ਡਿਊਟੀ ''ਤੇ ਅਨੁਸ਼ਾਸਨਹੀਣਤਾ ! ਬੋਕਾਰੋ ਜ਼ਿਲ੍ਹੇ ''ਚ 3 ਪੁਲਸ ਮੁਲਾਜ਼ਮ ਸਸਪੈਂਡ

ਨੈਸ਼ਨਲ ਡੈਸਕ- ਝਾਰਖੰਡ ਦੇ ਬੋਕਾਰੋ ਜ਼ਿਲ੍ਹੇ ਵਿੱਚ ਡਿਊਟੀ ਪ੍ਰਤੀ ਲਾਪਰਵਾਹੀ ਵਰਤਣ ਅਤੇ ਅਨੁਸ਼ਾਸਨਹੀਣਤਾ ਦੇ ਦੋਸ਼ ਵਿੱਚ ਬੋਕਾਰੋ ਦੇ ਪੁਲਸ ਸੁਪਰਡੈਂਟ ਨੇ ਚੀਰਾਚਾਸ ਥਾਣੇ ਦੇ ਤਿੰਨ ਪੁਲਸ ਮੁਲਾਜ਼ਮਾਂ ਨੂੰ ਮੁਅੱਤਲ ਕਰ ਦਿੱਤਾ ਹੈ। ਪੁਲਸ ਸੂਤਰਾਂ ਅਨੁਸਾਰ, 5 ਮਈ ਨੂੰ ਸੋਸ਼ਲ ਮੀਡੀਆ 'ਤੇ ਇੱਕ ਵੀਡੀਓ ਤੇਜ਼ੀ ਨਾਲ ਵਾਇਰਲ ਹੋਇਆ ਸੀ, ਜਿਸ ਵਿੱਚ ਪੁਲਸ ਦੀ ਭੂਮਿਕਾ 'ਤੇ ਗੰਭੀਰ ਸਵਾਲ ਉਠਾਏ ਗਏ ਸਨ। ਐੱਸ.ਪੀ. ਨਾਥੂ ਸਿੰਘ ਮੀਨਾ ਨੇ ਮਾਮਲੇ ਦੀ ਜਾਂਚ ਦੇ ਹੁਕਮ ਦਿੱਤੇ, ਜਿਸ ਵਿੱਚ ਕਈ ਖੁਲਾਸੇ ਹੋਏ ਹਨ।

ਜਾਂਚ ਮੁਤਾਬਕ 4 ਮਈ ਦੀ ਸ਼ਾਮ ਨੂੰ ਵੀਣਾ ਰਿਜੈਂਸੀ ਦੇ ਸਾਹਮਣੇ ਆਰਿਫ਼ ਅੰਸਾਰੀ ਨਾਂ ਦੇ ਇੱਕ ਨੌਜਵਾਨ ਦੀ ਕੁਝ ਲੋਕਾਂ ਵੱਲੋਂ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ ਗਈ ਸੀ। ਜਾਂਚ ਰਿਪੋਰਟ ਅਨੁਸਾਰ, ਪੁਲਸ ਦਾ ਪਹਿਲਾ ਫਰਜ਼ ਜ਼ਖ਼ਮੀ ਨੂੰ ਹਸਪਤਾਲ ਪਹੁੰਚਾਉਣਾ ਸੀ, ਪਰ ਪੁਲਸ ਮੁਲਾਜ਼ਮਾਂ ਨੇ ਉਸ ਨੂੰ ਗੰਭੀਰ ਹਾਲਤ ਵਿੱਚ ਹੀ ਥਾਣੇ ਲਿਆ ਕੇ ਹਵਾਲਾਤ ਵਿੱਚ ਬੰਦ ਕਰ ਦਿੱਤਾ। ਵਾਇਰਲ ਵੀਡੀਓ ਵਿੱਚ ਏ.ਐੱਸ.ਆਈ. ਸੰਜੇ ਕੁਮਾਰ ਮੰਡਲ ਥਾਣੇ ਵਿੱਚ ਵਰਦੀ ਤੋਂ ਬਿਨਾਂ ਨਜ਼ਰ ਆਏ, ਜੋ ਪੁਲਸ ਦੇ ਅਨੁਸ਼ਾਸਨ ਦੇ ਖਿਲਾਫ਼ ਮੰਨਿਆ ਗਿਆ।

ਵੀਡੀਓ ਵਾਇਰਲ ਹੋਣ ਮਗਰੋਂ ਪੁਲਸ ਦੀ ਤਸਵੀਰ ਖਰਾਬ ਕਰਨ ਅਤੇ ਲਾਪਰਵਾਹੀ ਦੇ ਦੋਸ਼ ਵਿੱਚ ਐੱਸ.ਪੀ. ਨੇ ਪੁਸ਼ਪਰਾਜ ਕੁਮਾਰ (ਥਾਣਾ ਮੁਖੀ, ਚੀਰਾਚਾਸ), ਰਾਜੇਸ਼ ਕੁਮਾਰ (ਸਬ-ਇੰਸਪੈਕਟਰ) ਤੇ ਸੰਜੇ ਕੁਮਾਰ ਮੰਡਲ (ਸਹਾਇਕ ਸਬ-ਇੰਸਪੈਕਟਰ) ਨੂੰ ਸਸਪੈਂਡ ਕਰ ਦਿੱਤਾ ਹੈ। ਮੁਅੱਤਲੀ ਦੌਰਾਨ ਇਨ੍ਹਾਂ ਸਾਰਿਆਂ ਨੂੰ ਸਿਰਫ਼ 'ਸਧਾਰਨ ਗੁਜ਼ਾਰਾ ਭੱਤਾ' ਦਿੱਤਾ ਜਾਵੇਗਾ। ਪੁਲਸ ਸੁਪਰਡੈਂਟ ਦੀ ਇਸ ਸਖ਼ਤ ਕਾਰਵਾਈ ਨਾਲ ਮਹਿਕਮੇ ਵਿੱਚ ਹੜਕੰਪ ਮਚ ਗਿਆ ਹੈ।