ਡਾਕਟਰਾਂ ਦੀ ਵੱਡੀ ਲਾਪਰਵਾਹੀ, ਨਾਰਮਲ ਡਿਲਵਰੀ ’ਚ ਹੀ ਕਰ ਦਿੱਤੀ ਵੱਡੀ ਗਲਤੀ

ਪਲਵਲ - ਪਲਵਲ ਜ਼ਿਲਾ ਹਸਪਤਾਲ ਦੇ ਡਾਕਟਰਾਂ ਦੀ ਇਕ ਹੋਰ ਸ਼ਰਮਨਾਕ ਅਤੇ ਵੱਡੀ ਲਾਪਰਵਾਹੀ ਸਾਹਮਣੇ ਆਈ ਹੈ। ਸਿਜ਼ੇਰੀਅਨ ਡਿਲਵਰੀ ਤਾਂ ਦੂਰ ਨਾਰਮਲ ਡਿਲਵਰੀ ਵਿਚ ਵੀ ਡਾਕਟਰਾਂ ਵਲੋਂ ਹੋ ਰਹੀਆਂ ਅਣਗਹਿਲੀਆਂ ਸਾਹਮਣੇ ਆ ਰਹੀਆਂ ਹਨ। ਇਕ ਨਾਰਮਲ ਡਿਲਵਰੀ ਦੇ ਦੌਰਾਨ ਬਲੀਡਿੰਗ ਨੂੰ ਰੋਕਣ ਲਈ ਗੁਪਤ ਅੰਗ ਵਿਚ ਰੱਖੀ ਗਈ ਰੂੰ ਨੂੰ ਅੰਦਰ ਰੱਖ ਕੇ ਭੁੱਲ ਗਏ ਡਾਕਟਰ। ਤਿੰਨ ਦਿਨ ਤੱਕ ਅੱਤ ਦਾ ਦਰਦ ਸਹਿਣ ਕਰਨ ਵਾਲੀ ਮਹਿਲਾ ਨੂੰ ਜਦੋਂ ਤੇਜ਼ ਖਾਂਸੀ ਹੋਈ ਤਾਂ ਗੁਪਤ ਅੰਗ ਵਿਚੋਂ ਥੋੜ੍ਹੀ ਜਿਹੀ ਬਾਹਰ ਆਈ ਰੂੰ ਬਾਰੇ ਪਤਾ ਲੱਗਾ। ਪੀੜਤਾ ਨੇ ਆਪਣੇ ਪਤੀ ਦੀ ਸਹਾਇਤਾ ਨਾਲ ਇਸ ਰੂੰ ਨੂੰ ਬਾਹਰ ਕੱਢਿਆ, ਜੋ ਕਿ ਪੱਸ ਅਤੇ ਬਦਬੂ ਨਾਲ ਭਰੀ ਹੋਈ ਸੀ।
ਪਲਵਲ ਦੇ ਪਿੰਡ ਬਡੌਲੀ ਨਿਵਾਸੀ ਰਾਜੇਸ਼ ਪੁੱਤਰ ਖੇਮਚੰਦ ਨੇ ਦੱਸਿਆ ਕਿ ਉਸਦੀ ਪਤਨੀ ਸ਼ਮਾ ਸ਼ਰਮਾ ਨੂੰ ਡਿਲਵਰੀ ਦੇ ਲਈ ਜ਼ਿਲਾ ਹਸਪਤਾਲ ’ਚ 27 ਫਰਵਰੀ ਦੀ ਸਵੇਰ ਨੂੰ ਲਿਆਉਂਦਾ ਗਿਆ ਸੀ। ਦੁਪਹਿਰ 12:50 ’ਤੇ ਨਾਰਮਲ ਡਿਲਵਰੀ ਹੋਈ ਸੀ। ਪਤਨੀ ਨੇ ਬੇਟੀ ਨੂੰ ਜਨਮ ਦਿੱਤਾ ਸੀ। ਅਗਲੇ ਦਿਨ 28 ਫਰਵਰੀ ਨੂੰ ਦੁਪਹਿਰ ਦੇ ਸਮੇਂ ਪਤਨੀ ਨੂੰ ਹਸਪਤਾਲ ਚੋਂ ਛੁੱਟੀ ਦੇ ਦਿੱਤੀ ਗਈ ਸੀ।

