ਲੋਹੇ ਦਾ ਕੂਲਰ ਜਾਂ ਪਲਾਸਟਿਕ ਦਾ ਕੂਲਰ ? ਜਾਣੋ ਭਿਆਨਕ ਗਰਮੀ ''ਚ ਕਿਹੜਾ ਕੂਲਰ ਕਮਰੇ ਨੂੰ ਰੱਖੇਗਾ ਜ਼ਿਆਦਾ ਠੰਡਾ

ਵੈੱਬ ਡੈਸਕ - ਗਰਮੀ ਦੇ ਮੌਸਮ 'ਚ ਜਦੋਂ ਤਾਪਮਾਨ 40 ਡਿਗਰੀ ਸੈਲਸੀਅਸ ਤੋਂ ਪਾਰ ਚਲਾ ਜਾਂਦਾ ਹੈ, ਤਾਂ ਲੋਕ ਕੂਲਰ ਖਰੀਦਣ ਦੀ ਯੋਜਨਾ ਬਣਾਉਂਦੇ ਹਨ। ਕੂਲਰ ਖਰੀਦਦੇ ਸਮੇਂ ਅਕਸਰ ਲੋਕਾਂ 'ਚ ਇਹ ਉਲਝਣ ਰਹਿੰਦੀ ਹੈ ਕਿ ਠੰਡੀ ਹਵਾ ਲਈ ਲੋਹੇ ਦਾ ਕੂਲਰ ਖਰੀਦਣਾ ਚਾਹੀਦਾ ਹੈ ਜਾਂ ਫਿਰ ਪਲਾਸਟਿਕ ਦਾ। ਸਰੋਤਾਂ ਅਨੁਸਾਰ, ਦੋਵਾਂ ਕੂਲਰਾਂ ਦੀ ਆਪਣੀ ਵਿਸ਼ੇਸ਼ਤਾ ਹੈ, ਪਰ ਠੰਡੀ ਹਵਾ ਦੇ ਮਾਮਲੇ 'ਚ ਲੋਹੇ ਦਾ ਕੂਲਰ ਅਸਲੀ 'ਉਸਤਾਦ' ਮੰਨਿਆ ਜਾਂਦਾ ਹੈ।

ਲੋਹੇ ਦੇ ਕੂਲਰ ਦੇ ਫੀਚਰਜ਼
ਲੋਹੇ ਦੇ ਕੂਲਰਾਂ 'ਚ ਆਮ ਤੌਰ 'ਤੇ ਪੱਖੇ ਦਾ ਸਾਈਜ਼ ਵੱਡਾ ਹੁੰਦਾ ਹੈ ਅਤੇ ਇਨ੍ਹਾਂ 'ਚ 'ਘਾਹ' ਦੀ ਵਰਤੋਂ ਕੀਤੀ ਜਾਂਦੀ ਹੈ। ਲੋਹੇ ਦੀ ਬਾਡੀ ਪਾਣੀ ਨੂੰ ਲੰਬੇ ਸਮੇਂ ਤੱਕ ਠੰਡਾ ਰੱਖਣ 'ਚ ਮਦਦ ਕਰਦੀ ਹੈ, ਜਿਸ ਕਾਰਨ ਇਸ 'ਚੋਂ ਨਿਕਲਣ ਵਾਲੀ ਹਵਾ ਦਾ ਤਾਪਮਾਨ ਪਲਾਸਟਿਕ ਕੂਲਰ ਦੇ ਮੁਕਾਬਲੇ 2-3 ਡਿਗਰੀ ਸੈਲਸੀਅਸ ਘੱਟ ਹੋ ਸਕਦਾ ਹੈ। ਇਸ ਤੋਂ ਇਲਾਵਾ, ਲੋਹੇ ਦੇ ਕੂਲਰ 'ਚ ਭਾਰੀ 'ਐਗਜ਼ੌਸਟ ਫੈਨ' ਲੱਗਿਆ ਹੁੰਦਾ ਹੈ ਜਿਸਦਾ 'ਏਅਰ ਥ੍ਰੋਅ' ਬਹੁਤ ਸ਼ਕਤੀਸ਼ਾਲੀ ਹੁੰਦਾ ਹੈ, ਜੋ ਵੱਡੇ ਕਮਰਿਆਂ ਜਾਂ ਹਾਲਾਂ ਨੂੰ ਤੇਜ਼ੀ ਨਾਲ ਠੰਡਾ ਕਰਨ ਦੇ ਸਮਰੱਥ ਹੈ।

ਪਲਾਸਟਿਕ ਦੇ ਕੂਲਰ ਦੇ ਫੀਚਰਜ਼ 
ਪਲਾਸਟਿਕ ਦੇ ਕੂਲਰ ਡਿਜ਼ਾਈਨ 'ਚ ਆਧੁਨਿਕ ਹੁੰਦੇ ਹਨ ਅਤੇ ਇਨ੍ਹਾਂ 'ਚ ਅਕਸਰ 'ਹਨੀਕੌਂਬ ਪੈਡ' ਦੀ ਵਰਤੋਂ ਕੀਤੀ ਜਾਂਦੀ ਹੈ। ਇਹ ਕੂਲਰ 'ਬਲੋਅਰ' ਜਾਂ ਛੋਟੇ ਪੱਖਿਆਂ 'ਤੇ ਚੱਲਦੇ ਹਨ ਅਤੇ ਨਿੱਜੀ ਵਰਤੋਂ ਜਾਂ ਛੋਟੇ ਕਮਰਿਆਂ ਲਈ ਬਿਹਤਰ ਹੁੰਦੇ ਹਨ। ਹਾਲਾਂਕਿ, ਵੱਡੇ ਹਾਲਾਂ ਨੂੰ ਠੰਡਾ ਕਰਨ ਦੇ ਮਾਮਲੇ 'ਚ ਇਹ ਲੋਹੇ ਦੇ ਕੂਲਰਾਂ ਦੇ ਮੁਕਾਬਲੇ ਪਛੜ ਜਾਂਦੇ ਹਨ।

ਤੁਹਾਡੇ ਲਈ ਕਿਹੜਾ ਬਿਹਤਰ ਹੈ?
ਜੇਕਰ ਤੁਹਾਡੇ ਕੋਲ ਇਕ ਵੱਡਾ ਕਮਰਾ ਜਾਂ ਹਾਲ ਹੈ ਅਤੇ ਤੁਸੀਂ ਬਹੁਤ ਤੇਜ਼ ਅਤੇ ਠੰਡੀ ਹਵਾ ਚਾਹੁੰਦੇ ਹੋ, ਤਾਂ ਤੁਹਾਨੂੰ ਲੋਹੇ ਦਾ ਕੂਲਰ ਚੁਣਨਾ ਚਾਹੀਦਾ ਹੈ। ਪਲਾਸਟਿਕ ਦੇ ਕੂਲਰ ਸਿਰਫ ਛੋਟੀਆਂ ਥਾਵਾਂ ਲਈ ਹੀ ਢੁਕਵੇਂ ਹਨ।