ਬਜਟ ''ਚ ਕੇਰਲ ''ਅਦ੍ਰਿਸ਼'': ਸ਼ਸ਼ੀ ਥਰੂਰ ਨੇ ਕੇਂਦਰ ''ਤੇ ਵਿੰਨ੍ਹਿਆ ਨਿਸ਼ਾਨਾ

ਨਵੀਂ ਦਿੱਲੀ : ਕਾਂਗਰਸ ਦੇ ਸੀਨੀਅਰ ਆਗੂ ਅਤੇ ਸੰਸਦ ਮੈਂਬਰ ਸ਼ਸ਼ੀ ਥਰੂਰ ਨੇ ਕੇਂਦਰੀ ਬਜਟ 2026 'ਤੇ ਤਿੱਖੀ ਪ੍ਰਤੀਕਿਰਿਆ ਦਿੰਦਿਆਂ ਕੇਂਦਰ ਸਰਕਾਰ 'ਤੇ ਕੇਰਲ ਰਾਜ ਨੂੰ ਪੂਰੀ ਤਰ੍ਹਾਂ ਨਜ਼ਰਅੰਦਾਜ਼ ਕਰਨ ਦੇ ਦੋਸ਼ ਲਾਏ ਹਨ। ਉਨ੍ਹਾਂ ਕਿਹਾ ਕਿ ਕੇਂਦਰ ਦੀ ਵਿੱਤੀ ਯੋਜਨਾ ਵਿੱਚੋਂ ਕੇਰਲ ਪੂਰੀ ਤਰ੍ਹਾਂ ਗਾਇਬ ਦਿਖ ਰਿਹਾ ਹੈ, ਜਦੋਂ ਕਿ ਇਸੇ ਸਾਲ ਰਾਜ ਵਿੱਚ ਵਿਧਾਨ ਸਭਾ ਚੋਣਾਂ ਹੋਣੀਆਂ ਹਨ।

ਵਿਦੇਸ਼ੀ ਮੁਦਰਾ ਅਤੇ ਹੁਨਰਮੰਦ ਵਰਕਫੋਰਸ ਦਾ ਅਪਮਾਨ 
ਸ਼ਸ਼ੀ ਥਰੂਰ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' 'ਤੇ ਪੋਸਟ ਕਰਦਿਆਂ ਇਸ ਨੂੰ 'Deja vu' ਪਲ ਦੱਸਿਆ। ਉਨ੍ਹਾਂ ਕਿਹਾ ਕਿ ਕੇਰਲ ਵਰਗਾ ਰਾਜ, ਜੋ ਦੇਸ਼ ਦੇ ਵਿਦੇਸ਼ੀ ਮੁਦਰਾ ਭੰਡਾਰ (Forex Reserve), ਹੁਨਰਮੰਦ ਕਰਮਚਾਰੀਆਂ ਅਤੇ 'ਸਾਫਟ ਪਾਵਰ' ਵਿੱਚ ਇੰਨਾ ਵੱਡਾ ਯੋਗਦਾਨ ਪਾਉਂਦਾ ਹੈ, ਉਸ ਨੂੰ ਬਜਟ ਵਿੱਚ ਕੋਈ ਥਾਂ ਨਾ ਮਿਲਣਾ ਇੱਕ ਨਿਰਾਸ਼ਾਜਨਕ ਸੰਦੇਸ਼ ਹੈ।

ਏਮਜ਼ ਅਤੇ ਸਮੁੰਦਰੀ ਕਟਾਅ ਦੇ ਮੁੱਦੇ 'ਤੇ ਘੇਰਿਆ 
ਥਰੂਰ ਨੇ ਕਿਹਾ ਕਿ ਉਨ੍ਹਾਂ ਨੂੰ ਉਮੀਦ ਸੀ ਕਿ ਕੇਂਦਰ ਸਰਕਾਰ ਕੇਰਲ ਵਿੱਚ ਏਮਜ਼ (AIIMS) ਦੀ ਸਥਾਪਨਾ ਸਮੇਤ ਆਪਣੇ ਪੁਰਾਣੇ ਵਾਅਦਿਆਂ ਨੂੰ ਪੂਰਾ ਕਰੇਗੀ। ਇਸ ਤੋਂ ਇਲਾਵਾ, ਉਨ੍ਹਾਂ ਨੇ ਕੇਰਲ ਦੇ ਤੱਟਵਰਤੀ ਇਲਾਕਿਆਂ ਵਿੱਚ ਹੋ ਰਹੇ ਸਮੁੰਦਰੀ ਕਟਾਅ (Coastal Erosion) ਦੇ ਗੰਭੀਰ ਮੁੱਦੇ ਨੂੰ ਉਠਾਉਂਦਿਆਂ ਕਿਹਾ ਕਿ ਇਸ ਨਾਲ "ਜੰਗੀ ਪੱਧਰ" 'ਤੇ ਨਜਿੱਠਣ ਦੀ ਲੋੜ ਹੈ। ਉਨ੍ਹਾਂ ਸਵਾਲ ਕੀਤਾ ਕਿ ਜੇਕਰ ਚੀਨ ਵੱਲੋਂ ਜ਼ਮੀਨ ਹੜੱਪਣ 'ਤੇ ਰਾਸ਼ਟਰੀ ਸੁਰੱਖਿਆ ਦੀ ਚਰਚਾ ਹੁੰਦੀ ਹੈ, ਤਾਂ ਸਮੁੰਦਰ ਵੱਲੋਂ ਖੋਹੀ ਜਾ ਰਹੀ ਜ਼ਮੀਨ 'ਤੇ ਧਿਆਨ ਕਿਉਂ ਨਹੀਂ ਦਿੱਤਾ ਜਾਂਦਾ।

