ਰੱਖੜੀ ''ਤੇ ਔਰਤਾਂ ਲਈ ਵੱਡੀ ਸੌਗਾਤ, ਇਨ੍ਹਾਂ ਸੂਬਿਆਂ ''ਚ ਦੋ ਦਿਨ ਬੱਸ ਸਫ਼ਰ ਫ੍ਰੀ

ਜੈਪੁਰ/ਦੇਹਰਾਦੂਨ : ਰੱਖੜੀ ਦੇ ਪਵਿੱਤਰ ਤਿਉਹਾਰ ਦੇ ਮੌਕੇ 'ਤੇ ਰਾਜਸਥਾਨ ਸਰਕਾਰ ਨੇ ਸੂਬੇ ਦੀਆਂ ਔਰਤਾਂ ਨੂੰ ਇੱਕ ਵੱਡਾ ਤੋਹਫ਼ਾ ਦਿੱਤਾ ਹੈ। ਰਾਜਸਥਾਨ ਰੋਡਵੇਜ਼ ਦੀਆਂ ਬੱਸਾਂ ਵਿੱਚ ਮਹਿਲਾਵਾਂ ਅਤੇ ਬਾਲੜੀਆਂ ਲਈ 28 ਅਤੇ 29 ਅਗਸਤ ਨੂੰ ਦੋ ਦਿਨਾਂ ਤੱਕ ਸਫ਼ਰ ਬਿਲਕੁਲ ਮੁਫ਼ਤ ਰਹੇਗਾ। ਸਰਕਾਰ ਦੇ ਇਸ ਕਦਮ ਨਾਲ ਸੂਬੇ ਦੀਆਂ ਲੱਖਾਂ ਔਰਤਾਂ ਨੂੰ ਤਿਉਹਾਰ ਦੇ ਮੌਕੇ ਆਉਣ-ਜਾਣ ਵਿੱਚ ਵੱਡੀ ਆਰਥਿਕ ਰਾਹਤ ਅਤੇ ਸਹੂਲਤ ਮਿਲੇਗੀ।

ਇਹ ਛੋਟ ਰਾਜਸਥਾਨ ਰੋਡਵੇਜ਼ ਦੀਆਂ ਵੋਲਵੋ ਅਤੇ ਏਸੀ ਬੱਸਾਂ ਵਿੱਚ ਲਾਗੂ ਨਹੀਂ ਹੋਵੇਗੀ। ਔਰਤਾਂ ਸਿਰਫ਼ ਸਾਧਾਰਨ ਅਤੇ ਐਕਸਪ੍ਰੈਸ ਬੱਸਾਂ ਵਿੱਚ ਹੀ ਮੁਫ਼ਤ ਸਫ਼ਰ ਕਰ ਸਕਣਗੀਆਂ। ਮੁਫ਼ਤ ਸਫ਼ਰ ਦੀ ਇਹ ਸਹੂਲਤ ਸਿਰਫ਼ ਰਾਜਸਥਾਨ ਸੂਬੇ ਦੀ ਸੀਮਾ ਦੇ ਅੰਦਰ ਹੀ ਮਿਲੇਗੀ। ਜੇਕਰ ਕੋਈ ਬੱਸ ਸੂਬੇ ਦੀ ਹੱਦ ਤੋਂ ਬਾਹਰ ਜਾਂਦੀ ਹੈ, ਤਾਂ ਸੀਮਾ ਖ਼ਤਮ ਹੋਣ ਤੋਂ ਬਾਅਦ ਦੀ ਦੂਰੀ ਦਾ ਕਿਰਾਇਆ ਆਮ ਨਿਯਮਾਂ ਅਨੁਸਾਰ ਦੇਣਾ ਪਵੇਗਾ। ਰੋਡਵੇਜ਼ ਪ੍ਰਸ਼ਾਸਨ ਨੇ ਭੀੜ ਨੂੰ ਦੇਖਦੇ ਹੋਏ ਡਿਪੂ ਪੱਧਰ 'ਤੇ ਵਾਧੂ ਬੱਸਾਂ ਚਲਾਉਣ ਅਤੇ ਮਹਿਲਾ ਯਾਤਰੀਆਂ ਲਈ ਪੁਖ਼ਤਾ ਇੰਤਜ਼ਾਮ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ।

ਰਾਜਸਥਾਨ ਤੋਂ ਇਲਾਵਾ ਹੋਰਨਾਂ ਗੁਆਂਢੀ ਸੂਬਿਆਂ ਨੇ ਵੀ ਰੱਖੜੀ 'ਤੇ ਔਰਤਾਂ ਲਈ ਮੁਫ਼ਤ ਬੱਸ ਸਫ਼ਰ ਦਾ ਐਲਾਨ ਕੀਤਾ ਹੈ। ਯੂਪੀ ਸਰਕਾਰ ਨੇ ਭੈਣਾਂ ਨੂੰ ਵੱਡੀ ਰਾਹਤ ਦਿੰਦਿਆਂ ਰੋਡਵੇਜ਼ ਬੱਸਾਂ ਵਿੱਚ 27 ਤੋਂ 29 ਅਗਸਤ ਤੱਕ ਪੂਰੇ ਤਿੰਨ ਦਿਨਾਂ ਲਈ ਮੁਫ਼ਤ ਸਫ਼ਰ ਦਾ ਐਲਾਨ ਕੀਤਾ ਹੈ। ਭੀੜ ਨੂੰ ਕਾਬੂ ਕਰਨ ਲਈ ਵਾਧੂ ਬੱਸਾਂ ਦੇ ਫੇਰੇ ਵਧਾਉਣ ਅਤੇ ਕਰਮਚਾਰੀਆਂ ਦੀਆਂ ਛੁੱਟੀਆਂ ਰੱਦ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ। 

ਉੱਤਰਾਖੰਡ ਦੀ ਧਾਮੀ ਸਰਕਾਰ ਨੇ ਵੀ ਮਹਿਲਾਵਾਂ ਨੂੰ ਰੱਖੜੀ 'ਤੇ ਸੌਗਾਤ ਦਿੰਦਿਆਂ 28 ਅਤੇ 29 ਅਗਸਤ ਨੂੰ ਉੱਤਰਾਖੰਡ ਪਰਿਵਹਨ ਨਿਗਮ ਦੀਆਂ ਸਾਧਾਰਨ ਬੱਸਾਂ ਵਿੱਚ 2 ਦਿਨਾਂ ਲਈ ਫ੍ਰੀ ਸਫ਼ਰ ਦਾ ਐਲਾਨ ਕੀਤਾ ਹੈ, ਜਿਸ ਦਾ ਸਾਰਾ ਖ਼ਰਚਾ ਸਰਕਾਰ ਚੁੱਕੇਗੀ। ਇਹ ਲਾਭ ਵੀ ਸਿਰਫ਼ ਸੂਬੇ ਦੀ ਭੂਗੋਲਿਕ ਸੀਮਾ ਦੇ ਅੰਦਰ ਹੀ ਮਿਲੇਗਾ।