ਮਹਿੰਗੀ ਹਵਾਈ ਯਾਤਰਾ ਅਤੇ ਯੁੱਧ ਦਰਮਿਆਨ ਭਾਰਤ ਪਰਤੀਆਂ ਡੈਸਟੀਨੇਸ਼ਨ ਵੈਡਿੰਗਸ

ਨਵੀਂ ਦਿੱਲੀ - ਪੱਛਮੀ ਏਸ਼ੀਆ ’ਚ ਜਾਰੀ ਤਣਾਅ, ਅੰਤਰਰਾਸ਼ਟਰੀ ਯਾਤਰਾ ਨਾਲ ਜੁੜੀਆਂ ਅਨਿਸ਼ਚਿਤਤਾਵਾਂ ਅਤੇ ਵਧਦੇ ਹਵਾਈ ਕਿਰਾਏ ਦਰਮਿਆਨ ਭਾਰਤੀ ਪਰਿਵਾਰ ਹੁਣ ‘ਡੈਸਟੀਨੇਸ਼ਨ ਵੈਡਿੰਗਸ’ ਲਈ ਵਿਦੇਸ਼ਾਂ ਦੀ ਬਜਾਏ ਦੇਸ਼ ਦੇ ਅੰਦਰ ਮੌਜੂਦ ਸੈਰ-ਸਪਾਟਾ ਸਥਾਨਾਂ ਨੂੰ ਤਰਜੀਹ ਦੇ ਰਹੇ ਹਨ। ਇਸ ਦਾ ਸਿੱਧਾ ਫਾਇਦਾ ਦੇਸ਼ ਦੇ ਹੋਟਲ ਅਤੇ ਹਾਸਪਿਟੈਲਿਟੀ ਉਦਯੋਗ ਨੂੰ ਮਿਲ ਰਿਹਾ ਹੈ, ਜਿਥੇ ਇਸ ਸਾਲ ਵਿਆਹ ਸਮਾਗਮਾਂ ਦੀ ਬੁਕਿੰਗ ਵਿਚ ਦੋਹਰੇ ਅੰਕਾਂ ਦਾ ਵਾਧਾ ਦਰਜ ਕੀਤਾ ਜਾ ਰਿਹਾ ਹੈ।

ਗੋਆ, ਜੈਪੁਰ ਅਤੇ ਉਦੈਪੁਰ ਬਣੇ ਪਸੰਦੀਦਾ ਸਥਾਨ
ਹੋਟਲ ਉਦਯੋਗ ਨਾਲ ਜੁੜੇ ਮਾਹਿਰਾਂ ਅਨੁਸਾਰ ਗੋਆ, ਆਗਰਾ, ਜੈਪੁਰ ਅਤੇ ਉਦੈਪੁਰ ਵਰਗੇ ਪ੍ਰਮੁੱਖ ਸੈਰ-ਸਪਾਟਾ ਸਥਾਨਾਂ ’ਤੇ ਵਿਆਹ ਸਮਾਗਮਾਂ ਦੀ ਮੰਗ ਵਿਚ ਕਾਫ਼ੀ ਵਾਧਾ ਹੋਇਆ ਹੈ। ਹੋਟਲ ਚੇਨਾਂ ਦਾ ਕਹਿਣਾ ਹੈ ਕਿ ਘਰੇਲੂ ਸਮਾਗਮਾਂ ਵੱਲ ਵਧਦਾ ਰੁਝਾਨ ਅਤੇ ਵਿਦੇਸ਼ ਯਾਤਰਾਵਾਂ ਵਿਚ ਆ ਰਹੀਆਂ ਚੁਣੌਤੀਆਂ ਇਸ ਵਾਧੇ ਦਾ ਮੁੱਖ ਕਾਰਨ ਹਨ।

ਪੱਛਮੀ ਏਸ਼ੀਆ ਸੰਕਟ ਦਾ ਦਿਸਿਆ ਅਸਰ
ਹੋਟਲ ਕਾਰੋਬਾਰੀਆਂ ਦਾ ਮੰਨਣਾ ਹੈ ਕਿ ਪੱਛਮੀ ਏਸ਼ੀਆ ’ਚ ਜਾਰੀ ਸੰਘਰਸ਼ ਅਤੇ ਉਸ ਨਾਲ ਜੁੜੀਆਂ ਯਾਤਰਾ ਰੁਕਾਵਟਾਂ ਨੇ ਕਈ ਪਰਿਵਾਰਾਂ ਨੂੰ ਵਿਦੇਸ਼ਾਂ ਵਿਚ ਵਿਆਹ ਆਯੋਜਿਤ ਕਰਨ ਦੀਆਂ ਯੋਜਨਾਵਾਂ ’ਤੇ ਮੁੜ ਵਿਚਾਰ ਕਰਨ ਲਈ ਮਜਬੂਰ ਕੀਤਾ ਹੈ। ਇਸ ਕਾਰਨ ਜੋ ਵਿਆਹ ਪਹਿਲਾਂ ਵਿਦੇਸ਼ਾਂ ਵਿਚ ਹੋਣੇ ਤੈਅ ਸਨ, ਉਹ ਹੁਣ ਭਾਰਤ ਦੇ ਵੱਖ-ਵੱਖ ਸੈਰ-ਸਪਾਟਾ ਸਥਾਨਾਂ ’ਤੇ ਆਯੋਜਿਤ ਕੀਤੇ ਜਾ ਰਹੇ ਹਨ।

