Next Level Delivery: ਬੱਸ ਆਈ ਟਰੱਕ 'ਤੇ, ਚਾਬੀ ਆਈ ਅਸਮਾਨੋਂ, ਹਿਮਾਚਲ ਵਾਲਿਆਂ ਦਾ ਅੰਦਾਜ਼ ਹੀ ਵੱਖਰਾ !

ਨੈਸ਼ਨਲ ਡੈਸਕ :ਹਿਮਾਚਲ ਪ੍ਰਦੇਸ਼ ਦੇ ਸੋਲਨ 'ਚ  ਹਿਮਾਚਲ ਰੋਡ ਟ੍ਰਾਂਸਪੋਰਟ ਕਾਰਪੋਰੇਸ਼ਨ (HRTC) ਦੀ ਇਲੈਕਟ੍ਰਿਕ ਬੱਸ (ਈ-ਬੱਸ) ਸੇਵਾ ਦੇ ਟਰਾਇਲ ਦੌਰਾਨ ਇੱਕ ਬੇਹੱਦ ਰੌਚਕ ਅਤੇ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ। ਹੈਦਰਾਬਾਦ ਦੀ ਇੱਕ ਨਿੱਜੀ ਕੰਪਨੀ ਨੇ ਟਰਾਇਲ ਲਈ ਬੱਸ ਤਾਂ ਟਰਾਲੇ 'ਤੇ ਲੱਦ ਕੇ ਭੇਜ ਦਿੱਤੀ, ਪਰ ਅਧਿਕਾਰੀ ਉਸ ਦੀ ਚਾਬੀ ਨਾਲ ਭੇਜਣੀ ਹੀ ਭੁੱਲ ਗਏ।

ਫਲਾਈਟ ਰਾਹੀਂ ਹੈਦਰਾਬਾਦ ਤੋਂ ਮੰਗਵਾਈ ਚਾਬੀ
ਇਹ ਬੱਸ ਬੀਤੇ ਸੋਮਵਾਰ ਸ਼ਾਮ ਨੂੰ ਹੈਦਰਾਬਾਦ ਤੋਂ ਸੋਲਨ ਪਹੁੰਚੀ ਸੀ। ਜਦੋਂ ਮੰਗਲਵਾਰ ਨੂੰ ਨਿਗਮ ਦੀ ਟੀਮ ਨੇ ਬੱਸ ਨੂੰ ਟਰਾਲੇ ਤੋਂ ਹੇਠਾਂ ਉਤਾਰਨ ਦੀ ਤਿਆਰੀ ਕੀਤੀ ਅਤੇ ਚਾਬੀ ਮੰਗੀ, ਤਾਂ ਪਤਾ ਲੱਗਾ ਕਿ ਚਾਬੀ ਤਾਂ ਹੈਦਰਾਬਾਦ ਵਿੱਚ ਹੀ ਰਹਿ ਗਈ ਹੈ। ਚਾਬੀ ਨਾ ਹੋਣ ਕਾਰਨ ਡਰਾਈਵਰ ਬੱਸ ਸਟਾਰਟ ਨਹੀਂ ਕਰ ਸਕਿਆ ਤੇ ਇਸ ਨੂੰ ਉਤਾਰਨ ਵਿੱਚ ਭਾਰੀ ਪਰੇਸ਼ਾਨੀ ਹੋਈ। ਅਖੀਰ ਕੰਪਨੀ ਨੇ ਚਾਬੀ ਨੂੰ ਫਲਾਈਟ ਰਾਹੀਂ ਹੈਦਰਾਬਾਦ ਤੋਂ ਚੰਡੀਗੜ੍ਹ ਭੇਜਿਆ, ਜਿੱਥੋਂ ਦੇਰ ਸ਼ਾਮ ਇਸ ਨੂੰ ਸੋਲਨ ਪਹੁੰਚਾਇਆ ਗਿਆ।

ਸੋਲਨ ਤੋਂ ਅਰਕੀ ਰੂਟ 'ਤੇ ਸਫ਼ਲ ਟਰਾਇਲ
ਚਾਬੀ ਮਿਲਣ ਤੋਂ ਬਾਅਦ ਬੱਸ ਨੂੰ ਟਰਾਲੇ ਤੋਂ ਉਤਾਰਿਆ ਗਿਆ ਅਤੇ ਵੀਰਵਾਰ ਨੂੰ ਸੋਲਨ ਤੋਂ ਅਰਕੀ (ਵਾਇਆ ਮਮਲੀਗ) ਰੂਟ 'ਤੇ ਇਸ ਦਾ ਸਫ਼ਲ ਟਰਾਇਲ ਕੀਤਾ ਗਿਆ। ਇਸ ਦੌਰਾਨ HRTC ਅਤੇ ਕੰਪਨੀ ਦੇ ਅਧਿਕਾਰੀਆਂ ਨੇ ਬੱਸ ਦੀ ਬੈਟਰੀ ਚਾਰਜਿੰਗ, ਬ੍ਰੇਕ, ਪਿਕਅੱਪ ਅਤੇ ਹੋਰ ਤਕਨੀਕੀ ਪਹਿਲੂਆਂ ਦੀ ਬਾਰੀਕੀ ਨਾਲ ਜਾਂਚ ਕੀਤੀ। ਅਧਿਕਾਰੀ ਇਹ ਦੇਖ ਰਹੇ ਹਨ ਕਿ ਫੁੱਲ ਚਾਰਜ ਹੋਣ 'ਤੇ ਬੱਸ ਪਹਾੜੀ ਰਸਤਿਆਂ 'ਤੇ ਕਿੰਨੀ ਦੂਰੀ ਤੈਅ ਕਰਦੀ ਹੈ।

ਭਵਿੱਖ ਦੀ ਯੋਜਨਾ 
ਨਿਗਮ ਵੱਲੋਂ ਵੱਖ-ਵੱਖ ਭੂਗੋਲਿਕ ਹਾਲਤਾਂ ਅਤੇ ਮਾਰਗਾਂ 'ਤੇ ਟਰਾਇਲ ਕਰਨ ਤੋਂ ਬਾਅਦ ਇੱਕ ਵਿਸਤ੍ਰਿਤ ਰਿਪੋਰਟ ਉੱਚ ਅਧਿਕਾਰੀਆਂ ਨੂੰ ਭੇਜੀ ਜਾਵੇਗੀ। ਇਸੇ ਰਿਪੋਰਟ ਦੇ ਆਧਾਰ 'ਤੇ ਤੈਅ ਕੀਤਾ ਜਾਵੇਗਾ ਕਿ ਭਵਿੱਖ ਵਿੱਚ ਇਨ੍ਹਾਂ ਈ-ਬੱਸਾਂ ਦੀ ਖਰੀਦ ਕੀਤੀ ਜਾਵੇ ਜਾਂ ਨਹੀਂ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e