ਕੇਂਦਰ ਅਤੇ ਰਾਜ ਸਰਕਾਰ ਵਿਚਾਲੇ ਫਸੇ ਲੋਕ 
ਸ਼ਸ਼ੀ ਥਰੂਰ ਨੇ ਨਾ ਸਿਰਫ਼ ਕੇਂਦਰ ਸਗੋਂ ਰਾਜ ਦੀ ਪੀ. ਵਿਜਯਨ ਸਰਕਾਰ 'ਤੇ ਵੀ ਨਿਸ਼ਾਨਾ ਸਾਧਿਆ। ਉਨ੍ਹਾਂ ਕਿਹਾ ਕਿ ਮਲਿਆਲੀ ਲੋਕ ਇੱਕ ਅਜਿਹੇ ਕੇਂਦਰ ਦੇ ਵਿਚਕਾਰ ਫਸੇ ਹੋਏ ਹਨ ਜੋ ਸਾਡੇ ਦੁੱਖਾਂ ਪ੍ਰਤੀ ਉਦਾਸੀਨ ਹੈ, ਅਤੇ ਦੂਜੇ ਪਾਸੇ ਅਜਿਹੀ ਰਾਜ ਸਰਕਾਰ ਹੈ ਜੋ ਆਪਣੀ ਵਿੱਤੀ ਫਾਲਤੂਖਰਚੀ ਤੋਂ ਇਨਕਾਰ ਕਰ ਰਹੀ ਹੈ। ਉਨ੍ਹਾਂ ਅਨੁਸਾਰ ਕੇਰਲ ਦੀ ਰਾਜਧਾਨੀ ਦੇ ਸੰਸਦ ਮੈਂਬਰ ਹੋਣ ਦੇ ਨਾਤੇ ਉਹ ਦੇਖਦੇ ਹਨ ਕਿ ਰਾਜ ਦਾ ਬਜਟ ਕੇਂਦਰੀ ਫੰਡਾਂ ਦੀ ਇੱਕ ਕਲਪਨਾ (Fantasy) 'ਤੇ ਟਿਕਿਆ ਸੀ, ਜਿਸ ਨੂੰ ਕੇਂਦਰੀ ਬਜਟ ਨੇ ਪੂਰਾ ਨਹੀਂ ਕੀਤਾ।

ਥਰੂਰ ਦਾ ਬਦਲਿਆ ਰੁਖ 
ਸ਼ਸ਼ੀ ਥਰੂਰ ਦੀ ਇਹ ਆਲੋਚਨਾ ਕਾਫੀ ਅਹਿਮ ਮੰਨੀ ਜਾ ਰਹੀ ਹੈ ਕਿਉਂਕਿ ਪਿਛਲੇ ਕੁਝ ਮਹੀਨਿਆਂ ਦੌਰਾਨ ਉਨ੍ਹਾਂ ਨੇ ਕਈ ਮੁੱਦਿਆਂ 'ਤੇ ਕੇਂਦਰ ਸਰਕਾਰ ਦਾ ਸਮਰਥਨ ਕੀਤਾ ਸੀ। ਹਾਲਾਂਕਿ, ਹਾਲ ਹੀ ਵਿੱਚ ਰਾਹੁਲ ਗਾਂਧੀ ਅਤੇ ਮਲਿਕਾਰਜੁਨ ਖੜਗੇ ਨਾਲ ਹੋਈ ਮੁਲਾਕਾਤ ਤੋਂ ਬਾਅਦ ਉਨ੍ਹਾਂ ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਪੂਰੀ ਤਰ੍ਹਾਂ ਪਾਰਟੀ ਲੀਡਰਸ਼ਿਪ ਦੇ ਨਾਲ ਹਨ। ਉਨ੍ਹਾਂ ਨੇ ਹੁਣ ਇੱਕ ਅਜਿਹੇ ਵਿਕਲਪ ਦੀ ਮੰਗ ਕੀਤੀ ਹੈ ਜੋ ਦਿੱਲੀ ਵਿੱਚ ਸਨਮਾਨ ਹਾਸਲ ਕਰੇ ਅਤੇ ਕੇਰਲ ਵਿੱਚ ਵਿਕਾਸ ਲਿਆ ਸਕੇ।