ਅਜਿਹੇ ’ਚ ਬੀਤੇ ਦਿਨ ਸ਼ਾਮ ਦੇ ਸਮੇਂ ਮਹਿਲਾ ਨੂੰ ਟਾਇਲਟ ਦੇ ਦੌਰਾਨ ਗੁਪਤ ਅੰਗ ਵਿਚ ਤੇਜ਼ ਦਰਦ ਹੋਇਆ ਅਤੇ ਖਾਂਸੀ ਵੀ ਹੋਈ ਜਿਸ ਦੌਰਾਨ ਉਸਨੂੰ ਗੁਪਤ ਅੰਗ ਵਿਚ ਰੂੰ ਹੋਣ ਦਾ ਪਤਾ ਲੱਗਾ, ਜਿਸਨੂੰ ਉਸਨੇ ਪਤੀ ਦੀ ਸਹਾਇਤਾ ਨਾਲ ਬਾਹਰ ਕੱਢਿਆ। ਰੂੰ ਦੇ ਬਾਹਰ ਆਉਂਦੇ ਹੀ ਉਸ ’ਚ ਜਮ੍ਹਾ ਹੋਈ ਪੱਸ ਅਤੇ ਬਦਬੂ ਪੂਰੇ ਘਰ ’ਚ ਫੈਲ ਗਈ, ਜਿਸ ਤੋਂ ਬਾਅਦ ਉਸਨੂੰ ਹਸਪਤਾਲ ’ਚ ਲਿਆਉਂਦਾ ਗਿਆ। ਜਿਥੇ ਸਟਾਫ ਨਰਸ ਨੇ ਦੱਸਿਆ ਕਿ ਇਹ ਗਲਤੀ ਡਿਲਵਰੀ ਦੌਰਾਨ ਹੋਈ ਹੈ। ਮਹਿਲਾ ਦੇ ਪਤੀ ਦਾ ਕਹਿਣਾ ਹੈ ਕਿ ਮੈਂ ਨਹੀਂ ਚਾਹੁੰਦਾ ਕਿ ਇਹ ਗਲਤੀ ਕਿਸੇ ਹੋਰ ਦੇ ਨਾਲ ਵੀ ਹੋਵੇ, ਇਸ ਲਈ ਗਲਤੀ ਕਰਨ ਵਾਲੇ ਨੂੰ ਸਜ਼ਾ ਮਿਲਣੀ ਚਾਹੀਦੀ ਹੈ।
ਉਨ੍ਹਾਂ ਨੇ ਇਕ ਸ਼ਿਕਾਇਤ ਦੀ ਅਰਜ਼ੀ ਸਿਹਤ ਵਿਭਾਗ ਦੇ ਸੀਨੀਅਰ ਅਧਿਕਾਰੀਆਂ ਨੂੰ ਦੇਣ ਲਈ ਲਿਖਿਆ ਹੈ। ਦੂਸਰੇ ਪਾਸੇ ਮੀਡੀਆ ਨੇ ਜ਼ਿਲਾ ਹਸਪਤਾਲ ਦੇ ਸੀਨੀਅਰ ਡਾਕਟਰਾਂ ਅਤੇ ਅਧਿਕਾਰੀਆਂ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਕੋਈ ਵੀ ਕੈਮਰੇ ਦੇ ਸਾਹਮਣੇ  ਬੋਲਣ ਲਈ ਤਿਆਰ ਨਹੀਂ ਹੋਇਆ।