Youtube ਦੇਖ ਕੇ ਰਚੀ ਕਤਲ ਦੀ ਸਾਜ਼ਿਸ਼, 14 ਸਾਲ ਪੁਰਾਣੀ ਰੰਜਿਸ਼ ਕਾਰਨ ਮਾਰ''ਤਾ ਮਾਸੀ ਦਾ ਮੁੰਡਾ

ਗੁਰੂਗ੍ਰਾਮ : ਗੁਰੂਗ੍ਰਾਮ ਪੁਲਸ ਨੇ ਇੱਕ ਅੰਨ੍ਹੇ ਕਤਲ (Blind Murder) ਦੀ ਗੁੱਥੀ ਸੁਲਝਾਉਂਦੇ ਹੋਏ ਦੋ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰਨ 'ਚ ਸਫ਼ਲਤਾ ਹਾਸਲ ਕੀਤੀ ਹੈ। ਇਹ ਕਤਲ 14 ਸਾਲ ਪੁਰਾਣੇ ਕਾਰੋਬਾਰੀ ਵਿਵਾਦ ਦਾ ਨਤੀਜਾ ਨਿਕਲਿਆ, ਜਿਸ 'ਚ ਇੱਕ ਵਿਅਕਤੀ ਨੇ ਆਪਣੇ ਹੀ ਰਿਸ਼ਤੇਦਾਰ (ਮਾਸੀ ਦੇ ਪੁੱਤ) ਦਾ ਕਤਲ ਕਰਵਾ ਦਿੱਤਾ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਮੁਲਜ਼ਮਾਂ ਨੇ ਕਤਲ ਦੀ ਸਾਜ਼ਿਸ਼ ਰਚਣ ਅਤੇ ਵਾਰਦਾਤ ਤੋਂ ਬਾਅਦ ਪੁਲਸ ਤੋਂ ਬਚਣ ਦੇ ਤਰੀਕੇ ਯੂਟਿਊਬ (YouTube) 'ਤੇ ਵੀਡੀਓ ਦੇਖ ਕੇ ਸਿੱਖੇ ਸਨ।

ਕੀ ਹੈ ਪੂਰਾ ਮਾਮਲਾ?
ਇਹ ਘਟਨਾ 6 ਜਨਵਰੀ ਦੀ ਹੈ, ਜਦੋਂ ਸੈਕਟਰ 37-ਡੀ ਵਿੱਚ ਰਾਮਾ ਗਾਰਡਨ ਨੇੜੇ 50 ਸਾਲਾ ਸੰਜੇ ਸ਼ਰਮਾ ਦੀ ਖੂਨ ਨਾਲ ਲੱਥਪੱਥ ਲਾਸ਼ ਮਿਲੀ ਸੀ। ਮ੍ਰਿਤਕ ਦੇ ਪੁੱਤਰ ਨੇ ਸ਼ਿਕਾਇਤ ਦਿੱਤੀ ਸੀ ਕਿ ਉਸ ਦੇ ਪਿਤਾ ਆਪਣੀ ਕਾਰ ਵਿੱਚ ਕੈਂਟੀਨ ਲਈ ਨਿਕਲੇ ਸਨ, ਪਰ ਰਸਤੇ ਵਿੱਚ ਅਣਪਛਾਤੇ ਲੋਕਾਂ ਨੇ ਉਨ੍ਹਾਂ ਦਾ ਕਤਲ ਕਰ ਦਿੱਤਾ।

10 ਲੱਖ ਦੀ ਦਿੱਤੀ ਗਈ ਸੁਪਾਰੀ
ਪੁਲਸ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਮੁੱਖ ਮੁਲਜ਼ਮ ਗੁਰੂਦੱਤ ਸ਼ਰਮਾ (ਵਾਸੀ ਰੋਹਤਕ), ਜੋ ਕਿ ਦੇਹਰਾਦੂਨ ਵਿੱਚ ਕੈਫੇ ਚਲਾਉਂਦਾ ਹੈ, ਦਾ ਮ੍ਰਿਤਕ ਸੰਜੇ ਸ਼ਰਮਾ ਨਾਲ 2011-12 ਤੋਂ ਕਰੈਸ਼ਰ ਦੇ ਕਾਰੋਬਾਰ ਨੂੰ ਲੈ ਕੇ ਵਿਵਾਦ ਚੱਲ ਰਿਹਾ ਸੀ। ਇਸੇ ਰੰਜਿਸ਼ ਕਾਰਨ ਗੁਰੂਦੱਤ ਨੇ ਆਪਣੇ ਸਾਥੀ ਅਨਿਲ (ਵਾਸੀ ਉੱਤਰ ਪ੍ਰਦੇਸ਼) ਨੂੰ 10 ਲੱਖ ਰੁਪਏ ਦੀ ਸੁਪਾਰੀ ਦੇ ਕੇ ਕਤਲ ਦੀ ਯੋਜਨਾ ਬਣਾਈ।

ਇੰਝ ਦਿੱਤਾ ਵਾਰਦਾਤ ਨੂੰ ਅੰਜਾਮ
ਮੁਲਜ਼ਮਾਂ ਨੇ ਪਹਿਲਾਂ ਸੰਜੇ ਸ਼ਰਮਾ ਦੀ ਰੇਕੀ ਕੀਤੀ। ਤੈਅ ਸਾਜ਼ਿਸ਼ ਅਨੁਸਾਰ, ਉਨ੍ਹਾਂ ਨੇ ਸੰਜੇ ਦੀ ਕਾਰ ਨੂੰ ਟੱਕਰ ਮਾਰੀ ਅਤੇ ਜਿਵੇਂ ਹੀ ਉਹ ਗੱਡੀ ਵਿੱਚੋਂ ਹੇਠਾਂ ਉਤਰਿਆ, ਉਸ ਨੂੰ ਗੋਲੀ ਮਾਰ ਦਿੱਤੀ ਗਈ, ਜਿਸ ਨਾਲ ਉਸ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ।

ਪੁਲਸ ਦੀ ਕਾਰਵਾਈ
ਪੁਲਸ ਨੇ ਦੋਵਾਂ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਪੁਲਸ ਮੁਤਾਬਕ ਮੁਲਜ਼ਮ ਅਨਿਲ ਪਿਛਲੇ 10 ਸਾਲਾਂ ਤੋਂ ਗੁਰੂਦੱਤ ਨੂੰ ਜਾਣਦਾ ਸੀ ਅਤੇ ਮੁਜ਼ੱਫਰਨਗਰ ਵਿੱਚ ਬੱਸ ਡਰਾਈਵਰ ਵਜੋਂ ਕੰਮ ਕਰਦਾ ਸੀ। ਫਿਲਹਾਲ ਪੁਲਸ ਇਸ ਮਾਮਲੇ ਵਿੱਚ ਸ਼ਾਮਲ ਹੋਰ ਲੋਕਾਂ ਦੀ ਭਾਲ ਕਰ ਰਹੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e