ਕੋਰਟ ਨੇ ਅਮੂਲ ਆਈਸਕ੍ਰੀਮ ਦੇ ਡੱਬੇ ''ਚ ਕਨਖਜ਼ੂਰਾ ਨਿਕਲਣ ਸੰਬੰਧੀ ਪੋਸਟ ਹਟਾਉਣ ਦੇ ਦਿੱਤੇ ਨਿਰਦੇਸ਼

ਨਵੀਂ ਦਿੱਲੀ (ਭਾਸ਼ਾ)- ਦਿੱਲੀ ਹਾਈ ਕੋਰਟ ਨੇ ਨੋਇਡਾ ਦੀ ਇਕ ਔਰਤ ਨੂੰ ਅਮੂਲ ਦੀ ਆਈਸਕ੍ਰੀਮ ਦੇ ਡੱਬੇ 'ਚੋਂ ਕਨਖਜ਼ੂਰਾ ਮਿਲਣ ਦੇ ਦੋਸ਼ ਵਾਲਾ ਆਪਣਾ ਪੋਸਟ ਹਟਾਉਣ ਦੇ ਨਿਰਦੇਸ਼ ਦਿੱਤੇ ਹਨ। ਜੱਜ ਮਨਮੀਤ ਪੀ.ਐੱਸ. ਅਰੋੜਾ ਨੇ ਅਮੂਲ ਬਰਾਂਡ ਦੇ ਅਧੀਨ ਉਤਪਾਦਾਂ ਦੀ ਮਾਰਕੀਟਿੰਗ ਕਰਨ ਵਾਲੇ ਗੁਜਰਾਤ ਸਹਿਕਾਰੀ ਦੁੱਧ ਮਾਰਕੀਟਿੰਗ ਸੰਘ ਵਲੋਂ ਦਾਇਰ ਮੁਕੱਦਮੇ 'ਤੇ ਸੁਣਵਾਈ ਕਰਦੇ ਹੋਏ ਗਾਹਕ 'ਤੇ ਅਗਲੇ ਆਦੇਸ਼ ਤੱਕ ਸੋਸ਼ਲ ਮੀਡੀਆ ਮੰਚ 'ਤੇ ਇਸ ਤਰ੍ਹਾਂ ਦੀ ਸਮੱਗਰੀ ਪੋਸਟ ਕਰਨ ਅਤੇ ਅਪੋਲਡ ਕਰਨ 'ਤੇ ਰੋਕ ਲਗਾਈ ਹੈ। ਦਰਅਸਲ ਸੋਸ਼ਲ ਮੀਡੀਆ ਮੰਚ 'ਐਕਸ' 'ਤੇ 15 ਜੂਨ ਨੂੰ ਦੀਪਾ ਦੇਵੀ ਨੇ ਇਕ ਤਸਵੀਰ ਸਾਂਝੀ ਕੀਤੀ ਸੀ, ਜਿਸ 'ਚ ਕਥਿਤ ਤੌਰ 'ਤੇ ਅਮੂਲ ਦੀ ਆਈਸਕ੍ਰੀਮ ਦੇ ਡੱਬੇ ਦੇ ਅੰਦਰ ਇਕ ਕਨਖਜ਼ੂਰਾ ਦਿਖਾਈ ਦੇ ਰਿਹਾ ਹੈ। ਔਰਤ ਨੇ ਇਹ ਆਈਸਕ੍ਰੀਮ ਇਕ ਐਪ ਦੇ ਮਾਧਿਅਮ ਨਾਲ ਮੰਗਵਾਈ ਸੀ। ਮੁਕੱਦਮਾ ਦਾਇਰ ਕਰਨ ਵਾਲੀ ਕੰਪਨੀ ਨੇ ਹਾਈ ਕੋਰਟ 'ਚ ਤਰਕ ਦਿੱਤਾ ਕਿ ਇਹ ਦਾਅਵਾ ਝੂਠਾ ਅਤੇ ਗਲਤ ਹੈ, ਕਿਉਂਕਿ ਉਸ ਦੇ ਕਾਰਖਾਨੇ 'ਚ ਪਕ ਕੀਤੇ ਗਏ ਆਈਸਕ੍ਰੀਮ ਦੇ ਡੱਬੇ 'ਚ ਕੋਈ ਵੀ ਬਾਹਰੀ ਸਾਮਾਨ ਭਾਵੇਂ ਉਹ ਕੀੜਾ ਹੀ ਕਿਉਂ ਨਾ ਹੋਵੇ, ਮੌਜੂਦ ਹੋਣਾ ਬਿਲਕੁੱਲ ਅਸੰਭਵ ਹੈ
