ਨਵੀਂ ਦਿੱਲੀ - ਭਾਰਤੀ ਵਿਗਿਆਨੀਆਂ ਨੇ ਬ੍ਰੈਸਟ ਕੈਂਸਰ ਦੇ ਇਲਾਜ ਲਈ ਇਕ ਨਵੀਂ ਅਤੇ ਕਾਰਗਰ ਉਮੀਦ ਜਗਾਈ ਹੈ। ਪੁਣੇ ਸਥਿਤ ਅਘਰਕਰ ਰਿਸਰਚ ਇੰਸਟੀਚਿਊਟ ਦੇ ਖੋਜਕਰਤਾਵਾਂ ਨੇ ਅਜਿਹੇ ਸੂਖਮ 'ਨੈਨੋ-ਕਣ' ਵਿਕਸਿਤ ਕੀਤੇ ਹਨ, ਜੋ ਸਰੀਰ ਦੇ ਤੰਦਰੁਸਤ ਸੈੱਲਾਂ ਨੂੰ ਨੁਕਸਾਨ ਪਹੁੰਚਾਏ ਬਿਨਾਂ ਸਿੱਧਾ ਕੈਂਸਰ ਵਾਲੇ ਟਿਊਮਰਾਂ 'ਤੇ ਸਟੀਕ ਨਿਸ਼ਾਨਾ ਲਗਾਉਂਦੇ ਹਨ।

ਕਿਵੇਂ ਕੰਮ ਕਰਦੀ ਹੈ ਇਹ 'ਗਾਈਡਡ ਮਿਜ਼ਾਈਲ' ਤਕਨੀਕ?

ਇਹ ਨੈਨੋ-ਕਣ ਮਨੁੱਖੀ ਵਾਲਾਂ ਨਾਲੋਂ ਹਜ਼ਾਰਾਂ ਗੁਣਾ ਛੋਟੇ ਹਨ। ਇਨ੍ਹਾਂ ਦੀ ਖ਼ਾਸੀਅਤ ਇਹ ਹੈ ਕਿ ਇਹ ਕੈਂਸਰ ਸੈੱਲਾਂ 'ਚ ਮੌਜੂਦ MUC1 ਨਾਮਕ ਪ੍ਰੋਟੀਨ ਦੀ ਪਛਾਣ ਕਰ ਸਕਦੇ ਹਨ, ਜੋ ਆਮ ਸਿਹਤਮੰਦ ਸੈੱਲਾਂ 'ਚ ਨਹੀਂ ਹੁੰਦਾ। 

ਸਟੀਕ ਨਿਸ਼ਾਨਾ
- ਇਹ ਕਣ ਇਕ 'ਗਾਈਡਡ ਮਿਜ਼ਾਈਲ' ਵਾਂਗ ਕੰਮ ਕਰਦੇ ਹਨ, ਜੋ ਸਰੀਰ ਦੇ ਬਾਕੀ ਹਿੱਸਿਆਂ ਨੂੰ ਛੱਡ ਕੇ ਸਿਰਫ਼ ਕੈਂਸਰ ਸੈੱਲਾਂ ਨਾਲ ਜੁੜਦੇ ਹਨ।

ਸੁਰੱਖਿਆ ਲੌਕ
- ਇਨ੍ਹਾਂ 'ਚ ਇਕ ਵਿਸ਼ੇਸ਼ 'ਮੋਲੀਕਿਊਲਰ ਸੇਫਟੀ ਲੌਕ' ਲਗਾਇਆ ਗਿਆ ਹੈ, ਜਿਸ ਕਾਰਨ ਇਹ ਆਪਣੀ ਦਵਾਈ ਸਿਰਫ਼ ਕੈਂਸਰ ਸੈੱਲਾਂ ਦੇ ਅੰਦਰ ਜਾ ਕੇ ਹੀ ਛੱਡਦੇ ਹਨ।

ਨਤੀਜੇ
- ਚੂਹਿਆਂ 'ਤੇ ਕੀਤੇ ਗਏ ਲੈਬ ਟੈਸਟਾਂ ਦੌਰਾਨ ਦੇਖਿਆ ਗਿਆ ਕਿ ਇਸ ਤਕਨੀਕ ਨਾਲ ਟਿਊਮਰਾਂ ਦਾ ਆਕਾਰ ਕਾਫ਼ੀ ਜ਼ਿਆਦਾ ਘਟ ਗਿਆ ਅਤੇ ਆਲੇ-ਦੁਆਲੇ ਦੇ ਸਿਹਤਮੰਦ ਟਿਸ਼ੂਆਂ ਨੂੰ ਕੋਈ ਨੁਕਸਾਨ ਨਹੀਂ ਪਹੁੰਚਿਆ।

ਕੀਮੋਥੈਰੇਪੀ ਦੇ ਮੌਜੂਦਾ ਸੰਕਟ ਦੌਰਾਨ ਵੱਡੀ ਰਾਹਤ

ਇਹ ਖੋਜ ਅਜਿਹੇ ਨਾਜ਼ੁਕ ਸਮੇਂ 'ਤੇ ਸਾਹਮਣੇ ਆਈ ਹੈ ਜਦੋਂ ਭਾਰਤ 'ਚ 'ਸਿਸਪਲੇਟਿਨ' ਅਤੇ 'ਕਾਰਬੋਪਲੇਟਿਨ' ਵਰਗੀਆਂ ਜ਼ਰੂਰੀ ਕੀਮੋਥੈਰੇਪੀ ਦਵਾਈਆਂ ਦੀ ਭਾਰੀ ਕਿੱਲਤ ਚੱਲ ਰਹੀ ਹੈ। ਡਾਕਟਰਾਂ ਅਨੁਸਾਰ ਇਨਪੁਟ ਲਾਗਤ ਵਧਣ ਕਾਰਨ ਕੰਪਨੀਆਂ ਨੇ ਇਨ੍ਹਾਂ ਦਵਾਈਆਂ ਦਾ ਉਤਪਾਦਨ ਘਟਾ ਦਿੱਤਾ ਹੈ, ਜਿਸ ਕਾਰਨ ਕੈਂਸਰ ਮਰੀਜ਼ਾਂ ਦੇ ਇਲਾਜ 'ਚ ਦੇਰੀ ਹੋ ਰਹੀ ਹੈ। 

ਭਵਿੱਖ ਦੀ ਉਮੀਦ :-

ਹਾਲਾਂਕਿ ਖੋਜਕਰਤਾਵਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਇਹ ਤਕਨੀਕ ਅਜੇ ਸ਼ੁਰੂਆਤੀ ਪੜਾਅ 'ਤੇ ਹੈ ਅਤੇ ਇਨਸਾਨਾਂ 'ਤੇ ਇਸ ਦੇ ਪ੍ਰੀਖਣ ਲਈ ਅਜੇ ਕਈ ਸਾਲ ਲੱਗ ਸਕਦੇ ਹਨ ਪਰ ਜੇਕਰ ਇਹ ਸਫਲ ਰਹਿੰਦੀ ਹੈ, ਤਾਂ ਇਹ ਭਵਿੱਖ 'ਚ ਕੈਂਸਰ ਦੇ ਇਲਾਜ ਨੂੰ ਵਧੇਰੇ ਪ੍ਰਭਾਵਸ਼ਾਲੀ ਅਤੇ ਘੱਟ ਜ਼ਹਿਰੀਲਾ ਬਣਾਉਣ 'ਚ ਮੀਲ ਦਾ ਪੱਥਰ ਸਾਬਤ ਹੋਵੇਗੀ।