ਹੋਟਲ ਉਦਯੋਗ ਨੂੰ ਮਿਲ ਰਿਹਾ ਵੱਡਾ ਫਾਇਦਾ
ਦੇਸ਼ ਦੀਆਂ ਪ੍ਰਮੁੱਖ ਹੋਟਲ ਚੇਨਾਂ ਨੇ ਦੱਸਿਆ ਕਿ ਵਿਆਹ ਸਮਾਗਮਾਂ ਦੀ ਬੁਕਿੰਗ ਪਿਛਲੇ ਸਾਲ ਦੇ ਮੁਕਾਬਲੇ ਕਾਫ਼ੀ ਵਧੀ ਹੈ। ਕਈ ਨਾਮਵਰ ਰਿਜ਼ੋਰਟ ਅਤੇ ਲਗਜ਼ਰੀ ਹੋਟਲ ਪਹਿਲਾਂ ਹੀ ਆਉਣ ਵਾਲੇ ਮਹੀਨਿਆਂ ਲਈ ਵੱਡੀ ਗਿਣਤੀ ਵਿਚ ਬੁਕਿੰਗ ਪ੍ਰਾਪਤ ਕਰ ਚੁੱਕੇ ਹਨ। ਇਸ ਨਾਲ ਹੋਟਲ ਉਦਯੋਗ ਦੀ ਆਮਦਨ ਅਤੇ ਵਪਾਰਕ ਗਤੀਵਿਧੀਆਂ ਵਿਚ ਤੇਜ਼ੀ ਆਈ ਹੈ।

ਘਰੇਲੂ ਸੈਰ-ਸਪਾਟੇ ਨੂੰ ਮਿਲਿਆ ਨਵਾਂ ਉਤਸ਼ਾਹ
ਡੈਸਟੀਨੇਸ਼ਨ ਵੈਡਿੰਗਸ ਦੇ ਭਾਰਤ ਪਰਤਣ ਨਾਲ ਨਾ ਸਿਰਫ ਹੋਟਲ ਉਦਯੋਗ, ਸਗੋਂ ਸਥਾਨਕ ਸੈਰ-ਸਪਾਟਾ, ਟਰਾਂਸਪੋਰਟ, ਖਾਣ-ਪੀਣ ਅਤੇ ਇਵੈਂਟ ਮੈਨੇਜਮੈਂਟ ਖੇਤਰ ਨੂੰ ਵੀ ਵੱਡਾ ਲਾਭ ਮਿਲ ਰਿਹਾ ਹੈ। ਉਦਯੋਗ ਜਗਤ ਦਾ ਮੰਨਣਾ ਹੈ ਕਿ ਜੇਕਰ ਇਹ ਰੁਝਾਨ ਜਾਰੀ ਰਿਹਾ ਤਾਂ ਆਉਣ ਵਾਲੇ ਸਾਲਾਂ ਵਿਚ ਭਾਰਤ ਵਿਸ਼ਵ ਪੱਧਰ ’ਤੇ ਡੈਸਟੀਨੇਸ਼ਨ ਵੈਡਿੰਗਸ ਦਾ ਪ੍ਰਮੁੱਖ ਕੇਂਦਰ ਬਣ ਸਕਦਾ ਹੈ।

ਗੋਆ ਵਿਚ ਮਾਨਸੂਨ ਵੈਡਿੰਗਸ ਦਾ ਵਧਿਆ ਰੁਝਾਨ
ਗੋਆ ਵਿਚ ਇਸ ਵਾਰ ਮਾਨਸੂਨ ਸੀਜ਼ਨ ਦੌਰਾਨ ਵੀ ਵਿਆਹ ਸਮਾਗਮਾਂ ਦੀ ਮੰਗ ਵਧੀ ਹੈ। ਹੋਟਲ ਸੰਚਾਲਕਾਂ ਮੁਤਾਬਕ ਪਹਿਲਾਂ ਜਿਥੇ ਪਰਿਵਾਰ ਬਰਸਾਤ ਦੇ ਮੌਸਮ ਵਿਚ ਵਿਆਹ ਕਰਨ ਤੋਂ ਬਚਦੇ ਸਨ, ਉਥੇ ਹੀ ਹੁਣ ਆਕਰਸ਼ਕ ਪੈਕੇਜਾਂ ਅਤੇ ਬਿਹਤਰ ਸੁਵਿਧਾਵਾਂ ਕਾਰਨ ਲੋਕ ਮਾਨਸੂਨ ਵੈਡਿੰਗਸ ਨੂੰ ਵੀ ਅਪਣਾਉਣ ਲੱਗੇ ਹਨ।

