ਦੀਪਿਕਾ ਪਾਦੁਕੋਣ ਪੂਰੇ ਦਹਾਕੇ ਦੀ ਤੇ ਆਲੀਆ ਭੱਟ ਇਸ ਸਾਲ ਦੀ ਸਭ ਤੋਂ ''ਸੈਕਸੀ ਲੇਡੀ''

ਲੰਡਨ - ਬਾਲੀਵੁੱਡ ਅਦਾਕਾਰਾ ਆਲੀਆ ਭੱਟ ਨੂੰ 2019 ਦੀ ਸਭ ਤੋਂ 'ਸੈਕਸੀ' ਏਸ਼ੀਆਈ ਲੇਡੀ ਅਤੇ ਉਨ੍ਹਾਂ ਦੀ ਸਾਥੀ ਅਭਿਨੇਤਰੀ ਦੀਪਿਕਾ ਪਾਦੁਕੋਣ ਨੂੰ ਪੂਰੇ ਦਹਾਕੇ ਦੀ ਸਭ ਤੋਂ 'ਸੈਕਸੀ' ਲੇਡੀ ਚੁਣਿਆ ਗਿਆ ਹੈ। ਲੰਡਨ 'ਚ ਬੁੱਧਵਾਰ ਨੂੰ ਜਾਰੀ ਇਕ ਆਨਲਾਈਨ ਚੋਣ 'ਚ ਦੋਵਾਂ ਦੇ ਸਿਰ 'ਤੇ ਇਹ ਤਾਜ਼ ਸਜਿਆ ਹੈ। ਬ੍ਰਿਟੇਨ ਦੀ ਹਫਤਾਵਾਰੀ ਅਖਬਾਰ 'ਈਸਟਰਨ ਆਈ' ਵਲੋਂ ਜਾਰੀ ਇਸ ਸਾਲਾਨਾ ਲਿਸਟ 'ਚ ਟਾਪ 'ਤੇ ਰੱਖੀ ਗਈ ਮਹਿਲਾ ਆਲੀਆ ਲਈ ਇਸ ਸਾਲ ਨੂੰ ਉਨ੍ਹਾਂ ਦੇ ਲਈ ਸ਼ਾਨਦਾਰ ਦੱਸਿਆ ਗਿਆ ਹੈ, ਜਿਥੇ ਉਸ ਨੇ ਅਦਾਕਾਰੀ 'ਚ ਕਈ ਅਵਾਰਡ ਤਾਂ ਜਿੱਤੇ ਹੀ ਨਾਲ ਹੀ ਉਹ 2020 'ਆਸਕਰ' ਲਈ ਭਾਰਤ ਦੀ ਅਧਿਕਾਰਕ ਐਂਟਰੀ 'ਗਲੀ ਬੁਆਏ' ਦੀ ਅਭਿਨੇਤਰੀ ਵੀ ਹੈ।

ਭੱਟ ਨੇ ਆਪਣੇ ਪੱਖ 'ਚ ਕੀਤੀਆਂ ਵੋਟਾਂ 'ਤੇ ਖੁਸ਼ੀ ਜ਼ਾਹਿਰ ਕਰਦੇ ਹੋਏ ਆਖਿਆ ਕਿ ਮੇਰਾ ਹਮੇਸ਼ਾ ਤੋਂ ਮੰਨਣਾ ਰਿਹਾ ਹੈ ਕਿ ਅਸਲ 'ਚ ਖੂਬਸੂਰਤੀ ਜੋ ਦਿੱਖਦੀ ਹੈ, ਉਸ ਤੋਂ ਕਿਤੇ ਜ਼ਿਆਦਾ ਹੁੰਦੀ ਹੈ ਅਤੇ ਉਹੀ ਸਭ ਤੋਂ ਜ਼ਿਆਦਾ ਅਹਿਮੀਅਤ ਰੱਖਦੀ ਹੈ। ਉਸ ਨੇ ਅੱਗੇ ਆਖਿਆ ਕਿ ਅਸੀਂ ਬੁੱਢੇ ਹੋ ਜਾਵਾਂਗੇ, ਅਸੀਂ ਕਿਹੋ ਜਿਹੇ ਦਿੱਖਦੇ ਹਾਂ ਇਹ ਸਮੇਂ ਦੇ ਨਾਲ ਬਦਲ ਜਾਵੇਗਾ ਪਰ ਤੁਹਾਡੇ ਦਿਲ ਤੋਂ ਚੰਗਾ ਹੋਣਾ ਤੁਹਾਨੂੰ ਹਮੇਸ਼ਾ ਖੂਬਸੂਰਤ ਬਣਾਈ ਰੱਖੇਗਾ ਅਤੇ ਸਾਨੂੰ ਸਭ ਨੂੰ ਇਸ 'ਤੇ ਧਿਆਨ ਦੇਣਾ ਚਾਹੀਦਾ ਹੈ। ਦੱਸ ਦਈਏ ਕਿ 'ਸੈਕਸੀਅਟ ਏਸ਼ੀਅਨ ਫੀਮੇਲ' ਲਿਸਟ ਆਨਲਾਈਨ ਵੋਟ, ਮੀਡੀਆ ਕਵਰੇਜ਼, ਵੱਖ-ਵੱਖ ਸੋਸ਼ਲ ਮੀਡੀਆ ਮੰਚਾਂ 'ਤੇ ਮਿਲਣ ਵਾਲੀ ਪ੍ਰਤੀਕਿਰਿਆ ਦੇ ਆਧਾਰ 'ਤੇ ਤਿਆਰ ਕੀਤੀ ਜਾਂਦੀ ਹੈ।

