13 ਨਵੰਬਰ ਨੂੰ ਖ਼ਤਮ ਹੋ ਜਾਵੇਗੀ ਦੁਨੀਆ ! ਇਕ ਵਾਰ ਫਿਰ ਚਰਚਾ ''ਚ ਆਈ ਪੁਰਾਣੀ ਭਵਿੱਖਬਾਣੀ

ਵੈੱਬ ਡੈਸਕ : ਅੱਜ-ਕੱਲ੍ਹ ਸੋਸ਼ਲ ਮੀਡੀਆ ਅਤੇ ਵੱਖ-ਵੱਖ ਮੀਡੀਆ ਅਦਾਰਿਆਂ ਵਿੱਚ 13 ਨਵੰਬਰ 2026 ਨੂੰ 'ਦੁਨੀਆ ਦੇ ਖ਼ਤਮ ਹੋਣ' ਦੀ 66 ਸਾਲ ਪੁਰਾਣੀ ਭਵਿੱਖਬਾਣੀ ਨੂੰ ਲੈ ਕੇ ਵਿਆਪਕ ਚਰਚਾ ਛਿੜੀ ਹੋਈ ਹੈ। ਹਾਲਾਂਕਿ, ਵਿਗਿਆਨਕ ਤੱਥ ਅਤੇ ਅੰਕੜੇ ਇਸ ਦਾਅਵੇ ਦੀ ਬਿਲਕੁਲ ਵੱਖਰੀ ਤਸਵੀਰ ਪੇਸ਼ ਕਰਦੇ ਹਨ।

ਭਵਿੱਖਬਾਣੀ ਦਾ ਇਤਿਹਾਸ ਅਤੇ ਵਿਗਿਆਨਕ ਅਧਿਐਨ
ਇਸ ਚਰਚਾ ਦੀ ਸ਼ੁਰੂਆਤ 4 ਨਵੰਬਰ 1960 ਨੂੰ ਅਮਰੀਕਾ ਦੇ ਪ੍ਰਸਿੱਧ 'ਸਾਇੰਸ' ਮੈਗਜ਼ੀਨ ਵਿੱਚ ਛਪੇ ਇੱਕ ਖੋਜ ਪੱਤਰ ਤੋਂ ਹੋਈ ਸੀ, ਜਿਸ ਦਾ ਸਿਰਲੇਖ 'ਕਿਆਮਤ ਦਾ ਦਿਨ: ਸ਼ੁੱਕਰਵਾਰ, 13 ਨਵੰਬਰ' (Doomsday: Friday, 13 November) ਸੀ। ਇਹ ਖੋਜ ਅਮਰੀਕਾ ਦੀ 'ਯੂਨੀਵਰਸਿਟੀ ਆਫ਼ ਇਲੀਨੋਇਸ' ਦੇ ਆਸਟ੍ਰੀਅਨ-ਅਮਰੀਕੀ ਭੌਤਿਕ ਵਿਗਿਆਨੀ ਹਾਈਨਜ਼ ਫ਼ੌਨ ਫ਼ੌਰਸਟਰ ਅਤੇ ਉਨ੍ਹਾਂ ਦੇ ਦੋ ਸਾਥੀਆਂ ਪੈਟ੍ਰੀਸ਼ੀਆ ਮੋਰਾ ਤੇ ਲੌਰੈਂਸ ਐਮੀਅਟ ਦੁਆਰਾ ਕੀਤੀ ਗਈ ਸੀ।
ਖੋਜਕਰਤਾਵਾਂ ਨੇ ਈਸਵੀ ਦੀ ਸ਼ੁਰੂਆਤ ਤੋਂ ਲੈ ਕੇ 1958 ਤੱਕ ਦੀ ਵਿਸ਼ਵ ਆਬਾਦੀ ਦੇ 24 ਇਤਿਹਾਸਕ ਅਨੁਮਾਨਾਂ ਦਾ ਵਿਸ਼ਲੇਸ਼ਣ ਕੀਤਾ ਸੀ। ਉਨ੍ਹਾਂ ਨੇ ਇੱਕ ਗਣਿਤਕ ਮਾਡਲ  ਤਿਆਰ ਕੀਤਾ, ਜਿਸ ਅਨੁਸਾਰ ਜੇਕਰ ਆਬਾਦੀ ਦੇ ਵਾਧੇ ਦੀ ਰਫ਼ਤਾਰ ਬਿਨਾਂ ਕਿਸੇ ਰੋਕ-ਟੋਕ ਦੇ ਇਤਿਹਾਸਕ ਦਰ ਨਾਲ ਜਾਰੀ ਰਹਿੰਦੀ, ਤਾਂ ਨਵੰਬਰ 2026 ਦੇ ਮੱਧ (13 ਨਵੰਬਰ 2026) ਤੱਕ ਮਨੁੱਖੀ ਆਬਾਦੀ ਸਿਧਾਂਤਕ ਤੌਰ 'ਤੇ 'ਅਨੰਤ' ਤੱਕ ਪਹੁੰਚ ਜਾਂਦੀ।