ਅਦਾਲਤ ਨੇ ਇਹ ਆਦੇਸ਼ 4 ਜੁਲਾਈ ਨੂੰ ਪਾਸ ਕੀਤਾ। ਇਸ 'ਚ ਕਿਹਾ ਗਿਆ ਕਿ ਗਾਹਕ ਮੌਜੂਦਾ ਸਮੇਂ ਕਾਰਵਾਈ 'ਚ ਅੱਜ ਵੀ ਮੌਜੂਦ ਨਹੀਂ ਹੈ ਅਤੇ ਉਸ ਦੇ ਅਸਹਿਯੋਗ ਵਾਲੇ ਰਵੱਈਏ ਨੇ ਕੰਪਨੀ ਦੇ ਮਾਮਲੇ ਨੂੰ ਮਜ਼ਬੂਤ ਕੀਤਾ ਹੈ। ਆਦੇਸ਼ 'ਚ ਕਿਹਾ ਗਿਆ ਕਿ ਗਾਹਕ ਨੂੰ ਅਦਾਲਤੀ ਕਾਰਵਾਈ 'ਚ ਹਿੱਸਾ ਲੈਣ ਅਤੇ ਆਪਣੇ ਸੋਸ਼ਲ ਮੀਡੀਆ ਪੋਸਟ 'ਚ ਕੀਤੇ ਗਏ ਦਾਅਵੇ ਨੂੰ ਸਹੀ ਸਾਬਿਤ ਕਰਨ ਦਾ ਮੌਕਾ ਦਿੱਤਾ ਸੀ ਪਰ ਉਨ੍ਹਾਂ ਨੇ ਹਾਜ਼ਰ ਨਹੀਂ ਹੋਣ ਨੂੰ ਤਰਜੀਹ ਦਿੱਤੀ ਅਤੇ ਜਾਂਚ ਲਈ ਆਈਸਕ੍ਰੀਮ ਦਾ ਡੱਬਾ ਵੀ ਕੰਪਨੀ ਨੂੰ ਨਹੀਂ ਦਿੱਤਾ। ਅਦਾਲਤ ਨੇ ਸਪੱਸ਼ਟ ਕੀਤਾ ਕਿ ਜੇਕਰ ਪ੍ਰਤੀਵਾਦੀ ਤਿੰਨ ਦਿਨ 'ਚ ਸੋਸ਼ਲ ਮੀਡੀਆ ਪੋਸਟ ਨਹੀਂ ਹਟਾਉਂਦਾ ਤਾਂ ਕੰਪਨੀ 'ਐਕਸ' ਨੂੰ ਆਪਣੇ ਮੰਚ ਤੋਂ ਇਸ ਨੂੰ ਹਟਾਉਣ ਲਈ ਕਹਿ ਸਕਦੀ ਹੈ। ਮੁਕੱਦਮੇ ਦਾਖ਼ਲ ਕਰਨ ਵਾਲੀ ਕੰਪਨੀ ਵਲੋਂ ਪੇਸ਼ ਸੀਨੀਅਰ ਐਡਵੋਕੇਟ ਸੁਨੀਲ ਦਲਾਲ ਅਤੇ ਵਕੀਲ ਅਭਿਸ਼ੇਕ ਸਿੰਘ ਨੇ ਆਪਣੀ ਦਲੀਲ 'ਚ ਕਿਹਾ ਕਿ ਕੰਪਨੀ ਮਾਮਲੇ ਦੀ ਜਾਂਚ ਲਈ ਤਿਆਰ ਸੀ ਅਤੇ ਉਸ ਨੇ 15 ਜੂਨ ਨੂੰ ਗਾਹਕ ਨਾਲ ਸੰਪਰਕ ਵੀ ਕੀਤਾ ਸੀ ਪਰ ਉਨ੍ਹਾਂ ਨੇ ਅਧਿਕਾਰੀਆਂ ਨੂੰ ਆਈਸਕ੍ਰੀਮ ਦਾ ਡੱਬਾ ਉਪਲੱਬਧ ਕਰਵਾਉਣ ਤੋਂ ਇਨਕਾਰ ਕਰ ਦਿੱਤਾ ਸੀ।

ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ

👇Join us on Whatsapp channel👇                             

https://whatsapp.com/channel/0029Va94hsaHAdNVur4L170e