ਬਦਲਦੇ ਮੌਸਮ ''ਚ ਬੱਚੇ ਹੋ ਰਹੇ ਨੇ ਬਿਮਾਰ ਤਾਂ ਅਪਣਾਓ ਇਹ ਘਰੇਲੂ ਨੁਸਖੇ! ਤੁਰੰਤ ਮਿਲੇਗੀ ਰਾਹਤ

ਵੈੱਬ ਡੈਸਕ - ਦੇਸ਼ ਦੇ ਕਈ ਹਿੱਸਿਆਂ 'ਚ ਅੱਜ-ਕੱਲ੍ਹ ਮੌਸਮ ਦਾ ਮਿਜ਼ਾਜ ਲਗਾਤਾਰ ਬਦਲ ਰਿਹਾ ਹੈ। ਕਦੇ ਤੇਜ਼ ਧੁੱਪ ਅਤੇ ਗਰਮੀ ਹੁੰਦੀ ਹੈ, ਤਾਂ ਕਦੇ ਅਚਾਨਕ ਬਾਰਿਸ਼ ਹੋਣ ਨਾਲ ਮੌਸਮ ਠੰਡਾ ਹੋ ਜਾਂਦਾ ਹੈ। ਇਸ ਬਦਲਦੇ ਮੌਸਮ ਦਾ ਸਭ ਤੋਂ ਵੱਧ ਅਸਰ ਬੱਚਿਆਂ ਦੀ ਸਿਹਤ 'ਤੇ ਪੈ ਰਿਹਾ ਹੈ, ਜਿਸ ਕਾਰਨ ਉਹ ਜਲਦੀ ਖੰਘ ਅਤੇ ਜ਼ੁਕਾਮ ਦੀ ਲਪੇਟ 'ਚ ਆ ਰਹੇ ਹਨ। ਮਾਹਿਰਾਂ ਅਨੁਸਾਰ, ਤਾਪਮਾਨ 'ਚ ਆਉਣ ਵਾਲੇ ਇਸ ਉਤਾਰ-ਚੜ੍ਹਾਅ ਕਾਰਨ ਬੱਚਿਆਂ ਦਾ ਇਮਿਊਨ ਸਿਸਟਮ ਪ੍ਰਭਾਵਿਤ ਹੁੰਦਾ ਹੈ। ਸਰੋਤਾਂ ਅਨੁਸਾਰ, ਬੱਚਿਆਂ ਨੂੰ ਇਨ੍ਹਾਂ ਬਿਮਾਰੀਆਂ ਤੋਂ ਬਚਾਉਣ ਲਈ ਤੁਸੀਂ ਕੁਝ ਅਸਰਦਾਰ ਘਰੇਲੂ ਅਤੇ ਆਯੁਰਵੈਦਿਕ ਨੁਸਖ਼ੇ ਅਪਣਾ ਸਕਦੇ ਹੋ :-

ਦੇਸੀ ਚੀਜ਼ਾਂ ਦੀ ਭਾਫ਼
- ਜੇਕਰ ਬੱਚੇ ਨੂੰ ਸਰਦੀ-ਖੰਘ ਹੋ ਗਈ ਹੈ, ਤਾਂ ਪਾਣੀ 'ਚ ਤੁਲਸੀ, ਦਾਲਚੀਨੀ ਅਤੇ ਲੌਂਗ ਪਾ ਕੇ ਉਸ ਨੂੰ ਭਾਫ਼ ਦਿਓ। ਇਹ ਬੱਚੇ ਦੀ ਛਾਤੀ ਨੂੰ ਸਾਫ਼ ਕਰਨ ਅਤੇ ਇਨਫੈਕਸ਼ਨ ਨੂੰ ਘੱਟ ਕਰਨ 'ਚ ਮਦਦਗਾਰ ਹੁੰਦੀ ਹੈ।