ਕੀ ਵਿਗਿਆਨੀਆਂ ਨੇ ਦੁਨੀਆ ਦੀ ਤਬਾਹੀ ਦੀ ਭਵਿੱਖਬਾਣੀ ਕੀਤੀ ਸੀ?
ਨਹੀਂ, ਖੋਜਕਰਤਾਵਾਂ ਨੇ ਕਿਸੇ ਵੀ ਭੂਚਾਲ, ਉਲਕਾਪਿੰਡ ਟਕਰਾਉਣ, ਜੁਆਲਾਮੁਖੀ ਧਮਾਕੇ ਜਾਂ ਸੂਰਜ ਦੇ ਫਟਣ ਵਰਗੀ ਕੁਦਰਤੀ ਆਫ਼ਤ ਦੀ ਗੱਲ ਨਹੀਂ ਕੀਤੀ ਸੀ। ਉਨ੍ਹਾਂ ਲਈ 'ਕਿਆਮਤ ਦਾ ਦਿਨ' ਸਿਰਫ਼ ਇੱਕ ਕਾਲਪਨਿਕ ਗਣਿਤਕ ਬਿੰਦੂ ਸੀ, ਜਿੱਥੇ ਉਨ੍ਹਾਂ ਦੀਆਂ ਸਮੀਕਰਨਾਂ ਅਨੁਸਾਰ ਆਬਾਦੀ ਅਨੰਤ ਹੋ ਰਹੀ ਸੀ। ਅਸਲ ਭੌਤਿਕ ਦੁਨੀਆ ਵਿੱਚ ਅਜਿਹਾ ਹੋਣਾ ਅਸੰਭਵ ਹੈ।