'ਈਸਟਰਨ ਆਈ' ਦੇ ਐਂਟਰਟੇਨਮੈਂਟ ਸੰਪਾਦਕ ਅਤੇ ਇਸ ਲਿਸਟ ਦੀ ਸ਼ੁਰੂਆਤ ਕਰਨ ਵਾਲੇ ਅਸਜ਼ਾਦ ਨਜ਼ੀਰ ਨੇ ਆਖਿਆ ਕਿ ਆਲੀਆ ਭੱਟ ਜਿਹਾ ਵੱਡਾ ਨਾਂ ਫਿਲਹਾਲ ਅਜੇ ਕੋਈ ਨਹੀਂ ਹੈ ਅਤੇ ਹਿੰਦੀ ਸਿਨੇਮਾ ਦੇ ਅਗਲੇ ਦਹਾਕੇ 'ਚ ਬਾਲੀਵੁੱਡ ਕੁਈਨ ਦੀ ਤਰ੍ਹਾਂ ਰਾਜ ਕਰਨ ਤੋਂ ਕੋਈ ਵੀ ਚੀਜ਼ ਉਨ੍ਹਾਂ ਨੂੰ ਰੋਕ ਨਹੀਂ ਸਕਦੀ। ਫਿਲਮ ਸਟਾਰ ਤੋਂ ਜ਼ਿਆਦਾ ਉਹ ਮਹਿਲਾ ਸ਼ਕਤੀ ਦੀ ਸ਼ਕਤੀਸ਼ਾਲੀ ਪ੍ਰਤੀਕ ਹੈ। ਜੋ ਇਕ ਮਜ਼ਬੂਤ ਆਧੁਨਿਕ ਮਹਿਲਾ ਦੀ ਨੁਮਾਇੰਦਗੀ ਕਰਦੀ ਹੈ। ਦੀਪਿਕਾ ਪਾਦੁਕੋਣ, ਜੋ ਪਿਛਲੇ ਸਾਲ ਇਸ ਲਿਸਟ 'ਚ ਟਾਪ 'ਤੇ ਸੀ, ਇਸ ਸਾਲ ਦੂਜੇ ਨੰਬਰ 'ਤੇ ਹੈ ਪਰ ਦਹਾਕੇ ਦੀ ਸਭ ਤੋਂ ਸੈਕਸੀ ਲੇਡੀ ਦਾ ਖਿਤਾਬ ਇਸ ਵਾਰ ਵੀ ਉਨ੍ਹਾਂ ਦੇ ਸਿਰ 'ਤੇ ਬਰਕਰਾਰ ਰਿਹਾ। ਇਸ ਲਿਸਟ 'ਚ ਟੈਲੀਵੀਜ਼ਨ ਦੇ ਕਲਾਕਾਰਾਂ 'ਚ ਹਿਨਾ ਖਾਨ ਨੇ ਤੀਜਾ ਨੰਬਰ ਹਾਸਲ ਕੀਤਾ। ਉਥੇ ਹੀ ਚੌਥੇ ਨੰਬਰ 'ਤੇ ਰਹੀ ਮਾਹਿਰਾ ਖਾਨ ਨੇ ਇਸ ਧਰਤੀ 'ਤੇ ਸਭ ਤੋਂ ਸੈਕਸੀ ਪਾਕਿਸਤਾਨੀ ਲੇਡੀ ਦਾ ਤਾਜ ਲਗਾਤਾਰ ਪੰਜਵੇ ਸਾਲ ਵੀ ਬਰਕਰਾਰ ਰਖਿਆ। ਇਸ ਸਾਲ ਦੀ ਟਾਪ 10 'ਚ ਸੁਰਭੀ ਚੰਦਨਾ (5), ਕੈਟਰੀਨਾ ਕੈਫ (6), ਸ਼ਿਵਾਂਗੀ ਜੋਸ਼ੀ (7), ਨਿਯਾ ਸ਼ਰਮਾ (8), ਮੇਹਵਿਸ਼ ਹਯਾਤ (9) ਅਤੇ ਪ੍ਰਿਯੰਕਾ ਚੋਪੜਾ (10) ਨੇ ਆਪਣੀ ਥਾਂ ਬਣਾਈ ਹੈ।