ਉੱਭਰਦੇ ਸ਼ਹਿਰ ਵੀ ਬਣ ਰਹੇ ਆਕਰਸ਼ਣ ਦਾ ਕੇਂਦਰ
ਰਵਾਇਤੀ ਸਥਾਨਾਂ ਤੋਂ ਇਲਾਵਾ ਚਿਤਵਨ, ਪੀਲੀਭੀਤ, ਸਿੰਧੂਦੁਰਗ, ਮਥੁਰਾ ਅਤੇ ਕਰਨਾਲ ਵਰਗੇ ਨਵੇਂ ਸਥਾਨ ਵੀ ਲੋਕਾਂ ਨੂੰ ਆਕਰਸ਼ਿਤ ਕਰ ਰਹੇ ਹਨ। ਹੋਟਲ ਉਦਯੋਗ ਦਾ ਮੰਨਣਾ ਹੈ ਕਿ ਮਹਿਮਾਨ ਹੁਣ ਭੀੜ-ਭੜੱਕੇ ਵਾਲੀਆਂ ਥਾਵਾਂ ਦੀ ਬਜਾਏ ਵਿਲੱਖਣ ਅਤੇ ਸ਼ਾਂਤ ਵਾਤਾਵਰਣ ਵਾਲੇ ਸਥਾਨਾਂ ਨੂੰ ਤਰਜੀਹ ਦੇ ਰਹੇ ਹਨ।

ਰਵਾਇਤੀ ਖਾਣ-ਪੀਣ ਅਤੇ ਸ਼ਾਹੀ ਅਨੁਭਵ ਦੀ ਮੰਗ
ਵਿਆਹ ਸਮਾਗਮਾਂ ਵਿਚ ਹੁਣ ਸਿਰਫ ਸ਼ਾਨਦਾਰ ਆਯੋਜਨ ਹੀ ਨਹੀਂ, ਸਗੋਂ ਸਥਾਨਕ ਸੱਭਿਆਚਾਰ ਅਤੇ ਰਵਾਇਤੀ ਪਕਵਾਨਾਂ ਨੂੰ ਵੀ ਮਹੱਤਵ ਦਿੱਤਾ ਜਾ ਰਿਹਾ ਹੈ। ਹੋਟਲ ਵਿਸ਼ੇਸ਼ ਤੌਰ ’ਤੇ ਖੇਤਰੀ ਸ਼ਾਕਾਹਾਰੀ ਪਕਵਾਨ, ਰਾਜਸਥਾਨੀ ਅਤੇ ਮਾਰਵਾੜੀ ਪਕਵਾਨਾਂ ਨਾਲ ਮਹਿਮਾਨਾਂ ਨੂੰ ਇਕ ਵਿਲੱਖਣ ਅਨੁਭਵ ਦੇਣ ’ਤੇ ਧਿਆਨ ਕੇਂਦਰਿਤ ਕਰ ਰਹੇ ਹਨ।

ਲਗਜ਼ਰੀ ਅਤੇ ਨਿੱਜੀ ਅਨੁਭਵ ਨੂੰ ਮਿਲ ਰਹੀ ਤਰਜੀਹ
ਮਾਹਿਰਾਂ ਅਨੁਸਾਰ ਪਰਿਵਾਰ ਅਜਿਹੇ ਆਯੋਜਨਾਂ ਦੀ ਤਲਾਸ਼ ਵਿਚ ਹਨ, ਜਿਥੇ ਉਨ੍ਹਾਂ ਨੂੰ ਨਿੱਜੀ ਸੇਵਾਵਾਂ, ਸ਼ਾਹੀ ਪ੍ਰਾਹੁਣਚਾਰੀ ਅਤੇ ਯਾਦਗਾਰੀ ਅਨੁਭਵ ਮਿਲ ਸਕੇ। ਇਹੀ ਕਾਰਨ ਹੈ ਕਿ ਮਹਿਲ ਵਰਗੇ ਹੋਟਲਾਂ, ਹੈਰੀਟੇਜ ਪ੍ਰਾਪਰਟੀਆਂ ਅਤੇ ਲਗਜ਼ਰੀ ਰਿਜ਼ੋਰਟਾਂ ਦੀ ਮੰਗ ਲਗਾਤਾਰ ਵਧ ਰਹੀ ਹੈ।