ਸੂਰਜੀ ਤੂਫ਼ਾਨ ਅਤੇ ਅਫ਼ਵਾਹਾਂ ਦਾ ਸੱਚ
1964 ਵਿੱਚ ਮਿਸਰ ਦੇ ਅਖ਼ਬਾਰ 'ਵਾਤਨੀ' ਵਿੱਚ ਮਿਸ਼ੇਲ ਟੇਕਲਾ ਨਾਮਕ ਲੇਖਕ ਦੇ ਲੇਖ ਦੀ ਕਤਰਨ ਦੁਬਾਰਾ ਵਾਇਰਲ ਹੋਣ ਤੋਂ ਬਾਅਦ, ਇਸ ਖੋਜ ਨੂੰ ਸੂਰਜੀ ਗਤੀਵਿਧੀਆਂ ਅਤੇ ਕੁਦਰਤੀ ਆਫ਼ਤਾਂ ਨਾਲ ਜੋੜ ਕੇ ਅਫ਼ਵਾਹਾਂ ਫੈਲਾਈਆਂ ਗਈਆਂ।
ਜਾਰਡਨ ਦੇ ਖਗੋਲ ਵਿਗਿਆਨੀ ਇਮਾਦ ਮੁਜਾਹਿਦ ਨੇ ਸਪੱਸ਼ਟ ਕੀਤਾ ਹੈ ਕਿ ਸੂਰਜੀ ਗਤੀਵਿਧੀਆਂ ਆਪਣੇ ਕੁਦਰਤੀ ਚੱਕਰ ਵਿੱਚੋਂ ਲੰਘਦੀਆਂ ਹਨ ਅਤੇ 13 ਨਵੰਬਰ 2026 ਨੂੰ ਅਜਿਹੀ ਕੋਈ ਖਗੋਲੀ ਘਟਨਾ ਨਹੀਂ ਹੋਣ ਵਾਲੀ ਜਿਸ ਨਾਲ ਧਰਤੀ ਨੂੰ ਖ਼ਤਰਾ ਹੋਵੇ। 1960 ਦੇ ਵਿਗਿਆਨਕ ਅਧਿਐਨ ਦਾ ਸੂਰਜੀ ਗਤੀਵਿਧੀਆਂ ਜਾਂ ਜਲਵਾਯੂ ਪਰਿਵਰਤਨ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਸੀ।

1960 ਦੀ ਗਣਨਾ ਅਸਲ ਵਿੱਚ ਕਿਉਂ ਖੁੰਝ ਗਈ?
1960 ਦੇ ਮਾਡਲ ਵਿੱਚ ਇਹ ਮੰਨਿਆ ਗਿਆ ਸੀ ਕਿ ਆਬਾਦੀ ਵਾਧੇ ਦੀ ਦਰ ਵਿੱਚ ਕੋਈ ਬਦਲਾਅ ਨਹੀਂ ਆਵੇਗਾ। ਪਰ ਅਸਲ ਵਿੱਚ, 1960 ਦੇ ਦਹਾਕੇ ਤੋਂ ਬਾਅਦ ਵਿਸ਼ਵ ਭਰ ਵਿੱਚ ਜਨਸੰਖਿਆ ਵਾਧੇ ਦੀ ਦਰ ਵਿੱਚ ਗਿਰਾਵਟ ਆਉਣੀ ਸ਼ੁਰੂ ਹੋ ਗਈ। ਸੰਯੁਕਤ ਰਾਸ਼ਟਰ (UN) ਦੀ 'ਵਰਲਡ ਪਾਪੂਲੇਸ਼ਨ ਪ੍ਰੋਸਪੈਕਟਸ 2024' ਰਿਪੋਰਟ ਅਨੁਸਾਰ, ਵਿਸ਼ਵ ਆਬਾਦੀ 2080 ਦੇ ਦਹਾਕੇ ਦੇ ਮੱਧ ਵਿੱਚ ਲਗਭਗ 10.3 ਅਰਬ ਦੇ ਸਿਖਰ 'ਤੇ ਪਹੁੰਚੇਗੀ ਅਤੇ ਉਸ ਤੋਂ ਬਾਅਦ ਹੌਲੀ-ਹੌਲੀ ਘਟਣੀ ਸ਼ੁਰੂ ਹੋ ਜਾਵੇਗੀ। ਇਸ ਲਈ, 13 ਨਵੰਬਰ 2026 ਨੂੰ ਦੁਨੀਆ ਖ਼ਤਮ ਹੋਣ ਦੇ ਦਾਅਵੇ ਪੂਰੀ ਤਰ੍ਹਾਂ ਅਧਾਰਹੀਣ ਹਨ ਅਤੇ ਇਹ ਸਿਰਫ਼ ਇੱਕ 66 ਸਾਲ ਪੁਰਾਣੇ ਗਣਿਤਕ ਮਾਡਲ ਦੀ ਗਲਤ ਵਿਆਖਿਆ ਕਾਰਨ ਫੈਲ ਰਹੀਆਂ ਹਨ।