ਇਕ-ਇਕ ਕਰ 3 ਜਹਾਜ਼ਾਂ ਨੂੰ ਮਿਲੀ ਬੰਬ ਨਾਲ ਉਡਾਉਣ ਦੀ ਧਮਕੀ ! ਅਲਰਟ ਮਗਰੋਂ ਅਧਿਕਾਰੀਆਂ ਨੂੰ ਪਈਆਂ ਭਾਜੜਾਂ

ਨੈਸ਼ਨਲ ਡੈਸਕ- ਤੇਲੰਗਾਨਾ ਤੋਂ ਵੱਡੀ ਖ਼ਬਰ ਸਾਹਮਣੇ ਆ ਰਹੀ ਹੈ, ਜਿੱਥੇ ਸਥਿਤ ਹੈਦਰਾਬਾਦ ਹਵਾਈ ਅੱਡੇ 'ਤੇ ਫਲਾਈਟ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲੀ ਹੈ। ਐਤਵਾਰ ਦੇਰ ਰਾਤ ਕਸਟਮਰ ਸਰਵਿਸ ਨੂੰ ਮਿਲੀ ਇਸ ਧਮਕੀ ਭਰੀ ਈ-ਮੇਲ ਮਗਰੋਂ ਹਵਾਈ ਅੱਡੇ 'ਤੇ ਉਡਾਣਾਂ ਲਈ ਸੁਰੱਖਿਆ ਉਪਾਅ ਵਧਾ ਦਿੱਤੇ ਗਏ ਸਨ। 

ਘਟਨਾ ਦੀ ਜਾਣਕਾਰੀ ਮਿਲਦੇ ਹੀ, ਅਧਿਕਾਰੀਆਂ ਨੇ ਤੁਰੰਤ ਮਿਆਰੀ ਸੁਰੱਖਿਆ ਪ੍ਰੋਟੋਕੋਲ ਸ਼ੁਰੂ ਕਰ ਦਿੱਤੇ। ਅਧਿਕਾਰਤ ਸੂਤਰਾਂ ਅਨੁਸਾਰ ਈਮੇਲਾਂ ਵਿੱਚ ਤਿੰਨ ਖਾਸ ਉਡਾਣਾਂ ਨੂੰ ਧਮਕੀ ਦਿੱਤੀ ਗਈ ਹੈ। ਪਹਿਲੀ ਉਡਾਣ ਇੰਡੀਗੋ ਦੀ 6E 7178, ਜੋ ਕਿ ਕੰਨੂਰ ਤੋਂ ਹੈਦਰਾਬਾਦ ਆ ਰਹੀ ਸੀ, ਸਵੇਰੇ 10:50 ਵਜੇ ਸੁਰੱਖਿਅਤ ਲੈਂਡ ਕਰ ਗਈ ਹੈ। 

ਇਸ ਤੋਂ ਇਲਾਵਾ ਦੂਜੀ ਉਡਾਣ, ਲੁਫਥਾਂਸਾ ਦੀ LH 752 ਸੀ, ਜੋ ਕਿ ਫ੍ਰੈਂਕਫਰਟ ਤੋਂ ਹੈਦਰਾਬਾਦ ਆ ਰਹੀ ਸੀ, ਸੋਮਵਾਰ ਸਵੇਰੇ 02:00 ਵਜੇ ਸੁਰੱਖਿਅਤ ਹਵਾਈ ਅੱਡੇ 'ਤੇ ਲੈਂਡ ਹੋ ਗਈ ਹੈ, ਜਦਕਿ ਤੀਜੀ ਉਡਾਣ ਬ੍ਰਿਟਿਸ਼ ਏਅਰਵੇਜ਼ ਦੀ BA 277 ਸੀ ਹੀਥਰੋ ਤੋਂ ਇੱਥੇ ਸਵੇਰੇ 05:30 ਵਜੇ ਸੁਰੱਖਿਅਤ ਉਤਰੀ। 

ਅਲਰਟ ਮਿਲਣ 'ਤੇ ਹਵਾਈ ਅੱਡੇ ਦੇ ਅਧਿਕਾਰੀਆਂ ਨੇ ਤਿੰਨਾਂ ਜਹਾਜ਼ਾਂ ਲਈ ਪੂਰੀ ਸੁਰੱਖਿਆ ਪ੍ਰਕਿਰਿਆਵਾਂ ਨੂੰ ਅੰਜਾਮ ਦਿੱਤਾ ਤੇ ਪ੍ਰੋਟੋਕੋਲ ਦੇ ਅਨੁਸਾਰ ਪੂਰੀ ਜਾਂਚ ਕੀਤੀ ਗਈ। ਇਸ ਜਾਂਚ ਦੌਰਾਨ ਜਹਾਜ਼ਾਂ 'ਚੋਂ ਕੋਈ ਵੀ ਵਿਸਫੋਟਕ ਜਾਂ ਸ਼ੱਕੀ ਸਮੱਗਰੀ ਨਹੀਂ ਮਿਲੀ। ਅਧਿਕਾਰੀ ਈਮੇਲ ਦੇ ਸਰੋਤ ਦੀ ਜਾਂਚ ਕਰ ਰਹੇ ਹਨ। ਇਸ ਦੌਰਾਨ ਇੰਡੀਗੋ ਨੇ ਸੋਮਵਾਰ ਲਈ ਸੰਚਾਲਨ ਪਾਬੰਦੀਆਂ ਦਾ ਐਲਾਨ ਕੀਤਾ ਹੈ ਤੇ ਹੈਦਰਾਬਾਦ ਹਵਾਈ ਅੱਡੇ 'ਤੇ 58 ਆਗਮਨ ਅਤੇ 54 ਰਵਾਨਗੀ ਫਲਾਈਟਾਂ ਰੱਦ ਕਰ ਦਿੱਤੀਆਂ ਗਈਆਂ ਹਨ।