਜਿਸ ਵਿਚ ਕੁਝ ਖਾਲੀ ਬੋਤਲਾਂ ਦਿਖਾਈ ਦੇ ਰਹੀਆਂ ਹਨ। ਗਰੁੱਪ ਨੇ ਦਫਤਰਾਂ ਤੋਂ ਕੁਝ ਰਿਕਾਰਡਿੰਗਾਂ ਵੀ ਸਾਂਝੀਆਂ ਕੀਤੀਆਂ। ਵਿਦਿਆਰਥੀ ਸੰਗਠਨ ਨੇ ਦਿੱਲੀ ਯੂਨੀਵਰਸਿਟੀ ਪ੍ਰਸ਼ਾਸਨ ਤੋਂ ਦਹੀਆ ਨੂੰ ਉਪ ਪ੍ਰਧਾਨ ਦੇ ਅਹੁਦੇ ਤੋਂ ਹਟਾਉਣ ਦੀ ਮੰਗ ਕੀਤੀ ਹੈ। ਐੱਨਐੱਸਯੂਆਈ ਨੇ ਦੋਸ਼ਾਂ ਤੋਂ ਇਨਕਾਰ ਕਰਦਿਆਂ ਏਬੀਵੀਪੀ ’ਤੇ ਯੂਨੀਅਨ ਦੇ ਮੀਤ ਪ੍ਰਧਾਨ ਦੇ ਦਫ਼ਤਰ ਵਿਚ ਭੰਨਤੋੜ ਕਰਨ ਦਾ ਦੋਸ਼ ਲਾਇਆ।
ਦਹੀਆ ਨੇ ਇਕ ਬਿਆਨ ਵਿਚ ਕਿਹਾ, "ਬੀਤੀ ਰਾਤ ਕਈ ਏਬੀਵੀਪੀ ਮੈਂਬਰਾਂ ਨੇ ਦਿੱਲੀ ਯੂਨੀਵਰਸਿਟੀ ਵਿਚ ਮੇਰੇ ਦਫ਼ਤਰ 'ਤੇ ਹਮਲਾ ਕੀਤਾ। ਉਨ੍ਹਾਂ ਦੀ ਪ੍ਰਤੀਕਿਰਿਆ ਉਦੋਂ ਆਈ ਜਦੋਂ ਮੈਂ ਏਬੀਵੀਪੀ ਦੇ ਇਕ ਕਾਰਜਕਾਰੀ ਅਤੇ ਡੀਯੂਐੱਸਯੂ ਦੇ ਪ੍ਰਧਾਨ ਦੀ ਫਰਜ਼ੀ ਡਿਗਰੀ ਦਾ ਪਰਦਾਫਾਸ਼ ਕੀਤਾ।" ਉਨ੍ਹਾਂ ਕਿਹਾ, "ਏਬੀਵੀਪੀ ਮੈਨੂੰ ਅਤੇ ਐੱਨਐੱਸਯੂਆਈ ਨੂੰ ਬਦਨਾਮ ਕਰਨ ਦੀ ਸਾਜ਼ਿਸ਼ ਰਚ ਰਹੀ ਹੈ। ਮੈਂ ਕਾਨੂੰਨੀ ਕਾਰਵਾਈ ਕਰਕੇ ਅਤੇ ਅਦਾਲਤ ਵਿਚ ਸੱਚਾਈ ਸਾਹਮਣੇ ਲਿਆ ਕੇ ਇਸ ਸਾਜ਼ਿਸ਼ ਦਾ ਪਰਦਾਫਾਸ਼ ਕਰਾਂਗਾ।" ਉਨ੍ਹਾਂ ਘਟਨਾ ਦੀ ਸੀਸੀਟੀਵੀ ਫੁਟੇਜ ਜਨਤਕ ਕਰਨ ਦੀ ਵੀ ਮੰਗ ਕੀਤੀ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8