ਆਯੁਰਵੈਦਿਕ ਪੋਟਲੀ
- ਛੋਟੇ ਬੱਚਿਆਂ ਲਈ ਇਹ ਨੁਸਖ਼ਾ ਬਹੁਤ ਕਾਰਗਰ ਹੈ। ਦਾਲਚੀਨੀ, ਲੌਂਗ, ਅਜਵਾਇਣ ਅਤੇ ਜਾਇਫਲ ਨੂੰ ਭੁੰਨ ਕੇ, ਉਸ 'ਚ ਕਪੂਰ ਪਾ ਕੇ ਇਕ ਸੂਤੀ ਕੱਪੜੇ 'ਚ ਬੰਨ੍ਹ ਲਓ। ਸੌਂਦੇ ਸਮੇਂ ਇਸ ਪੋਟਲੀ ਨੂੰ ਬੱਚੇ ਦੇ ਨੇੜੇ ਰੱਖਣ ਨਾਲ ਉਸ ਨੂੰ ਜ਼ੁਕਾਮ 'ਚ ਰਾਹਤ ਮਿਲਦੀ ਹੈ।

ਪਾਨ ਅਤੇ ਅਜਵਾਇਣ ਦਾ ਪਾਣੀ
- ਪਾਨ ਦੇ ਪੱਤਿਆਂ 'ਚ ਇਕ ਚਮਚ ਅਜਵਾਇਣ ਪਾ ਕੇ ਉਬਾਲ ਲਓ। ਇਸ ਪਾਣੀ ਨੂੰ ਠੰਡਾ ਕਰਕੇ ਬੱਚੇ ਨੂੰ ਪਿਲਾਉਣ ਨਾਲ ਨਾ ਸਿਰਫ਼ ਖੰਘ ਠੀਕ ਹੁੰਦੀ ਹੈ, ਸਗੋਂ ਪਾਚਨ ਪ੍ਰਣਾਲੀ 'ਚ ਵੀ ਸੁਧਾਰ ਹੁੰਦਾ ਹੈ।

ਅਦਰਕ, ਕਾਲੀ ਮਿਰਚ ਅਤੇ ਸ਼ਹਿਦ
- ਇਮਿਊਨਿਟੀ ਵਧਾਉਣ ਲਈ ਅਦਰਕ ਦਾ ਰਸ, ਥੋੜ੍ਹੀ ਜਿਹੀ ਕਾਲੀ ਮਿਰਚ ਅਤੇ ਇਕ ਚਮਚ ਸ਼ਹਿਦ ਮਿਲਾ ਕੇ ਬੱਚੇ ਨੂੰ ਦਿਓ। ਕਾਲੀ ਮਿਰਚ ਵਿਟਾਮਿਨ ਸੀ ਦਾ ਚੰਗਾ ਸਰੋਤ ਹੈ, ਜੋ ਇਮਿਊਨਿਟੀ ਨੂੰ ਮਜ਼ਬੂਤ ਕਰਦੀ ਹੈ।

ਕਿਉਂ ਪੈਂਦੇ ਹਨ ਬੱਚੇ ਜਲਦੀ ਬਿਮਾਰ?
ਸਰੋਤਾਂ ਮੁਤਾਬਕ, ਕੋਵਿਡ ਤੋਂ ਬਾਅਦ ਜਨਮੇ ਜ਼ਿਆਦਾਤਰ ਬੱਚਿਆਂ ਦਾ ਇਮਿਊਨ ਸਿਸਟਮ ਕਮਜ਼ੋਰ ਪਾਇਆ ਗਿਆ ਹੈ। ਜਦੋਂ ਬਾਹਰਲੇ ਵਾਤਾਵਰਣ ਦਾ ਤਾਪਮਾਨ ਬਦਲਦਾ ਹੈ, ਤਾਂ ਸਾਡੇ ਸਰੀਰ ਦਾ ਤਾਪਮਾਨ ਉਸ ਨਾਲ ਮੇਲ ਨਹੀਂ ਖਾਂਦਾ, ਜਿਸ ਕਾਰਨ ਕਮਜ਼ੋਰ ਇਮਿਊਨਿਟੀ ਵਾਲੇ ਬੱਚੇ ਜਲਦੀ ਬਿਮਾਰ ਹੋ ਜਾਂਦੇ ਹਨ। ਖਾਣ-ਪੀਣ 'ਚ ਪੋਸ਼ਕ ਤੱਤਾਂ ਦੀ ਕਮੀ ਵੀ ਇਸ ਦਾ ਇਕ ਵੱਡਾ ਕਾਰਨ ਹੈ।