ਦੇਸ਼ ਦੀ ਸੇਵਾ ''ਚ ਤਾਇਨਾਤ 982 ''ਯੋਧੇ'' ਵੀਰਤਾ ਤੇ ਸੇਵਾ ਮੈਡਲਾਂਂ ਨਾਲ ਸਨਮਾਨਿਤ, ਸਭ ਤੋਂ ਵੱਧ ਜਵਾਨ J&K ਤੋਂ
Sunday, Jan 25, 2026 - 01:34 PM (IST)
ਨਵੀਂ ਦਿੱਲੀ- ਗਣਤੰਤਰ ਦਿਵਸ 2026 ਦੇ ਮੌਕੇ 'ਤੇ, ਕੇਂਦਰੀ ਗ੍ਰਹਿ ਮੰਤਰਾਲੇ ਨੇ ਦੇਸ਼ ਦੀ ਸੇਵਾ ਅਤੇ ਸੁਰੱਖਿਆ ਵਿੱਚ ਲੱਗੇ ਪੁਲਸ, ਫਾਇਰ ਬ੍ਰਿਗੇਡ (ਫਾਇਰ ਸਰਵਿਸ), ਹੋਮ ਗਾਰਡ, ਸਿਵਲ ਡਿਫੈਂਸ ਅਤੇ ਸੁਧਾਰਾਤਮਕ ਸੇਵਾਵਾਂ ਦੇ ਕੁੱਲ 982 ਕਰਮਚਾਰੀਆਂ ਨੂੰ ਵੀਰਤਾ ਅਤੇ ਸੇਵਾ ਮੈਡਲਾਂ ਨਾਲ ਸਨਮਾਨਿਤ ਕਰਨ ਦਾ ਐਲਾਨ ਕੀਤਾ ਹੈ।
ਕੁੱਲ ਸਨਮਾਨਾਂ ਵਿੱਚੋਂ 125 ਵੀਰਤਾ ਮੈਡਲ ਦਿੱਤੇ ਜਾਣਗੇ, ਜੋ ਕਿ ਅਸਧਾਰਨ ਬਹਾਦਰੀ ਦਿਖਾਉਣ, ਜਾਨ-ਮਾਲ ਦੀ ਰੱਖਿਆ ਕਰਨ, ਅਪਰਾਧ ਰੋਕਣ ਜਾਂ ਅਪਰਾਧੀਆਂ ਨੂੰ ਗ੍ਰਿਫ਼ਤਾਰ ਕਰਨ ਵਾਲੇ ਯੋਧਿਆਂ ਨੂੰ ਦਿੱਤੇ ਜਾਂਦੇ ਹਨ। ਵੀਰਤਾ ਪੁਰਸਕਾਰਾਂ ਵਿੱਚੋਂ ਸਭ ਤੋਂ ਵੱਧ 45 ਕਰਮਚਾਰੀ ਜੰਮੂ-ਕਸ਼ਮੀਰ ਖੇਤਰ ਦੇ ਹਨ। ਇਸ ਤੋਂ ਇਲਾਵਾ 35 ਕਰਮਚਾਰੀ ਖੱਬੇ ਪੱਖੀ ਕੱਟੜਵਾਦ ਪ੍ਰਭਾਵਿਤ ਇਲਾਕਿਆਂ ਤੋਂ, 5 ਉੱਤਰ-ਪੂਰਬੀ ਖੇਤਰ ਤੋਂ ਅਤੇ 40 ਹੋਰ ਵੱਖ-ਵੱਖ ਖੇਤਰਾਂ ਤੋਂ ਚੁਣੇ ਗਏ ਹਨ।
ਸੂਬਿਆਂ ਦੀ ਗੱਲ ਕਰੀਏ ਤਾਂ ਜੰਮੂ-ਕਸ਼ਮੀਰ ਪੁਲਸ ਨੇ ਸਭ ਤੋਂ ਵੱਧ 33 ਵੀਰਤਾ ਮੈਡਲ ਪ੍ਰਾਪਤ ਕੀਤੇ ਹਨ। ਇਸ ਤੋਂ ਬਾਅਦ ਮਹਾਰਾਸ਼ਟਰ ਪੁਲਸ ਨੂੰ 31, ਉੱਤਰ ਪ੍ਰਦੇਸ਼ ਪੁਲਸ ਨੂੰ 18 ਅਤੇ ਦਿੱਲੀ ਪੁਲਿਸ ਨੂੰ 14 ਵੀਰਤਾ ਮੈਡਲ ਦਿੱਤੇ ਗਏ ਹਨ। ਕੇਂਦਰੀ ਹਥਿਆਰਬੰਦ ਪੁਲਸ ਬਲਾਂ (CAPF) ਵਿੱਚੋਂ ਸੀ.ਆਰ.ਪੀ.ਐੱਫ. (CRPF) ਇਕੱਲਾ ਅਜਿਹਾ ਬਲ ਹੈ ਜਿਸ ਨੂੰ 12 ਵੀਰਤਾ ਮੈਡਲ ਦਿੱਤੇ ਜਾਣਗੇ।
ਵਿਸ਼ੇਸ਼ ਸੇਵਾ ਦੇ ਸ਼ਾਨਦਾਰ ਰਿਕਾਰਡ ਲਈ 101 ਰਾਸ਼ਟਰਪਤੀ ਮੈਡਲ (PSM) ਦਿੱਤੇ ਜਾਣੇ ਹਨ, ਜਿਸ ਵਿੱਚੋਂ 89 ਪੁਲਸ ਸੇਵਾ ਨੂੰ ਮਿਲੇ ਹਨ। ਇਸ ਦੇ ਨਾਲ ਹੀ, ਡਿਊਟੀ ਪ੍ਰਤੀ ਨਿਸ਼ਠਾ ਅਤੇ ਕੀਮਤੀ ਸੇਵਾਵਾਂ ਲਈ 756 ਸਲਾਹੁਣਯੋਗ ਸੇਵਾ ਮੈਡਲ (MSM) ਪ੍ਰਦਾਨ ਕੀਤੇ ਜਾਣਗੇ।
ਇਨ੍ਹਾਂ ਸਨਮਾਨਾਂ ਵਿੱਚ 4 ਫਾਇਰ ਬ੍ਰਿਗੇਡ ਸੇਵਾ ਦੇ ਬਚਾਅ ਕਰਮੀ ਵੀ ਸ਼ਾਮਲ ਹਨ, ਜਿਨ੍ਹਾਂ ਨੂੰ ਉਨ੍ਹਾਂ ਦੇ ਬਹਾਦਰੀ ਭਰੇ ਕਾਰਜਾਂ ਲਈ ਵੀਰਤਾ ਮੈਡਲ ਨਾਲ ਨਿਵਾਜਿਆ ਗਿਆ ਹੈ। ਇਹ ਮੈਡਲ ਕਰਮਚਾਰੀਆਂ ਦੇ ਜੋਖਮ ਭਰੇ ਕਰਤੱਵਾਂ ਅਤੇ ਦੇਸ਼ ਪ੍ਰਤੀ ਉਨ੍ਹਾਂ ਦੀ ਵਚਨਬੱਧਤਾ ਨੂੰ ਮੁੱਖ ਰੱਖਦਿਆਂ ਦਿੱਤੇ ਜਾਂਦੇ ਹਨ।
